စစ်တွေမြို့ ကိုရီးယားဆိပ်ကမ်းတွင် အမှိုက်များမဆင်မခြင်စွန့်ပစ်မှုများရှိ၍ တားမြစ်ရန်လိုအပ်နေ


သန္တာကျော်ဇော

နိရဥ္စရာ၊ စက်တင်ဘာ ၁၇/ ၂၀၂၁

စစ်တွေမြို့ BXT ကိုရီးယားဆိပ်ကမ်းတွင် အမှိုက်များကို မဆင်မခြင်စွန့်ပစ်မှုများရှိနေ၍ သက်ဆိုင်ရာက တားမြစ်ပေးရန်လိုအပ်နေသည်ဟု သဘာဝပတ်ဝန်းကျင်အရေး လူပ်ရှားနေသူများက ပြောသည်။

ယင်းကဲ့သို့ အမှိုက်များကို မဆင်မခြင် စွန့်ပစ်ထားကြသည့်အတွက် လူသွားလမ်းပေါ်တွင် အမှိုက်များ မြင်မကောင်းအောင် ပြန့်ကြဲနေပြီး သဘာဝပတ်ဝန်းကျင်ကို ထိခိုက်နေသလို လေကောင်းလေသန့် ရသည့်နေရာများဖြစ်သည့်အတွက် အပန်းဖြေ၊ အားကစားလာလုပ်သူများအတွက်လည်း ထိခိုက်မှုများရှိနေသည်ဟု စိမ်းပြာသဘာဝပတ်ဝန်းကျင်ထိန်းသိမ်းရေးအဖွဲ့မှ ဥက္ကဋ္ဌဦးလှဝင်းက ပြောသည်။

အခုလိုမျိုး အမှိုက်တွေကို စည်းမရှိကမ်းမရှိ ပစ်တာကတော့ မဖြစ်သင့်ဘူး။ BXT ဆိပ်ကမ်းမှာတော့ အမှိုက်ပုံးက အများမချထားဘူး။ ဒါပေမဲ့ ချထားတဲ့နေရာမှာ အမှိုက်ကိုတော့ သေချာဝင်အောင် ပစ်ရမှာက အမှိုက်ပစ်တဲ့သူရဲ့တာဝန်ပေါ့နော်။ အဲလိုမျိုး အမှိုက်ပုံးချထားတဲ့နေရာမှာ အမှိုက်တွေကို သေချာပြန်ပြီးသိမ်းဆည်းပေးရင်တော့လည်း ပြဿနာကတော့ အားလုံးကင်းရှင်းသွားမယ်လို့ ထင်တယ်။ အဓိကကတော့ စွန့်ပစ်သူလည်း သေချာစွန့်ပစ်ရမယ်၊ သိမ်းဆည်းတဲ့သူကလည်း သေချာအချိန်မီသိမ်းဆည်းရမယ်ဟုပြောသည်။

စစ်တွေ BXT ကိုးရီးယားဆိပ်ကမ်းတွင် သမ္ဗာန်မောင်းနေသူ ဦးဘအေးကလည်း လူအများအပန်းဖြေသည့်နေရာတွင် အမှိုက်များစည်းမဲ့ကမ်းမဲ့ပစ်ထားကြသည့်အတွက် မြစ်ရေပြင်တွင် အမှိုက်ဆိုးများ ပေါလောမျောကာ မြင်မကောင်းအောင်ဖြစ်နေကြောင်း ပြောသည်။

တခြားနိုင်ငံတွေမှာဆိုရင် မြို့ကမ်းနားပါးတွေမှာ အမှိုက်တွေလုံးဝမရှိဘူး။ မြို့လယ်ကအမှိုက်ပုံးတွေက အနံ့တွေ အရမ်းဆိုးတော့ ကျန်းမာရေးထိခိုက်စေတယ်။ အန္တရာယ်ဖြစ်စေတယ်ဟုပြောသည်။

BXT ကိုးရီးယားဆိပ်ကမ်းသည် နံနက်စောစောနှင့် ညနေပိုင်းများတွင် လမ်းလျှောက်သူ အပန်းဖြေ လာရောက်သူများဖြင့် စည်ကားသည့်နေရာတစ်ခုဖြစ်ပြီး ယာယီလမ်းဘေးစျေးဆိုင်ငယ်များလည်း ဖွင့်လှစ်ရောင်းချကြခြင်းကြောင့် လူသွားလူလာများသည့်နေရာတစ်ခုဖြစ်သည်ဟုလည်း သိရသည်။

 

Share: