ကြာသပတေး၊ မတ်လ ၂၈ရက်၊ ၂၀၂၄

ရခိုင်က နာမည်ကြီးဘုရားများတွင် ဘုရားဖူးသူများဖြင့် စည်ကား


  • ရေးသူ: Web Master
  • | ရက်စွဲ: ၂၈ နိုဝင်ဘာ ၂၀၂၀
  • | ကြည့်ရှုသူ: 7.9k

ဆောင်းဇာခြည်
နိရဥ္စရာ၊ နိုဝင်ဘာ ၂၈/ ၂ဝ၂ဝ

ရခိုင်ပြည်နယ်မှ အထင်ကရ နာမည်ကြီးဘုရားများတွင် ယခုရက်ပိုင်းအတွင်း ဘုရားဖူးလာသူများဖြင့် အထူးစည်ကားနေသည်ဟု သတင်းရရှိသည်။

ပုဏ္ဏားကျွန်းမြို့နယ်ရှိ ဂူဝဘုရား၊ ဦးရာဇ်တော်ဓါတ်စေတီတော်၊ ကျောက်တော်မြို့နယ် မဟာမုနိဘုရားနှင့် မြောက်ဦးမြို့ရှိ သမိုင်းဝင် ဘုရားများသို့ သွားရောက် ဘုရားဖူးလည်ပတ်သူများ စည်ကားနေကြောင်း ဒေသခံများ၏ ပြောကြားချက်အရ သိရသည်။

ကျောက်တော်မြို့နယ် မဟာမုနိဂေါပကအဖွဲ့မှ ဦးမောင်သာစံက  “ဘုရားဖူးသူက ဒီနေ့  မဟာမုနိကို ၅ဝဝ ပတ်ဝန်းကျင်လောက် ရောက်ပါတယ်။ မြောက်ဦး၊ စစ်တွေ၊ မင်းပြား အဲဒီနယ်ဘက်တွေက လာကြတယ်။ အများအားဖြင့် နယ်ကလူတွေ လာကြတာ။ ဘုရားဖူးသက်သက်လာကြတာပေါ့။ အရင်တုန်းကဆိုရင် သွားလာဖို့ လမ်းက မလုံခြုံဘူး။ အခုဆိုရင် သွား/လာဖို့အတွက် နည်းနည်း အဆင်ပြေနေပြီမို့ ပြန်ပြီးလူတွေ စည်ကားနေပါပြီ။ မနက်ဖြန် လပြည့်နေ့ဆိုရင် ပိုပြီး လာကြမှာပါ။” ဟု နိရဥ္စရာသို့ ပြောသည်။

အထင်ကရ နေရာများသို့ ဘုရားဖူးလည်ပတ်ရန် ရောက်ရှိနေသည့် စစ်တွေမြို့မှ ဝါရင့်စာရေးဆရာ ကျွန်းသားငမန်းက ယခုရက်ပိုင်းအတွင်း ရက္ခိုင့်တပ်တော် (AA) နှင့် မြန်မာ့တပ်မတော်တို့ နှစ်ဘက် တိုက်ပွဲများ ရပ်စဲနေသည့်ကာလဖြစ်သည့်အတွက် လမ်းခရီး၌ လုံခြုံရေးစိတ်ချရသည့် အခြေနေဖြစ်သောကြောင့် ဘုရားဖူးလည်ပတ်သူ စည်ကားနေခြင်းဖြစ်ကြောင်း ပြောသည်။

“လူတွေက အိမ်မှာနေရတာ မွမ်းကျပ်မှုရှိလာတယ်။ ကိုဗစ်ကိုလည်း သိပ်အလေးထားတဲ့ ပုံစံမျိုးတော့ မရှိတော့ဘူး။ ကိုဗစ်ကိုထက် နယ်မြေတည်ငြိမ်မှု၊ အေအေနဲ့ နှစ်ဘက်တိုက်ပွဲကို ကြောက်ကြတယ်ပေါ့။ အခုက တိုက်ပွဲရပ်နေတဲ့အတွက် လမ်းခရီးမှာ လုံခြုံရေးအရ စိတ်ချရတဲ့အနေထားမှာ ရှိနေတော့ လူတွေက သွား လာကြတော့တာပေါ့။ အရင်တုန်းက ဘုရားဖူး မသွားရတာကလည်း လုံခြုံရေးအရပေါ့။ အခုက လုံခြုံရေး ကောင်းမွန်လာတော့ ဘုရားဖူးသူတွေများလာတာပေါ့” ဟု နိရဥ္စရာသို့ ပြောသည်။

အထင်ကရနေရာများတွင် လက်ရှိ ဘုရားဖူးလည်ပတ်သူများဖြင့်စည်ကားနေပြီး တစ်နေ့ တစ်နေ့ကို လူပေါင်း ၃ဝဝ နှင့် ကား အစီးရေ ၃ဝ လောက် စစ်တွေမြို့မှ ဘုရားဖူးသွားနေကြကြောင်း သူက ဆက်ပြောသည်။

“မြောက်ဦးက ဒေသခံတွေလည်း မဟာမုနိကို ရောက်တယ်။ မဟာမုနိတို့ဘက်ကိုလာတဲ့သူတွေလည်း မြောက်ဦးဘက်ကိုသွားကြတယ်။ ပုဏ္ဏားကျွန်း ဂူဝဘုရားတို့မှာလည်း အပြန်ကျရင် ဘုရားဝင်ဖူးကြတယ်ပေါ့။ အခုက ကထိန်ကပ်တဲ့ ရာသီဆိုတော့ စစ်တွေကလူတွေက ကထိန်ဆိုလည်း အများကြီးလာကပ်ကြတယ်” ဟု ဆက်ပြောသည်။

ယခုအချိန်သည် ရခိုင်ဒေသတွင် ဘုရားဖူးထွက်သော အချိန်ကာလဖြစ်ပြီး တိုင်းပြည်အေးချမ်းချိန် ယခင်နှစ်များက ရခိုင်ပြည်နယ်ရှိ နေရာအနှံ့မှ ဘုရားဖူးလည်ပတ်သူမှာ တစ်နေ့ တစ်နေ့ သောင်းချီရှိသည်ဟု သိရသည်။

ဆက်စပ် သတင်းများ