လူထက်နိုင်၊ နိရဉ္ဇရာ၊ ဇွန် ၂၁ /၂၀၂၅
ဗမာပြည်သူ့လွတ်မြောက်ရေးတပ်တော်(BPLA)၏ အခြေခံစစ်ပညာသင်တန်း အပတ်စဉ်(၉)သင်တန်းဆင်းပွဲအခမ်းအနားသို့ အာရက္ခတပ်တော်(AA) တက်ရောက်ခဲ့သည်ဟု သိရသည်။
အဆိုပါ အပတ်စဉ်(၉)သင်တန်းဆင်းပွဲကို ဇွန်လ(၇)ရက်နေ့က တအာင်းပြည်တစ်နေရာတွင် ကျင်းပပြုလုပ်ခဲ့ရာ AA မှ တပ်မှူးတစ်ဦးနှင့်အတူ PSLF/TNLA အထွေထွေအတွင်းရေးမှူး ဗိုလ်ချုပ်တားဘုန်းကျော်၊ အမျိုးသားညီညွတ်ရေးအစိုးရ(NUG)၏ ကျန်းမာရေးနှင့် ပညာရေးဝန်ကြီးဌာန ပြည်ထောင်စုဝန်ကြီး ဒေါက်တာဇော်ဝေစိုး၊ ကရင်နီပြည်ကြားကာလ အုပ်ချုပ်ရေးကောင်စီ(IEC) ဒုဥက္ကဋ္ဌ ခွန်းဘီထူး၊ ပြည်သူ့လွတ်မြောက်ရေးတပ်မတော်(PLA)မှ စစ်ဦးစီးချုပ်နှင့် အထွေထွေအတွင်းရေးမှူး၊ မြန်မာနိုင်ငံလုံးဆိုင်ရာကျောင်းသားများဒီမိုကရက်တစ်တပ်ဦး(ABSDF) ဒုဥက္ကဋ္ဌနှင့် BPLA ၏ ကွပ်ကဲရေးမှူး မောင်ဆောင်းခတို့ တက်ရောက်ခဲ့ကြကြောင်း BPLA က ယနေ့ ဇွန် ၂၁ ရက်တွင် ဓာတ်ပုံများနှင့်တကွ ထုတ်ပြန်ထားသည်။
ထူးချွန်ဆုရရှိသူများတွင် လက်ဖြောင့်ဆု ရရှိသွားသည့် စစ်မေသည် ၁၀၂၇ စစ်ဆင်ရေး၌ မြင့်မြတ်စွာအသက်ပေးခဲ့သော အာဇာနည်ရဲဘော်အောင်ပိုင်၏ ညီမဖြစ်ကြောင်း အမှတ်(၂၀၃)စစ်ဒေသ၊ ဗျူဟာမှူးက သင်တန်းဆင်းပွဲအစီရင်ခံချက်တွင် ထည့်သွင်းပြောကြားခဲ့ကြောင်းလည်း သိရသည်။
ထို့အပြင် သင်တန်းဆင်းရဲဘော်များကို လက်နက်များပေးအပ်တပ်ဆင်ခဲ့ပြီး အမှတ်(၂၀၃)စစ်ဒေသအတွက် တပ်ရင်းသစ်တစ်ခုလည်းတိုးချဲ့ဖွဲ့စည်းနိုင်ခဲ့ကြောင်း BPLA ၏ သတင်းနှင့်ပြန်ကြားရေးအဖွဲ့ထံမှ သိရသည်။
ဓာတ်ပုံ - BPLA
---
ကျနော်တို့မီဒီယာဆက်လက်ရှင်သန်ရပ်တည်နိုင်ရေးအတွက် လူကြီးမင်းတို့ရဲ့ အားပေးမှုနဲ့ အကူအညီတွေကို အထူးလိုအပ်နေပါတယ်။ ဒီလင့် https://donorbox.org/narinjara-news ကနေတဆင့် ကူညီနိုင်ပါတယ်။ လူကြီးမင်းတို့ရဲ့ ကူညီထောက်ပံ့မှုအတွက် ကျေးဇူးအထူးတင်ပါတယ်။
လှူရန်