တောင်ကုတ်မိုးပညာဒါနကျောင်းဥက္ကဋ္ဌကို ဒီဇင်ဘာလ ၂၈ ရက်တွင် စွဲချက်တင်သင့်၊ မတင်သင့်အမိန့်ချမည်

ရေးသူ: Web Master
| ရက်စွဲ: ၁၅ ဒီဇင်ဘာ ၂၀၂၁
| ကြည့်ရှုသူ: 410

မြထွီးသျှင်

နိရဥ္စရာ၊ ဒီဇင်ဘာ ၁၄/၂၀၂၁

ရက္ခိုင့်တပ်တော်(AA)နှင့်ဆက်သွယ်သည်ဟုဆိုကာ ဖမ်းဆီးတရားစွဲခံထားရသည့် ရခိုင်ပြည်နယ် တောင်ကုတ်မြို့မှ မိုးပညာဒါနကျောင်း ဥက္ကဋ္ဌ ဦးအောင်ဝင်းနိုင်ကို ဒီဇင်ဘာလ ၂၈ ရက်တွင် စွဲချက်တင်သင့်၊ မတင်သင့် အမိန့်ချမည်ဖြစ်ကြောင်း အမှုအားလိုက်ပါဆောင်ရွက်နေသည့် ရှေ့နေ ဦးအောင်ကြည်နိုင်က နိရဥ္စရာသို့ပြောသည်။

“ဒီနေ့မှာတော့ နောက်ဆုံးကျန်တဲ့ လိုပြသက်သေ စရဖကို စစ်ဆေးခဲ့တယ်။ ဒီဇင်ဘာလ ၂၈ ရက်နေ့မှာတော့ စွဲချက်တင်သင့််၊ မတင်သင့် အမိန့်ချမယ်” ဟုပြောသည်။

ဦးအောင်ဝင်းနိုင်ကို တောင်ကုတ်ရဲစခန်းအချုပ်တွင် ထိန်းသိမ်းထားခြင်းဖြစ်ပြီး လက်ရှိတွင် ရင်ဘတ်အောင့်သည့်ဝေဒနာကို ခံစားနေရသည်ဟုလည်း ဇနီးဖြစ်သူ ဒေါ်တွယ်တာစိုးက ပြောသည်။

ဦးအောင်ဝင်းနိုင်နှင့် အခြား ၆ ဦးတို့သည် ပြီးခဲ့သည့် ဇွန်လ ၅ ရက်နေ့ နံနက်ပိုင်းက တောင်ကုတ်-သံတွဲလမ်းပိုင်း ဖုံညိုစစ်ဆေးရေးဂိတ်တွင် စစ်တပ်၏ ဖမ်းဆီးခြင်းကိုခံလိုက်ရခြင်းဖြစ်သည်။

ဦးအောင်ဝင်းနိုင်သည် ရက္ခိုင့်တပ်တော်(AA)သို့ သစ်အခွန်ခငွေသုံးသိန်း အခွန်ဆောင်ခဲ့ပြီး အမည်မသိ လူ ၆ ဦးကို AA သို့ပို့ဆောင်ပေးခဲ့သည်ဟုဆိုကာ မတရားအသင်းဆက်သွယ်မှုပုဒ်မ ၁၇(၁)ဖြင့် တောင်ကုတ်မြို့ ၅၄၄ တပ်ရင်းမှ ဗိုလ်ကြီးကျော်ဇင်ဦးက တရားလိုပြုလုပ်ကာ တရားစွဲဆိုထားခြင်းဖြစ်ကြောင်း သိရသည်။

ယင်းနောက် မတရားအသင်းဆက်သွယ်မှု ဥပဒေပုဒ်မ ၁၇(၁)ဖြင့် သြဂုတ်လ ၉ ရက်နေ့တွင် စတင် တရားစွဲဆိုခံလိုက်ရခြင်းဖြစ်သည်။

သူနှင့်အတူဖမ်းဆီးခံခဲ့ရသူ ၆ ဦးနှင့်ပတ်သက်သည့်သတင်းအချက်အလက်များကို လက်ရှိအချိန်ထိ စုံစမ်း၍မရသေးပါ။

ဦးအောင်ဝင်းနိုင်တရားစွဲခံထားရသည့် မတရားအသင်းဆက်သွယ်မှုဥပဒေပုဒ်မ ၁၇(၁)သည် ၂ နှစ်ထက်မနည်း၊ ၃ နှစ်ထက်မပိုသော ထောင်ဒဏ်နှင့် ငွေဒဏ် ၂ ရပ်လုံးချမှတ်နိုင်သော ပုဒ်မဖြစ်သည်။