(၉)လကြာ ဗွီဒီယိုအွန်လိုင်းဖြင့်စစ်ဆေးခဲ့ရသည့် AA တပ်မှူးချုပ်၏ ညီဖြစ်သူကိုအောင်မြတ်ကျော်အပါအဝင်(၈)ဦးကို ယနေ့တရားရုံးတွင်ရုံးထုတ်စစ်ဆေး

ချစ်အိလှိုင်

နိရဉ္စရာ၊ မေ ၄/ ၂ဝ၂၁

ကိုဗစ်ကြောင့် ၉ လခန့်ကြာ ဗွီဒီယိုအွန်လိုင်းဖြင့် စစ်ဆေးခဲ့သည့် AA တပ်မှူးချုပ် ဗိုလ်ချုပ်ထွန်းမြတ်နိုင်၏ ညီဖြစ်သူ ကိုအောင်မြတ်ကျော်အပါအဝင် (၈) ဦးအမှုကို ယနေ့ နေ့လယ် ရန်ကုန်တိုင်း၊ အနောက်ပိုင်း ခရိုင်တရားရုံးတွင် ရုံးထုတ်စစ်ဆေးခဲ့ကြောင်း သတင်းရရှိသည်။

ယနေ့တွင် ကိုအောင်မြတ်ကျော်အပါအဝင် ကိုမြတ်လင်းဦး၊ ကိုရဲကျော်ထက်၊ မအေးမြတ်မွန်၊ ကိုတင်လှိုင်ဦး၊  ကိုဟိန်းဇော်၊ မောင်ပန်(ခ)ထွန်းအေး နှင့် ရွှေလှိုင်သန်း တို့ကို တရားရုံးသို့ ရုံးထုတ်လာခဲ့ပြီး

တရားလိုပြသက်သေ အမှုစစ်ဒုရဲမှူးဇော်မိုးကို စစ်ဆေးခဲ့ကြောင်း အမှုလိုက်ပါဆောင်ရွက်ပေးသူ တရားလွှတ်တော်ရှေ့နေ ဦးအောင်ကျော်စိန်က နိရဉ္စရာသတင်းဌာနအားပြောသည်။

“ အစီစဉ်က ဗွီဒိုအွန်လိုင်းနဲ့ ရုံးထုတ်မယ်ဆိုပြီး တရားရုံးကို ရောက်တဲ့အခါ တရားခံရုံးထုတ်တယ်။ ကိုအောင်မြတ်ကျော်အပါအဝင်သူတို့အားလုံးကိုပေါ့။” ဟုပြောသည်။

ဆက်လက်စစ်ဆေးရန် ဒုရဲမှူး မင်းမင်းသူ တစ်ဦးတည်းသာ ကျန်ရှိပြီး သူ့ကို စစ်ဆေးပြီးပါက တရားလိုပြသက်သေများ စစ်ဆေးရန်မကျန်ရှိတော့ကြောင်း ၄င်းက ဆက်ပြောသည်။

“မေလ ၁၁ ရက်နေ့မှာ နည်းပညာကျွမ်းကျင်သူ ဒုရဲမှူး မင်းမင်းသူကို ဆက်စစ်ဆေးမယ်။ ကိုအောင်မြတ်ကျော် တို့ကတော့ သူတို့အမှုကို အပတ်တိုင်းစစ်ပေးစေချင်တယ်လို့ဆိုတယ်။လက်ရှိ စစ်ဆေးဖို့ ကျန်နေတဲ့ ဒုရဲမှူး မင်းမင်းသူကို စစ်ဆေးပြီးရင် တရားလိုတွေဘက်က စစ်ဆေးစရာမရှိတော့ဘူး” ဟု ဆိုသည်။

ကိုအောင်မြတ်ကျော်အပါအဝင် (၈) ဦးမှာ  စင်္ကာပူရခိုင်အသင်းခေါင်းဆောင်များဖြစ်ပြီး ၂ဝ၁၉ ဇူလိုင်လ ၆ ရက်နှင့် ၇ ရက်နေ့ညတွင် စင်ကာပူပြည်ထဲရေးဌာနက ဖမ်းဆီးခဲ့သည်။

ယင်းနောက်  မြန်မာနိုင်ငံသို့  ပြည်နှင်ဒဏ်ခံရပြီး ဇူလိုင်လ ၁ဝ ရက် ၁၁ ရက်နေ့တွင် မြန်မာနိုင်ငံသို့ ရောက်ရှိလာစဉ် ရဲတပ်ဖွဲ့၏ ဖမ်းဆီးခံခဲ့ရခြင်းဖြစ်ကြောင်း သိရသည်။

၄င်းနောက် ၂ဝ၂ဝ ခုနစ်စက်တင်ဘာလခန့်မှစ၍ ရုံးထုတ်စစ်ဆေးခြင်းမရှိပဲ ဗွီဒီယိုအွန်လိုင်းမှ တဆင့် စစ်ဆေးခဲ့ခြင်းဖြစ်ကြောင်း ရှေ့နေဖြစ်သူ ပြောပြချက်အရ သိရသည်။

၄င်းတို့မှာ အကြမ်းဖက်မှုတိုက်ဖျက်ရေး ပုဒ်မ ၅ဝ(ည)နှင့် ပုဒ်မ ၅၂ (က)တို့ဖြင့် အသီးသီးအမှု ရင်ဆိုင်နေကြရခြင်းဖြစ်သည်။

AA ကို အကြမ်းဖက်အဖွဲ့မှ ရုပ်သိမ်းလိုက်ပြီးသော်လည်း ၄င်းနှင့်ပတ်သက်၍ အကြမ်းဖက်မှုတိုက်ဖျက်ရေး ပုဒ်မများဖြင့် တရားစွဲဆိုခံနေရသူ ၂ဝဝ နီးပါးအထိရှိနေဆဲဖြစ်ကြောင်း အမှုလိုက်ရှေ့နေများက ပြောသည်။