ထွန်းခိုင် (တောင်ရင်းကျွန်း)

နိရဥ္စရာ၊ မေ ၃ဝ / ၂ဝ၂ဝ

ချင်းပြည်နယ်၊ ပလက်ဝမြို့နယ်၊ မီးလက်ဝ (အောက်ရွာ) ကျေးရွာတွင် မနက် ၈ နာရီအချိန်တွင်  ရွာထဲသို့ ထင်းယူရန်သွားသော အမျိုးသမီးသမီးတစ်ဦးမှာ ဝမ်းဗိုက်တွင် သေနတ်ကျည်ဆံကျမှန်၍ သေဆုံးသွားသည်ဟု ဒေသခံများက နိရဥ္စရာ သတင်းဌာနသို့ ပြောသည်။

သေဆုံးသွားသောအမျိုးသမီးမှာ မီးလက်ဝ (အောက်ရွာ) ခမီကျေးရွာမှ ဒေါ် ဟွေ့ခင်း အသက် (၆၇) နှစ်ဖြစ်ကြောင်း သိရှိရသည်။

မီးလက်ဝအောက်ရွာကျေးရွာမှ ကိုရွှေကျော်က “ သူတို့က မနက် ၈ နာရီကျော်လောက်က ပလက်ဝ ဒုက္ခသည်စခန်းက နေပြီးတော့ ရွာထဲကို ထင်းယူဖို့ဆိုပြီး လူ ၅ ယောက်လောက်က လှေနဲ့ထွက်သွားတယ်။ ထင်းယူလို့ပြန်လာတဲ့အချိန် ဒီဖက် ပလက်ဝကမ်းနားကို မရောက်မီမှာ ရွာတောင်တွင်ရှိသော တောင်တန်းက နေပြီးတော့ လှမ်းပစ်လို့ သူဝမ်းဗိုက်ထဲမှာ ဒဏ်ရာရသွားတယ်။ အခုတော့ သူဆုံးသွားပါပြီ။ သူကိုအခု ပလက်ဝဆေးရုံ ရင်ခွဲရုံကို ပို့ထားပါတယ် ”ဟု ပြောသည်။

အဆိုပါကိစ္စနှင့် ပတ်သက်၍ ပလက်ဝအမျိုးသားလွှတ်တော်ကိုယ်စားလှယ် ဆလိုင်းမျိုးထိုက်အား နိရဥ္စရာသတင်းဌာနက ဆက်သွယ်မေးမြန်းခဲ့သော်လည်း ၎င်းအနေဖြင့် အဆိုပါကိစ္စကို မသိရှိရသေးကြောင်း ဖြေကြားသည်။

၎င်းမီးလက်ဝ (အောက်ရွာ) ကျေးရွာတွင် မေလ ၂၆ ရက်နေ့ နေအိမ်အများအပြား မီးလောင်ဆုံးရှုံးခဲ့သဖြင့် ရွာသူ/ ရွာသားများမှာ ကျေးရွာအတွင်း နီးစပ်ရာစစ်ဘေးရှောင်စခန်းများတွင် ခိုလှုံနေထိုင်နေကြကြောင်း သိရှိရသည်။

သေဆုံးသွားသူ ဒေါ်ဟွေ့ခင်းသည် ကျီးလေအုပ်စု၊ မင်းတာကျေးရွာသူ ဖြစ်ကြောင်း၊ လွန်ခဲ့သည့် လက သားသမီးများနေထိုင်ရာ အောက်မီးလက်ဝရွာသို့ အလည်အပတ်လာရောက်သူ ဖြစ်ကြောင်း၊ ပလက်ဝအနီး တဝိုက်တွင် တိုက်ပွဲများ ပြင်းထန်စွာ ဖြစ်ပွားနေသဖြင့်  ဇာတိရွာသို့ မပြန်နိုင်ဘဲ သားသမီးတို့နှင့်အတူ ပလက်ဝ မြို့ပေါ်တွင် တိုက်ပွဲရှောင်အဖြစ် ခိုလှုံနေစဉ် ယခုလိုဝမ်းနည်းဖွယ်ရာ ဖြစ်ရပ်နှင့် ကြုံတွေ့ရခြင်း ဖြစ်ကြောင်း  အောက်မီးလက်ဝရွာသားတစ်ဦးက ပြောသည်။