ကြာသပတေး၊ မတ်လ ၂၈ရက်၊ ၂၀၂၄

ရဲကဖမ်းပြီး စစ်တပ်ကခေါ်သွား၍ ဦးမင်းအောင်တို့အတွက် စိုးရိမ်ကြောင်း မိသားစုများပြော


  • ရေးသူ: Web Master
  • | ရက်စွဲ: ၂၃ ဖေဖော်ဝါရီ ၂၀၂၁
  • | ကြည့်ရှုသူ: 10.1k

ထွန်းခိုင် (တောင်ရင်းကျွန်း)

ဖေဖော်ဝါရီ ၂ / ၂၀၂၁

NLD ပါတီဝင် တောင်ကုတ်မြို့နယ်မှ လွှတ်တော်ကိုယ်စားလှယ်ဟောင်း ဦးမင်းအောင်နှင့် ကိုသန့်ဇင်းဖြိုးတို့အား ရဲတပ်ဖွဲ့က ဖမ်းဆီးပြီး စစ်တပ်က ခေါ်ဆောင်သွားသည်ဟု သတင်းရသဖြင့် သူတို့အတွက်  စိုးရိမ်ကြောင့်ကြလျက်ရှိကြောင်း မိသားစုဝင်များက ပြောသည်။

ကိုမင်းအောင်၏ ဇနီးဖြစ်သူ မမြဝတ်ရည်က ဖမ်းတာကတော့ ရဲစခန်းက ဖမ်းထားတာပေါ့နော်။ စခန်းကဖမ်းတာကို စစ်တပ်က ခေါ်သွားတယ်ဆိုတော့။ အမှန်မှာ စခန်းကဖမ်းရင် စခန်းက တာဝန်ယူပြီးတော့ စခန်းက တရားစွဲမယ်လို့တော့ ပြောတယ်။ ဘာကိစ္စကြောင့် စစ်တပ်က ခေါ်သွားရတာလဲ။ အဲဒါတွေကို ကျမတို့က မေးခွန်းထုတ်ချင်တယ်။ အခုက သူတို့အတွက် အရမ်းစိုးရိမ်နေရတယ်ဟုပြောသည်။

တပ်မတော်ကအာဏာထိန်းသိမ်းမှုအပေါ် ဖေဖော်ဝါရီလ ၉ ရက်နေ့က တောင်ကုတ်မြို့တွင် ဆန့်ကျင် ဆန္ဒပြခဲ့မှုဖြစ်ပွားခဲ့သည်။ ၎င်းနေ့  ညနေပိုင်းတွင် ကိုမင်းအောင်နှင့် ကိုသန့်ဇင်ဖြိုးတို့ နှစ်ဦးကို ရဲတပ်ဖွဲ့ဝင်များက ဖမ်းဆီး ခေါ်ဆောင်သွားခဲ့သည်ဟု သူမက ဆက်ပြောသည်။

သူတိုကို ဘယ်နေရာမှာ ထိန်းသိမ်းထားတယ်ဆိုတာကိုလည်း မသိရပါဘူး။ ကျမတို့ ရဲစခန်းကိုလည်း လှမ်းမေးတာပေါ့။ ကိုမင်းအောင်တို့ကို ဘယ်နေရာမှာ ထိန်းသိမ်းထားလဲလို့ စစ်တပ်က ခေါ်သွားတယ်လို့ပဲ သိရတယ်။ ဘယ်တပ်က ခေါ်သွားတယ်လို့လည်း သူတို့ မပြောဘူး ဟု ပြောသည်။

သူတို့ကို ဖမ်းဆီးခံရပြီးနောက်ပိုင်း မိသားစုနှင့်လည်း ယခုအချိန်ထိ အဆက်အသွယ်မရသေးကြောင်း ၎င်းက ပြောကြားသည်။

တခြားလူတွေလို အချုပ်ခန်းထဲမှာ ထည့်ထားတယ်ဆိုရင်တော့  အိမ်ကလည်း ပစ္စည်းပစ္စယတွေ သွားပို့လို့ရတယ်။ အခုက ဘယ်နေရာမှာချုပ်ထားမှန်းလည်း မသိဘူး။ ဘယ်ရောက်နေမှန်းလည်း မသိတဲ့အတွက် ကျမတို့လည်း အရမ်းစိတ်ပူရတယ်ဟုပြောသည်။

င်းတို့  နှစ်ဦးအား သဘာဝဘေးအန္တရာယ်ဆိုင်ရာ စီမံခန့်ခွဲမှု ဥပဒေဖြင့် တောင်ကုတ်မြို့မ ရဲစခန်းတွင် အမှုဖွင့်ထားခြင်းမှာလည်း မသေချာကြောင်း မမြဝတ်ရည်က ပြောသည်။

တောင်ကုတ်မြို့နယ် ရဲစခန်းသို့ ဆက်သွယ်ရာ ဖုန်းလက်ခံ ဖြေကြားခြင်း မရှိပါ။

ဆက်စပ် သတင်းများ