တောင်ကုတ်မိုးပညာဒါနကျောင်းဥက္ကဋ္ဌအမှု လိုပြသက်သေမရောက်၍ အောက်တိုဘာ ၂၈ ရက်တွင် စစ်ဆေးရန်ပြန်ချိန်း

ရေးသူ: Web Master
| ရက်စွဲ: ၁၈ အောက်တိုဘာ ၂၀၂၁
| ကြည့်ရှုသူ: 1.2k

မြထွီးသျှင်

နိရဥ္စရာ၊ အောက်တိုဘာ ၁၈/၂၀၂၁

ရခိုင်ပြည်နယ် တောင်ကုတ်မြို့မှ မိုးပညာဒါနကျောင်းဥက္ကဋ္ဌ၏အမှုတွင် လိုပြသက်သေကို ယနေ့စစ်ဆေးရန်ရှိသော်လည်း ရုံးချိန်းသို့ရောက်မလာ၍ အောက်တိုဘာ ၂၈ ရက်တွင် စစ်ဆေးရန်ပြန်ချိန်းလိုက်သည်ဟု အမှုအားလိုက်ပါဆောင်ရွက်ပေးနေသည့် ရှေ့နေဦးအောင်ကြည်နိုင်က နိရဥ္စရာသို့ပြောသည်။

“တရားလိုနဲ့လိုပြသက်သေ မရောက်တဲ့အတွက် ရုံးချိန်းကို နောက်အပတ်ကိုပြန်ချိန်းလိုက်ရပါတယ်” ဟု ပြောသည်။

မတရားအသင်းဆက်သွယ်မှုဥပဒေပုဒ်မ ၁၇(၁)ဖြင့် တရားစွဲခံထားရသည့် မိုးပညာဒါနကျောင်းဥက္ကဋ္ဌ ဦးအောင်ဝင်းနိုင်၏တရားလိုဖြစ်သည့် တောင်ကုတ်မြို့ ၅၄၄ တပ်ရင်းမှ ဗိုလ်ကြီးကျော်ဇင်ဦးကို အောက်တိုဘာလ ၆ ရက်တွင် တောင်ကုတ်မြို့နယ်တရားရုံး၌ စတင်စစ်ဆေးခဲ့ပြီး တရားလိုပြသက်သေကိုမူ ယနေ့တွင်စစ်ဆေးရန် ချိန်းဆိုခဲ့ခြင်းဖြစ်သည်။

ဦးအောင်ဝင်းနိုင်နှင့် အခြား ၆ ဦးတို့သည် ပြီးခဲ့သည့် ဇွန်လ ၅ ရက်နေ့ နံနက်ပိုင်းက တောင်ကုတ်-သံတွဲလမ်းပိုင်း ဖုံညိုစစ်ဆေးရေးဂိတ်တွင် စစ်တပ်၏ ဖမ်းဆီးခြင်းကိုခံလိုက်ရသည်။

ဦးအောင်ဝင်းနိုင်သည် ရက္ခိုင့်တပ်တော်(AA)သို့ သစ်အခွန်ခငွေသုံးသိန်း အခွန်ဆောင်ခဲ့ပြီး အမည်မသိ လူ ၆ ဦးကို AA သို့ပို့ဆောင်ပေးခဲ့သည်ဟုဆိုကာ မတရားအသင်းဆက်သွယ်မှုပုဒ်မ ၁၇(၁)ဖြင့် တောင်ကုတ်မြို့ ၅၄၄ တပ်ရင်းမှ ဗိုလ်ကြီးကျော်ဇင်ဦးက တရားလိုပြုလုပ်ကာ တရားစွဲဆိုခဲ့သည်။

ယင်းနောက် မတရားအသင်းဆက်သွယ်မှု ဥပဒေပုဒ်မ ၁၇(၁)ဖြင့် သြဂုတ်လ ၉ ရက်နေ့တွင် စတင် တရားစွဲဆိုခံလိုက်ရခြင်းဖြစ်သည်။

မတရားအသင်းဆက်သွယ်မှုဥပဒေ ပုဒ်မ ၁၇(၁)သည် ၂ နှစ်ထက်မနည်း၊ ၃ နှစ်ထက်မပိုသော ထောင်ဒဏ်နှင့် ငွေဒဏ် ၂ ရပ်လုံးချမှတ်နိုင်သော ပုဒ်မဖြစ်သည်။