ခိုင်လူလှ(ရိုးမမြေ)

နိရဥ္စရာ၊ သြဂုတ် ၄/၂ဝ၂ဝ

ရခိုင်ပြည်နယ်၊ အမ်းမြို့နယ်၊ ကဇူးကိုင်းမှ ချင်းတိုင်းရင်းသူ မဝသုန် (၁၇) နှစ်သည် သြဂုတ် ၃ ရက်နေ့က မိုင်းနင်းမိပြီး ခြေထောက်ပြတ်ကာ သေဆုံးသွားကြောင်း သတင်းရရှိသည်။ 

သူမအား အမ်းစစ်ဆေးရုံသို့ ယူဆောင်လာရာ လမ်းတွင် သေဆုံးသွားသည်ဟု ပြောကြားသည်။ 

အမ်းမြို့မှ လူမှုရေးတက်ကြွလူပ်ရှားသူတစ်ဦးဖြစ်သည့် ဦးမျိုးလွင်က “ သူတို့ မိသားစုက လက်ရှိ ကဇူကိုင်းရွာမှာ နေပါတယ်။ အဲဒီမိန်းခလေးက ကဇူကိုင်းရွာကနေ အရှေ့ဘက် ဒလက်ဘက်ကို သွားတဲ့ လမ်းပေါ်မှာ စစ်တပ် စစ်ဆေးရေးဂိတ်ရှိပါတယ်။ အဲဒီအနီးဝန်းကျင်ကိုသွားရာကနေ မိုင်းပေါက်တယ်လို့ ပြောပါတယ်။ အဲဒီကလေးမလေးက အိ်မ်ထောင်မရှိ အပျို၊ ချင်းတိုင်းရင်းသူပါ။ စိတ်ကတော့ သိပ်မမှန်ဘူးလို့ ဒေသခံတွေက ပြောကြပါတယ်။ စိတ်ထင်ရာ လျှောက်သွားနေတတ်တယ်လို့ ပြောကြပါတယ် ” ဟု သူက ပြောသည်။  

သူမအားစစ်တပ်က စီစဉ်ပေးသည့် ကားဖြင့် အမ်းမြို့ စစ်ဆေးရုံသို့ ယူဆောင်ရာ လမ်းတွင် သေသွားသဖြင့် အမ်းမြို့နယ်ဆေးရုံသို့ ဆက်လက်ယူဆောင်ပြီး အလောင်းကို အမ်းဆေးရုံတွင် ထားရှိသည်ဟု ၎င်းက ပြောကြားသည်။

မဝသုန်တို့ မိသားစုမှာ အမ်းတောင်အုပ်စု ဆင်ခုံတိုင်ရွာဇာတိဖြစ်ပြီး ကဇူကိုင်းကျေးရွာသို့ ပြောင်းရွှေ့လာသည်မှာ (၅) နှစ် ဝန်းကျင်ရှိနေကာ သူမ၏ ဖခင်ဖြစ်သူမှာ ဦးတင်အေးမှာ ကြက်မွေးမြူရေး လုပ်ငန်း လုပ်ကိုင်သည်ဟု သိရသည်။ 

ကူဇူးကိုင်းကျေးရွာ အုပ်ချုပ်ရေးမှူး ဦးခင်သန်းမောင်သို့ ဆက်သွယ်ရာ ဖုန်းပိတ်ထားသဖြင့် ဆက်သွယ် မေးမြန်းနိုင်ခြင်း မရှိပါ။