၃ နှစ်ကျော်အတွင်း စစ်အာဏာသိမ်းမှုဆန့်ကျင်သူ ၅၅၀၀ ကျော် အသတ်ခံရ

(နွေဦးတော်လှန်ရေးနှင့်ဆက်စပ်သံသယဖြင့် ၁၆၀ ကျော် သေဒဏ်ချမှတ်ခံရ)

မောင်စာဂ၊ နိရဥ္စရာ၊ စက်တင်ဘာ  ၆/၂၀၂၄

မြန်မာနိုင်ငံတွင် စစ်အာဏာသိမ်းပြီးနောက် ၃ နှစ်ကျော်အတွင်း စစ်အာဏာသိမ်းမှုဆန့်ကျင်သူ ၅၅၀၀ ကျော် အသတ်ခံလိုက်ရကြောင်း NUG က ထုတ်ပြန်သည်။

စစ်အာဏာသိမ်းခဲ့သည့် ၂၀၂၁ ခုနှစ်၊ ဖေဖော်ဝါရီလမှ ၂၀၂၄ ခုနှစ်၊ သြဂုတ်လအထိ ၃ နှစ်ကျော် ကာလအတွင်း ကောက်ခံထားသည့်စာရင်းဖြစ်သည်ဟု အမျိုးသားညီညွတ်ရေးအစိုးရ (NUG) ၏ စက်တင်ဘာလ ၁ ရက်တွင်ထုတ်ပြန်သည့် လူ့အခွင့်အရေးဆိုင်ရာ သတင်းလွှာ အတွဲ(၁)၊ အမှတ် (၆၅)၌ ထည့်သွင်းဖော်ပြထားသည်။

ယင်းကာလအတွင်း စစ်အာဏာသိမ်းမှုဆန့်ကျင်သူ ၅၅၈၈ ဦး အသတ်ခံလိုက်ရပြီး နိုင်ငံရေး တက်ကြွလှုပ်ရှားသူနှင့် ပြည်သူစုစုပေါင်း ၂၇၂၈၇ ဦးသည် ဖမ်းဆီးထိန်းသိမ်းခံခဲ့ရသည်ဟု ဖော်ပြသည်။

ဖမ်းဆီးခံလိုက်ရသူများအနက် ၂၀၈၂၀ ဦးသည် ဆက်လက်ထိန်းသိမ်းခံထားရပြီး ယင်းအနက် ၉၃၆၅ ဦးကို ပုဒ်မအမျိုးမျိုးတပ်ကာ မတရား ထောင်ဒဏ်ချမှတ်ထားသည်ဟုလည်း ဆိုသည်။

ယင်းအပြင် နွေဦးတော်လှန်ရေးနှင့်ဆက်စပ်သည်ဟုစွပ်စွဲကာ သေဒဏ်ချမှတ်ခံရသူ ၁၆၇ ဦးနှင့် မျက်ကွယ်သေဒဏ်ချမှတ်ခံရသူ ၄၄ ဦးရှိပြီး ၁၂၃ ဦးမှာ နိုင်ငံတဝန်းရှိ အကျဥ်းထောင် အသီးသီးတွင် ထိန်းသိမ်းခံထားရဆဲဟု NUG ၏ထုတ်ပြန်ချက်တွင် ဖော်ပြထားသည်။

ဓာတ်ပုံ - စစ်အာဏာသိမ်းမှုဆန့်ကျင်မှုကြောင့် သေဒဏ်ချမှတ်ခံလိုက်ရသည့် အမျိုးသား ဒီမိုကရေစီအဖွဲ့ချုပ် (NLD) လွှတ်တော်ကိုယ်စားလှယ် ကိုဖြိုးဇေယျာသော်နှင့် ၈၈ မျိုးဆက် ကျောင်းသားခေါင်းဆောင် ကို ဂျင်မီတို့အား တွေ့ရစဥ်။