နှင်းနွယ်နီ

နိရဥ္စရာ၊ အောက်တိုဘာ ၁၈/၂၀၂၁

ဂျပန်နိုင်ငံ၊ ယိုကိုဆုကမြို့နယ်တွင် အလယ်တန်းအဆင့်ကျောင်းပေါင်းစုံ အပြေးပြိုင်ပွဲ၌ အိုပါးမား အလယ်တန်းကျောင်းကိုယ်စားပြု အပြေးပြိုင်ခဲ့သည့် ၇ခိုင်လူငယ်အမွှာမောင်နှမ ၂ ဦး ဆုအသီးသီးရရှိသွားကြောင်း သိ၇သည်။

ဆုရရှိသွားသည့် ၇ခိုင်လူငယ် အမွှာမောင်နှမမှာ ဂျပန်နိုင်ငံ၊ ခါနာဂ၀ခရိုင်၊ ယိုကိုဆုကမြို့တွင်နေထိုင်သည့် မောင်ကောင်းထက်ကျော် (၁၅ နှစ်)နှင့် မခိုင်ထက်ကျော်(၁၅ နှစ်)တို့ဖြစ်သည်။

မောင်ကောင်းထက်ကျော်သည် ပြီးခဲ့သည့် အောက်တိုဘာလ ၁၆ ရက်ကကျင်းပသည့် အမျိုးသားမီတာ ၂၄၀၀ အလယ်တန်းအဆင့်ကျောင်းပေါင်းစုံအပြေးပြိုင်ပွဲတွင် ဒုတိယဆု(ငွေတံဆိပ်)နှင့် ညီမဖြစ်သူ မခိုင်ထက်ကျော်သည် အမျိုးသမီး မီတာ ၂၀၀၀ အလယ်တန်းအဆင့်ကျောင်းပေါင်းစုံအပြေးပြိုင်ပွဲတွင် ပထမဆု(ရွှေတံဆိပ်)တို့ကို အသီးသီးရရှိသွားခြင်းဖြစ်သည်။

မိခင်ဖြစ်သူ ဒေါ်ချိုချိုဇံက “ဒီနိုင်ငံမှာ ကိုယ့်ကိုကိုယ်ကြိုးစားမှဖြစ်မယ်ဆိုပြီးတော့ မိဘကလည်း မိဘအလုပ်လုပ်ရတယ်။ သားသမီးကလည်း သားသမီးအလုပ်လုပ်မှဖြစ်မယ်ဆိုတော့ သူတို့ကလည်း ကြိုးစားကြလို့ ဒီလိုရတာပါ။ သူများနိုင်ငံမှာ၇တာဆိုတော့ ကိုယ့်လူမျိုးအတွက်လည်းဂုဏ်ယူပါတယ်။ ကိုယ့်သားသမီးလေးတွေအတွက်တော့ အတိုင်းမသိ ပျော်တာပေါ့” ဟုပြောသည်။

အဆိုပါ မောင်နှမ ၂ ဦးသည် ဂျပန်နိုင်ငံ၊ ယိုကိုဆိုကမြို့မှ အိုပါးမားကျောင်းတွင် အလယ်တန်း တတိယနှစ်၌ ပညာသင်ကြားနေသူများဖြစ်သည်။

သူတို့၏ ဖခင်ဖြစ်သူ ဦးအောင်ကျော်မင်းသည် ရခိုင်ပြည်နယ် ရမ်းဗြဲမြို့ဇာတိဖြစ်ပြီး မိခင် ဒေါ်ချိုချိုဇံမှာ မောင်တောမြို့ဇာတိဖြစ်သည်။

လက်ရှိတွင် ၎င်းတို့မိသားစုသည် ဂျပန်နိုင်ငံ ယိုကိုဆုကမြို့တွင် နေထိုင်လျက်ရှိကြောင်း သိ၇သည်။