လူထက်နိုင်၊ နိရဉ္စရာ၊ မတ် ၂၅/၂၀၂၅

ထန်တလန်မြို့မှ စစ်ကောင်စီအဖွဲ့ဝင် ဒေါက်တာမှုထန်ပိုင်ဆိုင်သော အိမ်၊ ခြံ၊ မြေအားလုံးကို အပြီးပိုင်သိမ်းဆည်းလိုက်ပြီဖြစ်ကြောင်း ချင်းပြည်ကာကွယ်ရေးတပ်(CDF-ထန်တလန်)က မတ် ၂၄ ရက်တွင် ထုတ်ပြန်သည်။

ထန်တလန်မြို့နယ် ဒေသခံတစ်ဦးဖြစ်သည့် ဒေါက်တာမှုထန်သည် ထန်တလန်မြို့တစ်ခုလုံးကို မီးရှို့ဖျက်ဆီးနေသည့် စစ်တပ်ကိုအားပေးသူ၊ ပြည်သူလူထုပေါ် ရက်စက်ကြမ်းကြုတ်စွာ အကောင်အထည်ဖော်ဆောင်ရွက်နေသည့် လုပ်ငန်းများတွင် တက်တက်ကြွကြွပါဝင်သူဟု ဆိုထားသည်။

ထို့အပြင် သူသည် အာဏာသိမ်းစစ်တပ်ကဖွဲ့စည်းထားသည့် နိုင်ငံတော်စီမံအုပ်ချုပ်ရေးကောင်စီဝင်တစ်ဦးလည်းဖြစ်သည့်အတွက် ထိုသို့ သိမ်းဆည်းခြင်းဖြစ်ကြောင်း ဖော်ပြထားသည်။

“၎င်းပိုင်ဆိုင်ထားပြီး Chinland Defense Force - Thantlang (CDF-TT) ထိန်းချုပ်နယ်မြေအတွင်းရှိ အိမ်၊ ခြံ၊ မြေအားလုံးကို ဤတော်လှန်ရေးကာလအတွင်း ပြည်သူလူထုကိုယ်စား CDF-Thantlang Council က အပြီးပိုင်သိမ်းဆည်းပြီး လိုအပ်သလိုဆက်လက်ကိုင်တွယ်မည်ဖြစ်ကြောင်းနှင့် အသစ်တက်လာမည့်အစိုးရသစ်ထံသို့ ထပ်မံလွှဲအပ်မည်ဖြစ်ကြောင်း အမိန့်ပြန်တမ်း ထုတ်ပြန်လိုက်သည်” ဟု ထုတ်ပြန်ချက်တွင် ပါရှိသည်။

ဒေါက်တာမှုထန်သည် ယခင်က ချင်းပြည်နယ် ပြည်ခိုင်ဖြိုးပါတီ ဥက္ကဋ္ဌဖြစ်ပြီး ၂၀၂၀ ရွေးကောက်ပွဲရှုံးနိမ့်ခဲ့ပြီးနောက် ယခုတွင် စစ်ကောင်စီအဖွဲ့၌ ပါဝင်ဆောင်ရွက်နေခြင်းဖြစ်ကြောင်း သိရသည်။

ထို့အပြင် ဒေါက်တာမှုထန်သည် စစ်ကောင်စီကျင်းပမည့် ၂၀၂၅ အထွေထွေရွေးကောက်ပွဲတွင် ပါဝင်ရန် ချင်းပြည်သစ်ကွန်ကရက်ပါတီ တည်ထောင်ခွင့်လျှောက်ထားသူထဲတွင်လည်း ပါဝင်ကြောင်း သိရသည်။

ဓာတ်ပုံ - MRTV နှင့် လူမှုကွန်ရက်
---
ကျနော်တို့မီဒီယာဆက်လက်ရှင်သန်ရပ်တည်နိုင်ရေးအတွက် လူကြီးမင်းတို့ရဲ့ အားပေးမှုနဲ့ အကူအညီတွေကို အထူးလိုအပ်နေပါတယ်။ ဒီလင့် https://donorbox.org/narinjara-news ကနေတဆင့် ကူညီနိုင်ပါတယ်။ လူကြီးမင်းတို့ရဲ့ ကူညီထောက်ပံ့မှုအတွက် ကျေးဇူးအထူးတင်ပါတယ်။