စစ်ကိုင်းတိုင်း၊ လင်းတလူးကျေးရွာ စစ်ဘေးရှောင်ဘုန်းကြီးကျောင်းကို စစ်ကောင်စီဗုံးကြဲ၍ စစ်ဘေးရှောင် ၃၀ ဦးသေဆုံး၊ အများအပြား ဒဏ်ရာရ
လူထက်နိုင်၊ နိရဉ္ဇရာ၊ ဇူလိုင် ၁၁/၂၀၂၅
စစ်ကိုင်းတိုင်း၊ စစ်ကိုင်းမြို့နယ်၊ လင်းတလူးကျေးရွာတွင် စစ်ဘေးရှောင်များနေထိုင်ရာ ဘုန်းကြီးကျောင်းကို စစ်ကောင်စီတပ်က လေကြောင်းမှ ဗုံးကြဲချခဲ့ရာ စစ်ဘေးရှောင်ပြည်သူ ၃၀ ဦးသေဆုံးပြီး အများအပြား ဒဏ်ရာရသွားခဲ့ကြောင်း ဒေသခံသတင်းရင်းမြစ်အချို့ထံမှ သိရသည်။
အဆိုပါလင်းတလူးကျေးရွာဘုန်းကြီးကျောင်းကို ယနေ့ ဇူလိုင်လ ၁၁ ရက်နေ့၊ ညဉ့် ၁ နာရီခန့်တွင် စစ်ကောင်စီတပ်က ဂျက်တိုက်လေယာဉ်ဖြင့် နှစ်ကြိမ်တိုင် ဗုံးကြဲချခဲ့ခြင်းဖြစ်ပြီး ဒဏ်ရာရသူလည်းများပြားသောကြောင့် သေဆုံးသူအရေအတွက်တိုးလာနိုင်ကြောင်း သိရှိရသည်။
ဒေသခံစစ်ရေးသတင်းအရင်းအမြစ်တစ်ဦးက“ဗုံးကြဲခံရလို့သေဆုံးတဲ့အထဲမှာ ကလေးငယ်တွေအပါအဝင် သလို လူကြီးတွေလည်းပါတယ်။ ကင်းထောက်လေယာဉ် စစ်ကိုင်းမြို့နယ်ကို ပျံဝဲခဲ့နေတာ ဒီကနေ့ ဗုံးကြဲခဲ့တယ်။ တော်တော်ရက်စက်တဲ့သူတွေ။ စစ်ရှောင်တွေမှာ ဘာအပြစ်မှမရှိဘူး” ဟုပြောသည်။
လက်ရှိတွင် လေကြောင်းတိုက်ခိုက်ခံရသော ဘုန်းကြီးကျောင်းကို ကယ်ဆယ်ရေးလုပ်ဆောင်နေပြီး ဒဏ်ရရာသူများအား ဆေးကုသရန်ခက်ခဲနေကြောင်း သိရသည်။
ဒဏ်ရာရရှိသူများကို ဆေးဝါးကုသမှုတချို့လုပ်ဆောင်ပေးနေသော်လည်း ဆေးဝါးနှင့် ကျန်းမာရေးစောင့်ရှောက်မှုပေးနိုင်သော ဆရာဝန်၊ သူနာပြု လိုအပ်ချက်ကြီးမားနေကြောင်းလည်း ဒေသခံများထံမှ သိရသည်။
ထို့အပြင် စစ်ကောင်စီ၏ နောက်ထပ် လေကြောင်းမှ ဗုံးထပ်ကြဲမည့်အန္တရာယ်ကို ဒေသခံများ စိုးရိမ်နေကြရကြောင်း သိရသည်။
ပုံစာ-လင်းတကူးရွာ စစ်ကောင်စီလေကြောင်းတိုက်ခိုက်၍ ပျက်စီးမှုများကို တွေ့ရစဉ်။ ဓာတ်ပုံ - Nay P Latt
---
ကျနော်တို့မီဒီယာဆက်လက်ရှင်သန်ရပ်တည်နိုင်ရေးအတွက် လူကြီးမင်းတို့ရဲ့ အားပေးမှုနဲ့ အကူအညီတွေကို အထူးလိုအပ်နေပါတယ်။ ဒီလင့် https://donorbox.org/narinjara-news ကနေတဆင့် ကူညီနိုင်ပါတယ်။ လူကြီးမင်းတို့ရဲ့ ကူညီထောက်ပံ့မှုအတွက် ကျေးဇူးအထူးတင်ပါတယ်။
လှူရန်