မောင်စာဂ၊နိရဥ္စရာ၊ စက်တင်ဘာ ၁၄/၂၀၂၄

စစ်ကောင်စီတပ်မှအရာရှိ ၃ ဦးအပါအဝင် ၄၁ ဦးသည် အကြမ်းမဖက် အာဏာဖီဆန်ရေးလူထုလှုပ်ရှားမှု(Civil Disobedience Movement-CDM)တွင် ဝင်ရောက်လာသည်ဟုအမျိုးသား ညီညွတ်ရေးအစိုး၇ (NUG)က ထုတ်ပြန်သည်။

စစ်ကောင်စီတပ်မှအရာရှိအဆင့် ဒုဗိုလ်မှူးကြီး (၃) ဦး၊ ဗိုလ်မှူး (၂) ဦး၊  ဗိုလ်ကြီး (၂) ဦး၊ ဗိုလ် (၃) ဦး အပါအဝင်တပ်သားနှင့်ရဲ (၄၁) ဦးသည် ဩဂုတ်လအတွင်း ဝင်ရောက်လာခြင်းဖြစ်သည်ဟု NUG ၏ ကာကွယ်ရေးဝန်ကြီးဌာနက စက်တင်ဘာ ၁၂ ရက်တွင်ထုတ်ပြန်ထားသည်။

သူတို့ထဲတွင်စစ်ကောင်စီတပ်ဖွဲ့ဝင် ၂၇ ဦးနှင့် ရဲတပ်ဖွဲ့ဝင် ၁၄ ဦးပါဝင်သည်။

သူတို့သည် NUG ၏ ပြည်သူ့ရင်ခွင် အကောင်အထည်ဖော်ဆောင်မှုဗဟိုကော်မတီနှင့် NUG ကာကွယ်ရေးဝန်ကြီးဌာနကွပ်ကဲမှုအောက်က ကာကွယ်ရေးတပ်ဖွဲ့ (PDF)များထံချိတ်ဆက်ဝင်ရောက်လာခြင်းဖြစ်သည်ဟု ဆိုသည်။

"အဆိုပါ(၄၁) ဦးတွင် လက်နက်နှင့်တကွ ပြည်သူ့ရင်ခွင်ခိုလှုံလာသူများလည်းရှိပြီးလက်နက်ယူဆောင်လာသူများကို အမျိုးသားညီညွတ်ရေးအစိုးရ၊ ကာကွယ်ရေးဝန်ကြီးဌာနကသတ်မှတ်ထားသည့် လက်နက်တန်ဖိုးအလိုက် ဂုဏ်ပြု ချီးမြှင့်ငွေများပေးအပ်ခဲ့သည်"ဟု ထုတ်ပြန်ထားသည်။

လက်နက်ဖြင့်ဝင်ရောက်လာသူ၁၈ ဦးရှိပြီး လက်နက်မဲ့ဝင်ရောက်လာသူ ၂၃ ဦးရှိသည်ဟု ထုတ်ပြန်ချက်အရ သိ၇သည်။

သူတို့ထံမှလက်နက်မျိုးစုံ ၁၈ လက်နှင့် ခဲယမ်းမီးကျောက်များကို ရရှိခဲ့သည်ဟုလည်း NUG က ဆိုသည်။

ပြီးခဲ့သည့်ဇူလိုင်အတွင်းကလည်း စစ်ကောင်စီတပ်မှ ဗိုလ်မှူး ၂ ဦး၊ ဗိုလ်ကြီး ၅ ဦးအပါအဝင်စစ်ကောင်စီတပ်ဖွဲ့ဝင်နှင့် ရဲတပ်ဖွဲ့ဝင် စုစုပေါင်း ၅၄ ဦး CDM ဝင်ရောက်လာခဲ့သည်ဟု NUG ကာကွယ်ရေးဝန်ကြီးဌာနက ထုတ်ပြန်ခဲ့သည်။

ဓာတ်ပုံ -စစ်ကောင်စီတပ်ဖွဲ့နှင့် ရဲတပ်ဖွဲ့ဝင်အချို့ CDM ဝင်ရောက်မှုပုံဟောင်း။(Photo - CDF-Hakha)