ဘူးသီးတောင်မြို့နယ်မြောက်ပိုင်း သရဖီ ကျေးရွာအနီး တိုက်ပွဲဖြစ်

ရေးသူ: Web Master
| ရက်စွဲ: ၂၇ ဇူလိုင် ၂၀၂၀
| ကြည့်ရှုသူ: 8.6k

ခိုင်လူလှ (ရိုးမမြေ)

နိရဥ္စရာ၊ ဇူလိုင် ၂၇/၂ဝ၂ဝ

ရခိုင်ပြည်နယ်၊ ဘူးသီးတောင်မြို့နယ်၊ သရဖီ ကျေးရွာအနီးတွင် ယနေ့ နံနက်က ၉ နာရီမှ စတင်ပြီး ယနေ့ ညနေပိုင်းထိ မြန်မာတပ်မတော်နှင့် AA တို့ အကြားတိုက်ပွဲဖြစ်ပွားနေသည်ဟု သတင်းရရှိသည်။

သရဖီကျေးရွာ အရပ်လူကြီးတစ်ဦးက “ ရွာအနီးက တောင်ချိုင်မှာ ဖြစ်နေကြပါတယ်။ မနက် ၉ နာရီကနေ ပစ်နေကြတာ အခုညနေထိ ကြားနေရပါတယ်။ လက်နက်ကြီး လက်နက်သံရော အစုံကြားနေရပါတယ်” ဟု ယနေ့ ညနေ ၆ နာရီကဆက်သွယ်စဉ် ပြောကြားသည်။

သရဖီကျေးရွာတွင် အိမ်ခြေ ၁ဝဝ ခန့်ရှိပြီး ရခိုင်၊ ခမီး၊ မြိုတိုင်းရင်းသားများ နေထိုင်ကြကြောင်း၊ ရွာအနောက်ဘက် မနီးမဝေးတွင် ခမရ ၅၅၂ တပ်ရင်းရှိကြောင်း၎င်းက ပြောကြားသည်။

“ အခုက ရွာသားတွေက ရွာကို စွန့်ခွာထွက်ပြေးတာတော့ မရှိဘူး။ ဒါပေမယ် တစ်ရွာလုံး ဘုန်းကြီးကျောင်းမှာ စုနေကြတယ်။ ဒီမှာဘဲ စုပြီး အိပ်ကြမယ်။ ဘယ်လိုလုပ်မလဲ။ ရွာနဲ့ မနီးမဝေးမှာ တိုက်ပွဲ ဖြစ်တော့ အကုန်လုံးကြောက်နေကြတယ်။ ဦးလေး ဗိုက်အောင့်ပြီး အိပ်ရာထဲမှာ လဲနေရတယ်။ အခု အိပ်ရာထဲက ပြောနေရတာပါ” ဟု ပြောကြားသည်။

တိုက်ပွဲမည်သို့ မည်ပုံ ဖြစ်ပွားသည်ကို မသိရှိကြောင်း၊ ယခုတိုက်ပွဲဖြစ်ပွားသည့် နေရာတောင်ချိုင်မှာ ရွာ၏ အရှေ့ဘက်တွင် တည်ရှိပြီး တောင်တန်းပေါ်မှ စစ်တပ်မှ တောင်ချိုင်ကြားထဲကို ပစ်ခတ်နေသည်ကို မြင်ရကြောင်း ၎င်းက ပြောဆိုသည်။

ရခိုင်ပြည်နယ် အမျိုးသားလွှတ်တော်ကိုယ်စားလှယ် ဦးမောင်ကျော်ဇံသို့ ဆက်သွယ်ရာ တောင်ဘဇားနှင့် ဘူးသီးတောင်အကြား သရဂူဘက်တွင် တိုက်ပွဲ ဖြစ်ပွားနေသည်ဟု ရွာသားများ ဖုန်းဆက်လာ၍ သိရကြောင်း၊ နောက်ပြန်ဆက်ရာတွင် ရွာသားများ ဖုန်းပိတ်ထားကြကြောင်း ၎င်းက ပြောကြားသည်။