ဂွမြို့တွင် ကိုဗစ်ဖြင့် ကိုယ်ဝန်ဆောင်တစ်ဦးသေဆုံး၊ ရခိုင်တွင် ကိုဗစ်ဖြင့် သေဆုံးသူ ကိုယ်ဝန်ဆောင် ၄ ဦးအထိရှိလာ


ချစ်အိလှိုင်
နိရဥ္စရာ၊ စက်တင်ဘာရ / ၂ဝ၂၁
ရခိုင်ပြည်နယ်၊ ဂွမြို့နယ်ဆေးရုံကြီးတွင် ယနေ့ စက်တင်ဘာ ၇ ရက်နံနက် ၆ နာရီခွဲခန့်က ကိုဗစ်ဖြင့် ကိုယ်ဝန်ဆောင်တစ်ဦး သေဆုံးသွားခဲ့သဖြင့် လက်ရှိတွင် ရခိုင်တွင် ကိုဗစ်ဖြင့် သေဆုံးသူ ကိုယ်ဝန်ဆောင် ၄ ဦးအထိရှိသွားပြီ ဖြစ်ကြောင်းသတင်းရရှိသည်။
ယနေ့ နံနက်က သေဆုံးသူ ကိုယ်ဝန်ဆောင် အမျိုးသမီးမှာ အသက်(၂၇) အရွယ် ကိုယ်ဝန်(၇)လ လွယ်ထားရသူဖြစ်ပြီး ဧရာဝတီ တိုင်းဒေသကြီး၊ ပုသိမ်မြို့နယ်၊ မကျီးဇင်တိုက်နယ်ဆေးရုံမှ လွှဲပြောင်းလာသူဖြစ်ကြောင်း နာရေးကူညီပေးခဲ့သူ ဂွမြို့ချမ်းမြေ့မေတ္တာ လူမှုကူညီရေး အသင်း တာဝန်ရှိသူကနိရဥ္စရာ သတင်းဌာနကို ပြောသည်။
“ သူက မကျီးဇင်မှာအောက်ဆီဂျင်ကျလာလို့ ကျွန်တော်တို့ဆီကို မနေ့က မနက်ပိုင်းရောက်လာတာပါ။ အောက်ဆီဂျင်အမြင့်ဆုံးပေးခဲ့ပေမယ့် မရလိုက်ဘူး။ ဂွဆေးရုံမှာ အဲဒီဖက်က လူနာတွေ လာတက်ကြပါတယ်။ ကိုဗစ်လူနာတွေထဲလည်း အဲဒီမကျီးဇင်ဖက်က လူတွေရှိသေးတယ်။ ဒီနေ့မနက်ဆုံးပါတယ်” ဟုပြောသည်။
သေဆုံးသူအား ယနေ့နံနက် ၇ နာရီကျော်က ဂွမြို့သုသာန်တွင် သင်္ဂြိုလ် လိုက်ပြီဖြစ်ကြောင်း သူကဆက်ပြောသည်။
ရခိုင်တွင် လက်ရှိ ကိုဗစ်ဖြင့် သေဆုံးသူ ကိုယ်ဝန်ဆောင် ၄ ဦးရှိသွားပြီဖြစ်ကာ ဇူလိုင်လ ၂၅ ရက်နေ့ကလည်း မင်းပြားမြို့ဆေးရုံကြီးတွင် အသက်(၂၈)နှစ် အရွယ် ကိုယ်ဝန်(၅)လနှင့် တစ်ဦး၊ဇူလိုင်လ (၂၈) ရက်နေ့က စစ်တွေ ဆေးရုံကြီးတွင် ပေါက်တောမြို့ဇာတိ ကိုယ်ဝန်(၈) မိခင်တစ်ဦးနှင့် ဇူလိုင်လ ၂၉ ရက်နေ့က မောင်တောဆေးရုံတွင် ကလေးမီးဖွားပြီးနောက် နာရီပိုင်းအတွင်း သေဆုံးခဲ့သည်။
ရခိုင်တွင် ကိုဗစ်ဖြင့် သေဆုံးသူ အရေအတွက် ယခင်ကထက် လျော့နည်းလာသော်လည်း ယမန်နေ့ စက်တင်ဘာ ၆ ရက်နေ့က ရခိုင်တွင်ကိုဗစ်ဖြင့် ၃ ဦးသေဆုံးခဲ့ပြီး ၎င်းတို့မှာ ဂွ၊ မောင်တောနှင့် အမ်းတို့တွင် တစ်ဦးစီဖြစ်ကြသည်။
ဂွမြို့နယ်တွင် စက်တင်ဘာ ၇ ရက်နေ့ နံနက်ပိုင်းအထိ ကိုဗစ်လူနာ (၈၇၃) ဦးရှိပြီး သေဆုံးသူ ၂၃ ဦးရှိပြီဖြစ်ကြောင်း ချမ်းမြေ့မေတ္တာ လူမှုကူညီရေးအသင်း၏ စာရင်းအရသိရသည်။

Share: