လူထက်နိုင်(ဒွါရာမြီ)၊နိရဥ္စရာ၊ စက်တင်ဘာ ၁၄  / ၂၀၂၄

ရှမ်းပြည်နယ်နှင့်ကယားပြည်နယ်စပ်ရှိ စစ်ကောင်စီစခန်းတချို့အား ကရင်နီတော်လှန်ရေးအင်အားစုများကသိမ်းပိုက်စဥ် စစ်ကောင်စီတပ်ဖွဲ့ဝင် ၃၀ ကျော်သေဆုံးပြီး ၃ ဦးလက်နက်နှင့်အတူဖမ်းမိခဲ့ကြောင်း LoikawLocal PDF က ယမန်နေ့စက်တင်ဘာလ ၁၃ ရက်တွင် ထုတ်ပြန်ခဲ့သည်။

ပြီးခဲ့သည့်စက်တင်ဘာလ ၅ ရက်မှ ရ ရက်အထိ လွိုင်ကော်ဒေသခံ ပြည်သူ့ကာကွယ်ရေးတပ် (Loikaw Local PDF)၊ လွိုင်ကော်ပြည်သူ့ကာကွယ်ရေးတပ် (LoikawPDF)၊ကရင်နီအမျိုးသားများကာကွယ်ရေးတပ် (KNDF)၊ ကရင်နီလူမျိုးပေါင်းစုံပြည်သူ့လွတ်မြောက်ရေးတပ်ဦး (KNPLF)နှင့်ရှမ်းတောင်အခြေစိုက် တပ်အသီးသီးတို့ပူးပေါင်း၍ ရှမ်းပြည်နယ်နှင့်ကယားပြည်နယ်နယ်စပ်တွင် စစ်ဆင်ရေးတစ်ခု ဖော်ဆောင်ခဲ့သည်ဟု ထုတ်ပြန်ချက်တွင်ဖော်ပြထားသည်။

အဆိုပါစစ်ဆင်ရေးအတွင်းစစ်ကောင်စီတပ်များ စိုးမိုးထားသော တပ်၊ ရဲစခန်းနှင့် စခန်းကုန်းများအားတိုက်ခိုက်သိမ်းပိုက်နိုင်ခဲ့ခြင်းဖြစ်ကြောင်း ထုတ်ပြန်ထားသည်။

စစ်ကောင်စီကဒရုန်း၊ လက်နက်ကြီး အမြောက်အများသုံးစွဲခဲ့သောကြောင့် လွိုင်ကော်ဒေသခံပြည်သူ့ကာကွယ်ရေးတပ်မှ ရဲဘော် ၃ ဦး ထိခိုက် ဒဏ်ရာ ရရှိခဲ့ပြီး (၁)ဦးမှာစိုးရိမ်၇သည်ဟု ဆိုထားသည်။

အလားတူ KNDF ၊ KNPLF၊ ရှမ်းတောင်အခြေစိုက်တပ်များမှလည်း ထိခိုက်ကျဆုံးမှုရှိခဲ့ကြောင်း ထုတ်ပြန်ချက်တွင်ဖော်ပြထားသည်။

ကရင်နီပြည်သည်စစ်ကောင်စီတပ်များ၏ စစ်ရေး ဒဏ်ထိခိုက်မှုနှင့် လေကြောင်းတိုက်ခိုက်ခံရမှုအများဆုံးရှိသော ပြည်နယ်တစ်ခုဖြစ်ပြီး ကရင်နီတပ်ပေါင်းစုများကလည်း လက်ရှိအချိန်ထိကြိုးစားခုခံတွန်းလှန်လျက်ရှိကြောင်း ထုတ်ပြန်ချက်တွင် ဖော်ပြထားသည်။

လွိုင်ကော်မြို့အနီးရှိကယန်းသာယာ၊ ကုတ်စု၊ လွိုင်လင်လေးနှင့် ထီးစခန်းတို့တွင် အဆိုပါရက်ပိုင်းအတွင်းတိုက်ပွဲများဖြစ်ခဲ့ကြောင်း ဒေသတွင်းသတင်းများတွင် ဖော်ပြထားကြသည်။

ဓာတ်ပုံ - Loikaw Local PDF