ရှမ်းပြည် သီပေါနှင့် နောင်ချိုအပါအဝင် ကချင်ပြည် ဖားကန့်တို့ကို စစ်ကောင်စီ ဗုံးကြဲ

မောင်စာဂ၊ နိရဥ္စရာ၊ ​စက်တင်ဘာ ၁၇/၂၀၂၄

တအာင်းတပ်မတော်(TNLA)သိမ်းပိုက်ထားသည့် ရှမ်းပြည် သီပေါမြို့နှင့် နောင်ချိုမြို့အပါအဝင် ကချင်ပြည်၊ ဖားကန့်မြို့နယ်တို့ကို စစ်ကောင်စီက  ဗုံးကြဲတိုက်ခိုက်လျက်ရှိသည်ဟု သိရသည်။

ရှမ်းပြည်ရှိ သီပေါမြို့ကို စစ်ကောင်စီတပ်က Y-12 လေယာဥ်ဖြင့် ဗုံးအလုံး(၅၀)ကျော်အား စက်တင်ဘာ ၁၆ ရက်၊ နံနက် ၉ နာရီမှ ၁၀ နာရီအတွင်း လာရောက်ကြဲချတိုက်ခိုက်ခဲ့သည်ဟု TNLA က ယင်းနေ့ညနေတွင် ထုတ်ပြန်သည်။

သီပေါမြို့၊ အနောက်ရပ် ရပ်ကွက်နှင့် စင်မာလာပြည်သူ့ဥယျာဥ်အတွင်း ကျရောက်ပေါက်ကွဲခဲ့၍ ဒေသခံတစ်ဦးသေဆုံးပြီး တစ်ဦးဒဏ်ရာရသွားသည်ဟုလည်း TNLA က ထုတ်ပြန်ထားသည်။

"ရပ်ကွက်အတွင်း ဗုံးများကျရောက်ပေါက်ကွဲမှုကြောင့် ထိုရပ်ကွက်ရှိ လူနေအိမ်များ ပျက်စီးခဲ့သည့်အပြင် ဒေသခံတစ်ဦး ဗုံးစမှန်သေဆုံးခဲ့ရပြီး တစ်ဦး ထိခိုက်ဒဏ်ရာရရှိခဲ့သည်"ဟု ထုတ်ပြန်ချက်တွင် ဖော်ပြသည်။

TNLA သည် သီပေါမြို့ရှိ စစ်ကောင်စီလက်ကျန် တပ်စခန်းများအနက် ခလရ(၂၃)ကို စက်တင်ဘာ ၁၄ ရက်တွင် ပြန်လည်ထိုးစစ်ဆင်ခဲ့ရာ စက်တင်ဘာ ၁၅ ရက်တွင် တိုက်ပွဲပြင်းထန်ခဲ့သည်ဟု သိရသည်။ 

စက်တင်ဘာ ၁၅ ရက်၊ ည ၉ နာရီကျော်တွင် စစ်ကောင်စီ တပ်စွဲထားသည့် တပ်စခန်းကပစ်ခတ်လိုက်သည့် လက်နက်ကြီးများသည် သီပေါမြို့၊ ဇတ်စုရပ်ကွက်အတွင်းကျရောက်ပေါက်ကွဲပြီး နေအိမ်တစ်လုံး မီးလောင်ပြာကျသွားခဲ့သည်ဟုလည်း TNLA က ထုတ်ပြန်ထားသည်။

အလားတူ TNLA ထိန်းချုပ်ထားသည့် နောင်ချိုမြို့ကိုလည်း စက်တင်ဘာလ ၁၄ ရက်၊ ညဥ့် ၁၂ နာရီခန့်တွင် စစ်ကောင်စီက ဖျက်အားပြင်းလက်နက်ကြီးဖြစ်သည့် ပေါင် (၅၀၀)ဗုံး (၃)လုံးကို လေကြောင်းမှ လာရောက်ကြဲချတိုက်ခိုက်ခဲ့သည်ဟု TNLA က ထုတ်ပြန်ထားသည်။

နောင်ချိုမြို့၊ တောင်ရပ်ကွက်နှင့် ရွှေမုဠောဘုရားကျရောက်ပေါက်ကွဲမှုကြောင့် ဒေသခံ အမျိုးသမီးတစ်ဦး ထိခိုက်ဒဏ်ရာရရှိခဲ့သည့်အပြင် လူနေအိမ် (၅)လုံး ထိခိုက်ပျက်စီးသွားခဲ့သည်ဟု ထုတ်ပြန်ချက်တွင်ဖော်ပြသည်။

စစ်ကောင်စီတပ်သည် TNLA ထိန်းချုပ်ထားသည့် မြို့များဖြစ်သည့် ကွတ်ခိုင်၊ နမ့်ဆန်၊ မန်တုံ၊ သီပေါ၊ ကျောက်မဲ၊ နောင်ချိုနှင့် နမ့်ခမ်းမြို့တို့တွင် အရပ်သားပစ်မှတ်များကိုဦးတည်ကာ နေ့စဥ်လာရောက်ဗုံးကြဲတိုက်ခိုက်နေပြီး စစ်ရာဇဝတ်မှုကို ပြောင်ပြောင်တင်းတင်း ချိုးဖောက်နေသည်ဟုလည်း TNLA က ဆိုထားသည်။

ကချင်ပြည်၊ ဖားကန့်မြို့နယ်၊ ဆိုင်းတောင်ကျေးရွာထဲကို စစ်ကောင်စီတပ်က စက်တင်ဘာလ ၁၆ ရက်၊ မွန်းလွဲ ၁၂ နာရီခွဲကျော်နှင့် နေ့လယ် ၂ နာရီခွဲခန့်တွင် ဂျက်ဖိုက်တာဖြင့် နှစ်ကြိမ်တိုင် လာရောက် ဗုံးကြဲတိုက်ခိုက်ခဲ့သည်ဟု ဒေသခံများက ပြောသည်။

ဆိုင်းတောင်ကျေးရွာရှိ ရပ်ကွက် ၃ နှင့် ရပ်ကွက် ၄ တို့တွင် ကျရောက်ပေါက်ကွဲခဲ့ပြီး လူအထိအခိုက်ကိုလောလောဆယ် မသိရသေးပါ။

စက်တင်ဘာလ ၇ ရက်မှစတင်ခဲ့သည့် ဆိုင်းတောင်တိုက်ပွဲကြောင့် လက်ရှိအချိန်ထိ စစ်တပ်နှင့် တော်လှန်ရေးတပ်တို့အကြား စစ်ရေးတင်းမာနေဆဲဖြစ်သည်။

ဆိုင်တောင်းကျေးရွာအနီးတဝိုက်ကိုလည်း စစ်တပ်က လေကြောင်းတိုက်ခိုက်မှုများအပါအဝင် လက်နက်ကြီးများဖြင့်ပစ်ခတ်မှုများပါ ဆက်တိုက်လုပ်နေသည်ဟု သိရသည်။

ဓာတ်ပုံ - သီပေါမြို့အား စစ်ကောင်စီလေကြောင်းက ဗုံးကြဲတိုက်ခိုက်ပြီးနောက် တွေ့ရစဉ်။ (Photo - TNLA)