သျှင်မင်းဇံ၊အောင်လင်းထွန်း

စစ်တွေ၊ဇွန် ၉ / ၂၀၂၁

ယခုလွတ်မြောက်လာခြင်းမှာအကောင်းဆုံးအဖြေတစ်ခုမဟုတ်သေးဟု AA စစ်ဦးစီးချုပ်၏ညီကိုအောင်မြတ်ကျော်က ပြောဆိုလိုက်သည်။

ယနေ့ညနေပိုင်းကရန်ကုန်မှတဆင့် စစ်တွေသို့ လေကြောင်းခရီးဖြင့်ရောက်ရှိလာစဉ် စစ်တွေလေဆိပ်တွင်မီဒီယာများကိုပြောဆိုသွားခြင်းဖြစ်သည်။

“ဒီနေ့လွတ်လာတာက ပြီးပြည့်စုံမှု တစ်ခုတော့ မဟုတ်ပါဘူး။ ကျွန်တော်တို့မှာ လုပ်စရာတွေအများကြီးရှိသေးတယ်။ အခုဖြစ်တဲ့ကိစ္စတွေကတော့ ခရီးသွားရင် အတက်အကျတွေလည်းရှိတာပါပဲ။ ကျွန်တော်တို့နဲ့လည်း မပြီးသေးဘူး။ အထဲမှာ အများကြီးကျန်နေသေးတယ်။လောလောဆယ် ဖြစ်နေတာတွေကို အပြုသဘောနဲ့ သုံးသပ်တယ်။ ပုဂ္ဂိုလ်ရေး အမုန်းတရားအနေနဲ့ဘာမှမရှိဘူး။ ကျွန်တော်တို့ လွတ်လာတာဟာ အကောင်းဆုံးအဖြေတစ်ခုတော့ မဟုတ်သေး။လွတ်ဖို့ ထိုက်တန်တဲ့ မတရားဖမ်းဆီးထားတဲ့ လူငယ်တွေ အများကြီး ရှိပါတယ်။အဲဒါတွေကိုဆက်ပြီးတော့ နှစ်ဘက် တာဝန်ရှိသူတွေကို မြန်မြန်ဆန်ဆန်နဲ့မြန်မာနိုင်ငံအရေးကို ရှေ့ဆက်ပြီးတော့ အရှိန်အဟုန်နဲ့ကောင်းအောင်သွားနိုင်ဖို့ဘက်ကို ဦးတည်ပြီးတော့ ပိုပြီးကြိုးစားပေးဖို့လို့မျှော်လင့်ပါတယ်။ ကျန်အပိုင်းတွေကတော့ ကျွန်တော်တို့မှာ လုပ်စရာတွေအများကြီးရှိသေးတယ်။”ဟုကိုအောင်မြတ်ကျော်က ဆိုသည်။

ရက္ခိုင့်တပ်တော်(AA) စစ်ဦးစီးချုပ်ဗိုလ်ချုပ်ထွန်းမြတ်နိုင်၏ ညီဖြစ်သူ ကိုအောင်မြတ်ကျော်နှင့် ညီမဖြစ်သူ မယမင်းမြတ်(ခ) မမိုးနှင်းဖြူအပါအဝင် ၁၀ ဦးသည် ယနေ့နံနက်ပိုင်းတွင်ရန်ကုန်အနောက်ပိုင်းခရိုင်တရားရုံးမှ လွတ်မြောက်လာခြင်းဖြစ်သည်။

လွတ်မြောက်လာသူများမှာAA စစ်ဦးစီးချုပ်ဗိုလ်ချုပ်ထွန်းမြတ်နိုင်၏ညီ ကိုအောင်မြတ်ကျော်၊ AA စစ်ဦးစီးချုပ်၏ညီမ မယမင်းမြတ် (ခ)မမိုးနှင်းဖြူ၊ သူ၏အမျိုးသား ကိုကျော်နိုင်နှင့် ရခိုင်အသင်း(စင်္ကာပူ)ခေါင်းဆောင်များဖြစ်ကြသည့် ကိုမြတ်လင်းဦး၊ ကိုရဲကျော်ထက်၊ မအေးမြတ်မွန်၊ကိုတင်လှိုင်ဦး၊ ကိုဟိန်းဇော်၊ ကိုမောင်ပန် (ခ) ကိုထွန်းအေးနှင့်ကိုရွှေလှိုင်သန်းတို့ဖြစ်သည်။

လွတ်မြောက်သူများထဲတွင်AA စစ်ဦးစီးချုပ်၏ညီမနှင့်ယောက်ဖတို့အမှုမှာ စွဲချက်တင်ထားပြီဖြစ်သည့်အတွက် တရားသေလွတ်မြောက်လာခြင်းဖြစ်ပြီးကျန် ၈ ဦးမှာ စွဲချက်မတင်ရသေးသည့်အတွက် တရားရှင်လွတ်မြောက်လာခြင်းလည်းဖြစ်သည်။

“အလုပ်တွေအများကြီးလုပ်ကြပါမယ်။ ကျန်နေသေးတဲ့ ရဲဘော်တွေအတွက် အမြန်ဆုံးထွက်လာနိုင်အောင်ကြိုးစားပေးကြမယ်။”ဟုကိုအောင်မြတ်ကျော်က ဆက်လက်ပြောဆိုသွားခဲ့သည်။

လွတ်မြောက်လာသူများသည်AA နှင့်ပတ်သက်သည်ဟုဆိုကာ၂၀၁၉ ခုနှစ်တွင် ဖမ်းဆီးတရားစွဲဆိုခံခဲ့၇ခြင်းဖြစ်ပြီး (၂)နှစ်ခန့်အကြာတွင်လွတ်မြောက်လာခြင်းလည်း ဖြစ်သည်။

သူတို့၁၀ ဦးလွတ်မြောက်လာပြီးနောက် ယနေ့ညနေ ၅ နာရီခွဲခန့်တွင် ရန်ကုန်မှ စစ်တွေသို့စင်းလုံးငှားလေယာဉ်ဖြင့် ရောက်ရှိခဲ့ကြခြင်းဖြစ်သည်။ စစ်တွေလေဆိပ်တွင် သူတို့အားရာနှင့်ချီသည့်ပြည်သူများက သွားရောက်ကြိုဆိုခဲ့ကြသည်။