ခိုင်လူလှ (ရိုးမမြေ)
ဩဂုတ်၃/၂၀၂၀

ရခိုင်ပြည်နယ်၊ တောင်ကုတ်မြို့တွင် မိုးသည်းထန်စွာရွာသွန်းသဖြင့် မြေနိမ့်ပိုင်းရှိ လမ်းအချို့ ရေနစ်မြုပ်မှုဖြစ်ပွားခဲ့သော်လည်း နေ့လယ်ပိုင်းတွင် ရေပြန်ကျသွားပြီဟု သိရသည်။

ရေနစ်မြုပ်ခဲ့သည့်လမ်းမှာ ဆေးရုံကွပ်သစ် (၇)လမ်းဖြစ်ပြီး အသွားအလာလုပ်သူများကို အသက်ကယ်လှေငယ်များဖြင့် ပို့ဆောင်ခဲ့ရသည်ဟု ဆိုသည်။

စာရေးဆရာရက္ခက “ မနက်ကတော့ ရေအတော်လေးတက်ခဲ့ပါတယ်။ ညဉ့်မိုးရွာတာများတော့ မနက်က မြေနိမ့်ပိုင်းက လမ်းအချို့ရေနစ်ခဲ့ပါတယ်။ ကျွန်တော်သွားကြည့်တော့ ကွပ်သစ်ခုနှစ်လမ်းကို ရေနစ်နေတာကို တွေ့ရပါတယ်။ ဒါပေမယ့် နေ့လယ်ပိုင်းဆို ပြန်ကျသွားပါတယ်” ဟု ပြောကြားသည်။

ဒေသခံ တစ်ဦး၏ ပို့စ်တွင် ကုတင် (၁၀၀) ဆေးရုံသို့ သွားရာလမ်းကို ရေ ၆ ပေထိ တက်ခဲ့ပြီး လမ်းသွားလမ်းလာများကို ဂူတာပြင်အုပ်ချုပ်ရေးမှူးရုံးမှ လှေငယ်များဖြင့် သွားလာရေး အဆင်ပြေအောင် ကူညီခဲ့ရသည်ဟု ဖော်ပြသည်။

ယခုရေကြီးမှုမှာ မိုးများ၍ ရေကြီးခြင်းဖြစ်ပြီး စိုးရိမ်စရာမရှိကြောင်း ကိုရက္ခက ပြောဆိုသည်။

တောင်ကုတ်မြို့သည် လူနေထူထပ်လာပြီး သစ်တောများ ပြုန်းတီးမှု၊ ချောင်းများတိမ်ကောလာမှုတို့ကြောင့် ယခုနှစ်ပိုင်းအတွင်း မိုးရာသီရောက်တိုင်း ချောင်းရေကြီးမှုကို ခံစားနေရသော မြို့ဖြစ်သည်ဟု သိရသည်။

(Photo by Matthew Kogyi)