ပလက်ဝမြို့တွင် PSI စလောင်းစက်များကို သိမ်းဆည်း


ချစ်အိလှိုင်

နိရဉ္စရာ၊ ဧပြီ ၈/ ၂ဝ၂၁


ချင်းပြည်နယ်၊ ပလက်ဝမြို့ပေါ် ရပ်ကွက် ၃ ခုတွင် PSI စလောင်းစက်များကို ယနေ့ ညနေ ၅ နာရီခန့်ကစတင်၍ သိမ်းဆည်းနေကြောင်း သတင်းရရှိသည်။

ပလက်ဝမြို့ရှိ မြို့မရပ်ကွက်၊ ရွာမရပ်ကွက်နှင့် ရိက္ခာရပ်ကွက်တို့မှ ရပ်ကွက်အုပ်ချုပ်ရေးမှူးများမှ တစ်ဆင့် သိမ်းဆည်းနေကြောင်း၊  ရပ်ကွက်ရာအိမ်မှူးများထံ PSI စလောင်းများကို အပ်နှံကြရန် ရွာဆော်များက  လက်ကိုင်မိုက်ဖြင့် အော်သဖြင့် သွားရောက်အပ်နှံကြရခြင်းဖြစ်ကြောင်း မြို့မရပ်ကွက်မှ ဦးမောင်သန်းက နိရဉ္စရာ သတင်းဌာနသို့ ပြောသည်။

သူတို့တောင်းလို့ သွားပေးရတာ။ အခုပေးနေကြတာပါ။ စလောင်းခွက်ကိုတော့ မယူဘူး။ စက်ကိုသိမ်းဆည်းတာပါ။ ကျွန်တော်တို့ ကတော့ တပ်ကယူခိုင်းတာလို့ ထင်ပါတယ် ။တစ်မြို့လုံး အပ်ရတာပါ။ ဘာလို့သိမ်းတာလည်းတော့ သေချာ မမေးခဲ့ဘူး။ ပေးဆိုရင်သွားပေးကြတာ။ PSI ကို တစ်မြို့လုံးလိုလိုသုံးကြတယ် ဒီမှာကဟုပြောသည်။

 မြို့မရပ်ကွက်အုပ်ချုပ်ရေးမှူး ဦးစံသိန်းကလည်း စက်များကို သိမ်းဆည်းနေခြင်းမှာ ဟုတ်မှန်ကြောင်း ပြောကြားသည်။

မနက်ဖြန် ၁၂ နာရီမှာ စခန်းကို အပ်ရမယ်။ ရပ်ကွက်ရုံး ကနေပြီးတော့ စာရင်းဇယားနဲ့မှတ်ပြီး လက်ခံပြီး ရဲကို စာရင်းနဲ့အပ်ရမှာ။ ပြည်နယ်က ညွှန်ကြားတာလို့ သိရတယ်။  ညွှန်ကြားတာက မြို့နယ်ရုံးကလည်း ပါတယ်။ ရဲလည်းပါတယ်။ ရပ်ကွက်အုပ်ချုပ်ရေးမှူးလည်း  ပါတယ်။ မီးသတ်လည်းပါတယ်။ PSI စက်တလုံးကို အပ်လိုက်ပါလို့ ပြည်သူတွေကို ပြောထားတယ်။ ဘာလုပ်ဖို့လည်း ဆိုတာမသိရဘူ။ ပြန်ရရင်အဆင်ပြေအောင် စာရင်းမှတ်ထားတယ်ဟုပြောသည်။

အဆိုပါကိစ္စနှင့် ပတ်သက်၍ ပလက်ဝမြို့နယ်အုပ်ချုပ်ရေးမှူး ဦးအောင်လောဟာအား မေးမြန်းစုံစမ်းရန် ဆက်သွယ်ရာ ဆက်သွယ်မှုမရရှိခဲ့ပါ။

( ဓာတ်ပုံ- မွန်ပြည်နယ်တွင် သိမ်းဆည်နေသည်ကို တွေ့ရစဉ်/DVB)

 

Share: