အေးမြတ်ခိုင်

နိရဥ္စရာ၊ အောက်တိုဘာ ၁၃/၂၀၂၁

ထိုင်းနိုင်ငံမှ ရခိုင်ပြည်နယ်သို့ပြန်လာသည့် ခရီးသည်တင်ကားတစ်စီးတိမ်းမှောက်မှုကြောင့် ခရီးသည် ၁၀ ဦးဒဏ်ရာရရှိခဲ့ပြီး ယင်းအနက် သားမိနှစ်ဦးအပါအဝင် ၃ ဦး ဒဏ်ရာအပြင်းအထန်ရရှိခဲ့ကြောင်း သတင်းရရှိသည်။

ရခိုင်သို့ပြန်လာသည့် ခရီးသည် ၂၂ ဦးလိုက်ပါလာသော ငြိမ်းချမ်းခရီးသည်တင်ကားသည် ယနေ့ အောက်တိုဘာလ ၁၃ ရက် နေ့လယ် ၁ နာရီခန့်က ကရင်ပြည်နယ် မြ၀တီ-ကော့ကရိတ် အာရှလမ်းမကြီး(တောင်ပေါ်လမ်း) နတ်စင်ကွေ့တွင် ဘရိတ်ပေါက်၍ တိမ်းမှောက်ခဲ့ခြင်းဖြစ်ကြောင်း သိ၇သည်။

လက်ရှိတွင် ဒဏ်ရာရရှိသော လူနာများကို ကော့ကရိတ်ဆေးရုံကို ပို့ဆောင်ထားပြီး အသက်အန္တရာယ်စိုးရိမ်ရသူမရှိကြောင်း ကူညီဆောင်ရွက်ပေးသည့် မြ၀တီ သင်္ကန်းညီနောင်-မြို့သစ်၊ လူမှုကူညီရေးအသင်းဥက္ကဋ္ဌ ကိုစိုးမိုးဌေးက နိရဥ္စရာကိုပြောသည်။

"ပြင်းထန်ဒဏ်ရာရတဲ့အထဲမှာ ကလေးအမေနဲ့ ကလေးနဲ့တော့ တွေ့လိုက်တယ်။ အသက်တော့ မစိုးရိမ်ရဘူးပေါ့နော်။ ကျိုးတာတွေဘာတွေတော့ရှိတာပေါ့။ ပထမကတော့ သတိမရတော့ စိုးရိမ်းသွားတာပေါ့နော်။ မကြာခင်သတိပြန်၇လာခဲ့ပါတယ်"ဟု ပြောသည်။

လက်ရှိတွင် လူနာများ၏ နေရပ်လိပ်စာနှင့် အမည်များကို အတိအကျကိုမသိရှိသေးကြောင်း ကိုစိုးမိုးဌေးက ပြောသည်။

ဓာတ်ပုံ - မြ၀တီ သင်္ကန်းညီနောင်-မြို့သစ်၊ လူမှုကူညီရေးအသင်း