နိရဉ္စရာ၊ ၁၆ ဖေဖော်ဝါရီ ၂၀၂၂

တောင်ကိုရီးယား POSCO International Corporation (Myanmar E&P) က မြန်မာ့ရေနံနှင့် သဘာ၀ဓာတ်ငွေ့လုပ်ငန်း (MOGE) နှင့် ပူးပေါင်းပြီး ရွှေသဘာ၀ဓာတ်ငွေ့ စီမံကိန်းအပိုင်း(၂)၏ ၇ခိုင်ကမ်းလွန်လုပ်ကွက် A-1 မှာ တူးဖော်ရေးလုပ်ငန်းများ စတင်နိုင်ရန် ပြင်ဆင်မှုများ ပြုလုပ် လျက်ရှိနေကြောင်း BETV စီးပွားရေးသတင်းတွင် ဖော်ပြသည်။

Myanmar E&P အနေနဲ့ A-1 မှာ ရွှေအဆင့်(၂) ဖွံ့ဖြိုးတိုးတက်ရေး စီမံကိန်းအရ တပ်ဆင်ခြင်း လုပ်ငန်းများကို ကမ်းလွန်ဆောက်လုပ်ရေးရေယာဉ် ‘‘DLV 2000’’ နှင့် ဖေဖော်ဝါရီ ၁၆ ရက်မှ မတ်လ ၁၅ ရက်အထိ ဆောင်ရွက်သွားမည်ဟု ကြေညာထားသည်။

ရွှေစီမံကိန်းမှာ POSCO International က ရှယ်ယာ ၅၁ ရာခိုင်နှုန်း ပိုင်ဆိုင်ကာ အော်ပရေတာအဖြစ် လုပ်ကိုင်ခွင့်ရရှိထားပြီး MOGE(မြန်မာ)က ၁၅ ရာခိုင်နှုန်း၊ ONGC(အိန္ဒိယ)က ၁၇ ရာခိုင်နှုန်း၊ KOGAS (တောင်ကိုရီးယား)နှင့် GAIL(အိန္ဒိယ)တို့က ၈.၅ ရာခိုင်နှုန်းစီ အချိုးကျပါဝင်ကာ ပူးပေါင်းဆောင်ရွက်နေခြင်း ဖြစ်ကြောင်း သိ၇သည်။

ကမ်းလွန်လုပ်ကွက် A-1 နှင့် A-3 တို့တွင် ပါရှိသည့် ရွှေစီမံကိန်းအတွင်း A-1 အတွင်း ‘ရွှေ’ နှင့် ‘ရွှေဖြူ’ လုပ်ကွက်တို့ရှိပြီး A-3 မှာ ‘မြ’ လုပ်ကွက်တို့ရှိကာ ထွက်ရှိလာသည့် ဓာတ်ငွေ့များ ကို တရုတ်အမျိုးသားရေနံကော်ပိုရေးရှင်းထံ ၂၀၁၃ ခုနှစ်မှ စတင်ကာ ပိုက်လိုင်းဖြင့် ပို့လွှတ်ရောင်းချခဲ့သည်ဟု သတင်းတွင် ဖော်ပြသည်။

POSCO ၏ ထုတ်ပြန်ချက်အရ ရွှေအဆင့်(၂) ဖွံ့ဖြိုးတိုးတက်ရေး စီမံကိန်း အတွက် အမေရိကန်ဒေါ်လာ ၄၇၃ သန်း ရင်းနှီးမြှုပ်နှံဖို့ လျာထားပြီး ကမ်းလွန်လုပ်ကွက် A-1 ရှိ ‘ရွှေ’ နှင့် ‘ရွှေဖြူ’ လုပ်ကွက်ဧရိယာအတွင်း စီးပွားဖြစ်ထုတ်လုပ်ရေး ရှစ်တွင်း တူးဖော်မည်ဟုလည်း သိ၇သည်။

ရွှေစီမံကိန်းမှ ၂၀၂၁ ပထမသုံးလမှာ နေ့စဉ် သဘာ၀ဓာတ်ငွေ့ကုဗပေသန်း ၅၇၀ ရောင်းချခြင်းမှ အမြတ် ကိုရီးယားဝမ် ၃၀ ဒသမ ၄ ဘီလီယံနှင့် ဒုတိယသုံးလမှာ ကုဗပေသန်း ၅၂၀ ရောင်းချရမှုအတွက် အမြတ် ကိုရီးယားဝမ် ၃၇ ဒသမ ရ ဘီလီယံရရှိခဲ့ကြောင်း POSCO International ၏ ၂၀၂၁ ဒုတိယသုံးလပတ် အစီရင်ခံစာမှာ ဖော်ပြထားသည်။