ကြာသပတေး၊ ဇွန်လ ၂၀ရက်၊ ၂၀၂၄

ICRC ရိက္ခာများတင်ဆောင်လာသည့်ကုန်တင်စက်လှေ ရေတပ်ကခွင့်မပြု၍ ရသေ့တောင်အနီးမှစစ်တွေသို့လှည့်ပြန်ခဲ့ရဟုဆို


  • ရေးသူ: Web Master
  • | ရက်စွဲ: ၂၃ ဒီဇင်ဘာ ၂၀၂၀
  • | ကြည့်ရှုသူ: 2k

ခိုင်လူလှ (ရိုးမမြေ)
နိရဥ္စရာ၊ ဒီဇင်ဘာ၂၃/၂ဝ၂ဝ

ယနေ့နံနက်က ရသေ့တောင်မြို့နယ် မြောက်ပိုင်းမှ ကျေးရွာ (၈) ရွာသို့ အပြည်ပြည်ဆိုင်ရာကြက်ခြေနီ ကော်မတီ (ICRC) မှ ထောက်ပံ့သည့်  ရိက္ခာများကို တင်ဆောင်လာသည့် အငှားကုန်တင် စက်လှေကို မေယုမြစ်ထဲရှိရေတပ်မှ သွားခွင့်မပြုသဖြင့် စစ်တွေသို့ ပြန်လှည့်လာခဲ့ရသည်ဟု သတင်းရရှိသည်။

အဆိုပါ ကိစ္စနှင့်ပတ်သက်ပြီး ရသေ့တောင်မြို့နယ်၊ အုတ်ဖော်(အိုးဖောက်) အုပ်ချုပ်ရေးမှူးသို့ ဆက်သွယ်ရာ ၎င်း ICRC မှ ကုန်ပစ္စည်းတင်လာသော စက်လှေကို ရေတပ်စစ်ရေယာဉ် (ဇက်)မှ သွားလာခွင့်မပြု၍ ပြန်လှည့်သွားရသည်ဟု ကြားသိရကြောင်း ပြောကြားသည်။

“ ဒီနေ့ ရိက္ခာတွေ ရောက်မယ်လို့ ICRC က နယ်တာဝန်ရှိသူတွေက အကြောင်းကြားထားတဲ့ အတွက် စောင့်နေပါတယ်။ အခုကြားတာက ဇက်ရေယာဉ်က သွားခွင့်မပြုလို့ မလာရဘူးလို့ ကြားပါတယ်။ ရသေ့တောင်အနီးက မြစ်ထဲမှာရှိနေတဲ့ ရေတပ်ဇက်ရေယာဉ်က သွားခွင့်မပြုလို့ကြားရပါတယ်” ဟု အုပ်ချုပ်ရေးမှူးက ပြောဆိုသည်။

ယခုရိက္ခာများမှာ အောက်တိုဘာလအတွင်းက ဖြစ်ပွားခဲ့သည့် ဘုတ်သမား တစ်ဦးသေဆုံးပြီး နှစ်ဦးဒဏ်ရာ ရရှိခဲ့သည့် ICRC စက်လှေမီးလောင်ခဲ့သည့် ဖြစ်စဉ် ဖြစ်ပွားပြီးနောက် ပထမဆုံး အကြိမ် ရိက္ခာများပြန်လည် ပို့ဆောင်သည့် စက်လှေဟု သိရသည်။

၎င်းရိက္ခာများမှာ စစ်ဘေးရှောင်များအတွက် မဟုတ်ဘဲ ၂ဝ၁၈ ခုနှစ်ကပင် စားရေးသောက်ရေး အခက်အခဲရှိနေကြသည့် ရခိုင်နှင့် မူဆလင် ကျေးရွာ (၈) ရွာဖြစ်ကြသည့် အုတ်ဖော်၊ ရွာသစ်၊ ရွာဟောင်း၊ ကန်ဆိပ်၊ အာကာတောင်၊ ရက္ခူဒိုင်၊ ဆင်ခုံးတိုင်နှင့် လွန်းတောင်ကျေးရွာများအတွက် ထောက်ပံ့သည့် ရိက္ခာများဟု သိရသည်။

ရသေ့တောင်မြို့နယ် ပြည်သူ့လွှတ်တော်ကိုယ်စားလှယ် ဒေါ်ခင်စောဝေက “ အခု ဒေသခံတွေ သတင်းပို့တာက သွားခွင့်မပေးတဲ့အတွက် အဲဒီ ICRC ရိက္ခာတွေကို တင်လာတဲ့ စက်လှေက နေ့ခင်းကတည်းက စစ်တွေကို ပြန်ရောက်သွားပြီလို့သိရတယ်။ ရသေ့တောင်အလွန် မေယုမြစ်ထဲမှာရှိတဲ့ စစ်ရေယာဉ်က ဖြတ်ခွင့် မပေးဘူးလို့ သိရပါတယ်” ဟု ပြောကြားသည်။

၎င်းစက်လှေတွင် ရခိုင်ပြည်နယ် နယ်လုံဝန်ကြီးထောက်ခံချက်၊ သက်ဆိုင်ရာ ပြည်နယ်၊ ခရိုင်၊ မြို့နယ်အဆင့် တာဝန်ရှိသူတွေရဲ့ ထောက်ခံချက်များ ပါသည်ဟု သိရှိရကြောင်း၊ မည်သည့်အတွက် ခွင့်မပြုသည်ကို တိတိကျကျ မသိရှိရသေးကြောင်း ၎င်းက ပြောကြားသည်။

အဆိုပါ စက်လှေသည် ယမန်နေ့ ဒီဇင်ဘာ ၂၂ ရက်နေ့က စစ်တွေမှ ထွက်ခွာလာပြီး ရသေ့တောင် ဆိပ်ကမ်းတွင် ညအိပ်ရပ်နားက ယနေ့နံနက် ၇ နာရီခန့်က အဆိုပါ ကျေးရွာများသို ရိက္ခာပို့ဆောင်ရန် မေယုမြစ်အတိုင်း ထွက်ခွာလာစဉ် ရသေ့တောင်မြို့အလွန်တွင် စစ်ရေယာဉ်က တားပြီး သွားလာခွင့် မပြုဟု သိရသည်။

အဆိုပါ ကိစ္စနှင့် ပတ်သက်ပြီး ရခိုင်ပြည်နယ် လုံခြုံရေးနှင့် နယ်စပ်ရေးရာ ဝန်ကြီး ဗိုလ်မှူးကြီးမင်းသန်းသို့ ယနေ့ ညနေပိုင်းက ဖုန်းဖြင့်ဆက်သွယ်ရာ လက်ခံဖြေဆိုခြင်း မရှိပါ။

ICRC စစ်တွေရုံးသို့ ဆက်သွယ်ရာတွင်လည်း ဖုန်းလက်ခံ ဖြေဆိုခြင်း မရှိသေးပါ။

ယခုအခါ ၎င်းရိက္ခာပို့ဆောင်သည့် စက်လှေမှာ စစ်တွေဆိပ်ကမ်းသို့ ပြန်လည် ရောက်ရှိနေပြီဟု သတင်း ရရှိသည်။

ယခုနှစ် အောက်တိုဘာ ၂၈ ရက်ကလည်း ရသေ့တောင်မြို့နယ်အတွင်း မေယုမြစ်ထဲမှာ အပြည်ပြည်ဆိုင်ရာ ကြက်ခြေနီကော်မတီ (ICRC) ရိက္ခာတွေ တင်ဆောင်လာတဲ့ စက်လှေတစ်စီး ပစ်ခတ်ခံရသည့် အတွက် အရပ်သားတစ်ဦး သေဆုံးပြီး၊ နှစ်ဦး အပြင်းအထန် ဒဏ်ရာ ရခဲ့ကာ စက်လှေမှာ မီးလောင်သွားခဲ့သည်။

သေဆုံးသူမှာ အသက် ၂ဝ အရွယ် ကိုမောင်ချေဖြစ်ပြီး၊ ဒဏ်ရာရသူ နှစ်ဦးမှာ အသက် ၃၄ နှစ်အရွယ် ဦးမောင်သန်းဝေနှင့် အသက် ၅ဝ အရွယ် ဦးလှဝင်းမောင်တို့ ဖြစ်ကြသည်။

(ဓာတ်ပုံ- ၂ဝ၂ဝ ခုနှစ် အောက်တိုဘာ ၂၈ ရက်နေ့က ICRC ရိက္ခာအငှားတင် စက်လှေ မေယုမြစ်ထဲ တိုက်ခိုက်ခံရပြီးနောက် မီးလောင်နေသည်ကို တွေ့ရစဉ်)

ဆက်စပ် သတင်းများ