ရခိုင်ရိုးမ အရှေ့ခြမ်းတွင် ချင်းကာကွယ်ရေးတပ် -အရှို၏ အပတ်စဥ် (၅)စစ်သင်တန်းဆင်းပွဲပြုလုပ်

မောင်စာဂ၊ နိရဥ္စရာ၊ စက်တင်ဘာ ၁၀/၂၀၂၄

ရခိုင်ရိုးမ အရှေ့ခြမ်းတွင် လှုပ်ရှားနေသည့် ချင်းကာကွယ်ရေးတပ် - အရှို(CDF-Asho)၏ အခြေခံ စစ်ပညာသင်တန်း အပတ်စဥ် (၅) အခြေခံစစ်ပညာသင်တန်းဆင်းပွဲကို ပြုလုပ်ခဲ့ကြောင်း စက်တင်ဘာ ၈ ရက်တွင် ထုတ်ပြန်သည်။

ချင်းကာကွယ်ရေးတပ် - အရှိုနှင့် လူထုတော်လှန်ရေးမဟာမိတ်အင်အားစု (PRA - Magway)တို့ ပူပေါင်း ဖွင့်လှစ်သော အဆိုပါသင်တန်းဆင်းပွဲအခမ်းအနားကို CDF - Asho နောက်တန်းဌာနချုပ်၌ စက်တင်ဘာ ၃ ရက်က ပြုလုပ်ခဲ့သည်ဟု ထုတ်ပြန်ချက်အရ သိရသည်။

"သင်တန်းကာလ(၃)လကျော်ကြာမြင့်ခဲ့ပြီး အခက်အခဲများကြားထဲမှ အောင်မြင်စွာ ဖြတ်ကျော်နိုင်ခဲ့သော သင်တန်းသူ/ သားများနှင့် သင်တန်းဆင်းပွဲကာလအထိ ကြိုးစား အားစိုက်ခဲ့ကြသည့် သင်တန်းဆရာ/မ များ၊ လုံခြုံရေးရဲဘော်/စစ်မေများ အားလုံးအား လေးစားဂုဏ်ပြုအပ်သည်"ဟုလည်း ရေးသားထားသည်။

CDF - Asho သည် မကွေးတိုင်းဒေသကြီး၊ ဧရာဝတီမြစ်အနောက်ခြမ်းရှိ မကွေး - ရခိုင်အစပ်၊ ငဖဲမြို့နယ်တွင် စစ်ရေးလှုပ်ရှားလျက်ရှိသည့်အဖွဲ့ဖြစ်သည်။

ပြီးခဲ့သည့် ဩဂုတ်လ ၁၉ ရက်၊ နံနက် ၁၁ နာရီခွဲခန့်ကလည်း မကွေးတိုင်း၊ ငဖဲမြို့နယ်ရှိ မင်းဘူး- အမ်းကားလမ်းမပေါ်ရှိ တုံးကြီးကျေးရွာအနီး လက်ဖက်ခြံစခန်းကုန်းပေါ်တွင် တပ်စွဲထားသော စစ်ကောင်စီတပ်သည် လင်းတဲကျေးရွာဘက်သို့ အင်အား ၂၀ ခန့်ဖြင့် ကင်းရှည်ထွက်လာစဉ် CDF - Asho အပါအဝင် တော်လှန်ရေးပူးပေါင်းတပ်နှင့် ထိတွေ့တိုက်ပွဲဖြစ်ပွားခဲ့သည်ဟု CDF - Asho က ထုတ်ပြန်ခဲ့သည်။

စစ်ကောင်စီဘက်က ၂ ဦးသေဆုံးပြီး ထိခိုက်ဒဏ်ရာ ရရှိသူအချို့ရှိခဲ့သည်ဟုလည်း ထုတ်ပြန်ချက်တွင် ဖော်ပြခဲ့သည်။

ယင်းတိုက်ပွဲအတွင်း စစ်ကောင်စီထံမှ MA3 အမျိုးအစား သေနတ်တစ်လက် သိမ်းဆည်းရရှိခဲ့ပြီး မဟာမိတ်ပူးပေါင်းတပ်မှ ထိခိုက်မှုမရှိခဲ့ဟု ဆိုထားသည်။

ဓာတ်ပုံ - CDF(Asho)