မောင်စာဂ၊နိရဉ္စရာ၊ အောက်တိုဘာ ၃၁/၂၀၂၄

စစ်အာဏာသိမ်းပြီးနောက်သုံးနှစ်ကျော်အတွင်း ချင်းပြည်တွင် စစ်ကောင်စီက လေကြောင်းတိုက်ခိုက်၍ ကလေးငယ် ၂၉ ဦးအပါအဝင် ၁၀၈ ဦး သေဆုံးသွားကြောင်း ချင်းလူ့အခွင့်အရေးအဖွဲ့ (CHRO)က ထုတ်ပြန်လိုက်သည်။

စစ်အာဏာသိမ်းသည့်၂၀၂၁ ခုနှစ်၊ ဖေဖော်ဝါရီလမှ ၂၀၂၄ ခုနှစ်၊ စက်တင်ဘာလအထိ ကောက်ခံထားသည့်စာရင်းဖြစ်သည်ဟု CHRO အဖွဲ့၏ အောက်တိုဘာလ ၂၉ရက်ထုတ်ပြန်ချက်တွင် ဖော်ပြထားသည်။

ယင်းအပြင်"လေကြောင်းတိုက်ခိုက်မှုများကြောင့် ချင်းပြည်တွင် ကလေးငယ် ၂၁ ဦးအပါအဝင် လူပေါင်း ၂၃၁ ဦးဒဏ်ရာရခဲ့ကြ၇သည်"ဟုလည်း ဖော်ပြထားသည်။

လေကြောင်းတိုက်ခိုက်မှု၅၁၅ ကြိမ် ပြုလုပ်ခဲ့ပြီး ဗုံးအလုံးရေ ၁၂၃၉ လုံးထက်မနည်း ကြဲချခဲ့သည်ဟုလည်းထုတ်ပြန်ချက်က ဖော်ပြသည်။

အဆောက်အအုံပေါင်း ၄၇၀ ပျက်စီးခဲ့ပြီး စာသင်ကျောင်း ၂၂ကျောင်း၊ ခရစ်ယာန် ဘုရားကျောင်း ၂၁ ခု၊ ဘုန်းကြီးကျောင်း ငါးကျောင်းနှင့်ကျန်းမာရေး အဆောက်အအုံ ခြောက်ခုပျက်စီးခဲ့သည်ဟုလည်း CHRO အဖွဲ့က ဆိုသည်။

ယခုကိစ္စနှင့်ပတ်သက်ပြီး CHRO အဖွဲ့ကို နိရဥ္စရာက Email နှင့် ဖေ့ဘုတ်မတ်ဆင်ဂျာတို့မှ တဆင့်ဆက်သွယ်မေးမြန်းထားသော်လည်း အကြောင်းမပြန်သေးပါ။

လက်ရှိတွင်ချင်းပြည်နယ်အတွင်း ဟားခါးနှင့် ထန်တလန်မြို့နယ်များတွင် စစ်ကောင်စီတပ်နှင့်ချင်းတော်လှန်ရေးပူးပေါင်းတပ်များ တိုက်ပွဲပြင်းထန်နေပြီးစစ်ကောင်စီလေတပ်ကလည်း နေ့စဉ်လိုလို ဗုံးကြဲတိုက်ခိုက်နေသည်ဟု သိ၇သည်။

ပြီးခဲ့သည့်အောက်တိုဘာလ ၂၉ ရက်၊ ညပိုင်းကလည်း စစ်ကောင်စီလေတပ်က မတူပီမြို့အနီးကို လေကြောင်းကဗုံးကြဲတိုက်ခဲ့သည်ဟု သိ၇သည်။

ဓာတ်ပုံ- ချင်းပြည်နယ်၊ထန်တလန်မြို့ကို စစ်ကောင်စီလေတပ်က၂၀၂၁ ခုနှစ်၊ အောက်တိုဘာ ၂၉ ရက်တွင် ဗုံးကြဲတိုက်ခိုက်၍ မီးလောင်နေစဉ်။ (Photo - CHRO)