(စစ်ကောင်စီဘက်မှအရှိတချို့သေဆုံးမှုရှိဟုသတင်းများထွက်ပေါ်)

နိရဥ္ဇရာ၊ဇွန်၁၇ /၂၀၂၅

ပဲခူးတိုင်းသာယာဝတီခရိုင်မင်းလှမြို့နယ်ရန်ကုန်-ပြည်လမ်းပေါ်တွင် တိုက်ပွဲဖြစ်ပွားနေပြီး ခရီးသွားကားတစ်စီးလက်နက်ကြီးထိမှန်ကာ ပြည်သူ၃ဦး သေဆုံးခဲ့ကြောင်း ဒေသခံများထံမှ သိရသည်။

ပဲခူးတိုင်းအနောက်ခြမ်း၊သာယာဝတီခရိုင်၊မင်းလှမြို့နယ်ရန်ကုန်-ပြည်လမ်းပေါ်ရှိစစ်ကွင်းတာဆုံဂိတ်စခန်းတိုက်ခိုက်ခံရပြီးဇွန်၁၆ရက်နေ့နံနက်ပိုင်းကတည်းက ပြည်သူ့ကာကွယ်ရေးတပ် PDF နှင့် စစ်ကောင်စီတပ်တို့အကြားတိုက်ပွဲများဖြစ်ပွားနေခြင်း ဖြစ်ကြောင်းသိရသည်။

တိုက်ပွဲဖြစ်ပွားနေချိန်ညနေ၄နာရီခန့်တွင်ရန်ကုန်-ပြည်လမ်းပေါ်၌ပစ်ခတ်ခံရ၍သေဆုံးခဲ့သူများသည်ပေါင်းတည်မြို့မင်္ဂလာဆောင်မှရန်ကုန်မြို့သို့ပြန်လာသူများဖြစ်ကြောင်းသိရသည်။

ဒေသခံတစ်ဦးက“ ခရီးသွားကားအပစ်ခံရတာတိုက်ပွဲဖြစ်နေတော့ဘယ်သူပစ်လည်းစုံးစမ်းလို့ မရသေးဘူး။စစ်တပ်ကပစ်တာလို့တော့တော်တော်များများက ပြောကြတယ်။ ဒီနေ့လည်းရန်ကုန်-ပြည်လမ်းပေါ်မှာပစ်ခတ်တာတွေရှိနေပါသေးတယ်”ဟုသာယာဝတီမြို့ဒေသခံတစ်ဦးကပြောသည်။

တိုက်ပွဲအတွင်းစစ်ကောင်စီတပ်၏ပစ်ခတ်မှုကြောင့်ပြည်မြို့ဘက်ရှိမင်္ဂလာဆောင်မှပြန်လာသည့်ပြည်သူ၃ဦးသေဆုံးခဲ့ခြင်းဖြစ်ကြောင်းဒေသခံတချို့မှပြောဆိုကြသည်။

ထို့အပြင်မင်းလှမြို့နယ်ထောက်ကြန့်အုပ်စု၊ဆင်အိုင်ချောင်းပေါက်ရွာအနီး၌လည်းစစ်တပ်နှင့်တော်လှန်ရေးတပ်ဖွဲ့များထိတွေ့တိုက်ပွဲဖြစ်ခဲ့ရာတိုက်ပွဲဖြစ်ရာနေရာသို့စစ်တပ်အထိုင်ချထားသည့်တာကလေးရွာဘုန်းကြီးကျောင်းမှလက်နက်ကြီးပစ်ကူပေးနေကြောင်းလည်းသိရသည်။

ပဲခူးတိုင်းအတွင်းရှိရန်ကုန်-ပြည်လမ်းအပါအဝင်မင်းလှမြို့နယ်နေရာတချို့တွင်တိုက်ပွဲများဖြစ်ပွားနေပြီးစစ်တပ်ဘက်မှအရာရှိတချို့အပါအဝင်စစ်သားသေဆုံးမှုရှိကြောင်းလည်းဒေသခံများထံမှသိရသည်။

တိုက်ပွဲအတွင်းဗိုလ်မှူးဇော်မျိုးဝင်းနှင့်နောက်ထပ်အရာရှိတစ်ဦးသေဆုံးသွားကြောင်းလည်းဒေသတွင်းသတင်းတချို့တွင်ဖော်ပြထားကြသည်။

လက်ရှိတွင်လည်းတိုက်ပွဲမှာလက်ရှိအချိန်ထိဖြစ်ပွားနေပြီးရန်ကုန်-ပြည်လမ်းဖြတ်သန်းခွင့်ယာယီ ပိတ်ထားသဖြင့်ခရီးသွားကားများနှင့်ကုန်ကားတချို့ပိတ်မိနေကြောင်းသိရသည်။

ကုန်ကားမောင်းသူဒရိုင်ဘာတစ်ဦးက“ပြည်သူ၃ယောက်သေတာဟုတ်တယ်။ ကားလမ်းတွေအခုပိတ်ထားတယ်။ စစ်တပ်ဖက်ကလည်းနည်းနည်း အကျအဆုံးရှိတယ်လို့ပြောတယ်။ ကားတွေဖြတ်တဲ့အချိန်မှာစစ်တပ်ဘက်ကပစ်မှာအဲ့ဒါကြောင့်မဖြတ်ရဲတော့ဘူးကားတွေပိတ်မိနေတယ်” ဟုပြောသည်။

မင်းလှမြို့နယ်အပိုင်ရန်ကုန်-ပြည်လမ်းနှင့်ပဲခူးရိုးမအကြားလမ်းပိုင်းနေရာ၂ခုတွင်တော်လှန်ရေး အင်အားစုများနှင့်စစ်ကောင်စီတိုက်ပွဲဖြစ်ပွားနေခြင်းဖြစ်ကာစစ်ကောင်စီမှစစ်ကူစစ်ကြောင်းများပါရောက်ရှိလာကြောင်းသိရသည်။

ဓာတ်ပုံ- ပြည်ဒေသတွင်းသတင်းများ