သဇင်မြိုင်နယ်ခြားစောင့်စခန်းမှ ဖမ်းဆီးခေါ်ဆောင်ခံရသူအမျိုးသမီးနှစ်ဦးနှင့် ကလေးငယ်တစ်ဦးတို့ကို စေတီပြင်ရဲစခန်းတွင်အပ်နှံ


နိရဥ္စရာ၊ မေလ ၃ဝ/ ၂ဝ၂ဝ

သဇင်မြိုင်နယ်ခြားရဲစခန်းမှ AA မှ ဖမ်းဆီးခေါ်ဆောင်သွားသည့် အမျိုးသမီးနှစ်ဦးနှင့် ၄ နှစ်အရွယ် မိန်းခလေးငယ်တစ်ဦးတို့ကို ရသေ့တောင်မြို့နယ်၊ အောက်ကျောင်းတောင်ကျေးရွာ ရပ်မိရပ်ဖများက ယနေ့နံနက် ၈ နာရီအချိန်တွင် စေတီပြင်နယ်ခြားစောင့်စခန်းတွင် အပ်နှံခဲ့သည်ဟုသတင်းရရှိသည်။

၎င်းအမျိုးသမီးများမှာ ဒေါ်ရွှေဇင်(၂၆) နှစ်၊ သူမ၏ သမီးဖြစ်သူ ဂျူးသက်ကလျာအောင် (၄) နှစ်နှင့် ဒေါ်မိစောစန္ဒာ(၃၂)နှစ်တို့ ဖြစ်ကြပြီး ၎င်းတို့၏ ဇာတိမှာ မန္တလေးတိုင်းဖြစ်ကြောင်း ၎င်းကျေးရွာ၏ စာရေးက ပြောကြားသည်။

“ ဒီနေ့မနက် ၈ နာရီလောက်က ရပ်မိရပ်ဖတွေနဲ့ သွားရောက်ပြီး အပ်နှံခဲ့ပါတယ်။ သူတို့ကို မနေ့က ညနေ ၅ နာရီလောက်မှာ ကျွန်တော်တို့ ရွာကို ရောက်လာပါတယ်။ ရွာမှာ အေအေတပ်ဖွဲ့က လာအပ်ပါတယ်။ ကျွန်တော်တို့ ရွာသားတွေကလည်း သူတို့ကို ကောင်းမွန်စွာ စောင့်ရှောက်ကျွေးမွေးပြီး ဒီကနေ့ မနက် ၈ နာရီခန့်မှာ စေတီပြင် နယ်ခြားစောင့် စခန်းကို သွားရောက်အပ်နှံခဲ့တာ ဖြစ်ပါတယ်” ဟု ၎င်းက ပြောကြားသည်။

ဒေါ်ရွှေဇင်၏ ယောက်ျားဖြစ်သူတပ်သားအောင်ကိုမင်းနှင့် ဒေါ်မိစောစန္ဒာ၏ ယောကျ်ားဖြစ်သူ တပ်သား ညီညီလွှင်တို့မှာ AA က ဆက်လက်ဖမ်းဆီးထားဆဲဟု သိရကြောင်း ပြောကြားသည်။

အောက်ကျောင်းတောင်ကျေးရွာ အုပ်ချုပ်ရေးမှူးကလည်း နယ်ခြားစောင့်တပ်ဖွဲ့ဝင်နှစ်ဦး၏ ဇနီးနှစ်ဦးနှင့် သမီးတစ်ဦးတို့ကို စေတီပြင် နယ်ခြားစောင့်ရဲစခန်းတွင် အပ်နှံလိုက်ကြောင်းကို အတည်ပြု ပြောကြားသည်။ 

၎င်းအမျိုးသမီးတို့သည် သဇင်မြိုင်နယ်ခြားစောင့်ကင်းစခန်းကို မေလ ၂၉ ရက် နံနက် ၃ နာရီက AA တပ်ဖွဲ့မှ ဝင်ရောက်တိုက်ခိုက်စဉ် တစ်ခြားရဲတပ်ဖွဲ့ဝင် ၆ ဦးနှင့် အတူ ဖမ်းဆီးခံခဲ့ကြရသူများ ဖြစ်ကြသည်။ 


Share: