ကြာသပတေး၊ မတ်လ ၂၈ရက်၊ ၂၀၂၄

စစ်တွေတွင် ယမန်နေ့ညက ဖမ်းဆီးစစ်ဆေးမှုများနှင့် သေနတ်သံများထွက်ပေါ်ခဲ့၍ ယနေ့စာသင်ကျောင်းအချို့ပိတ်ထား


  • ရေးသူ: Web Master
  • | ရက်စွဲ: ၂၄ ဇွန် ၂၀၂၂
  • | ကြည့်ရှုသူ: 8.2k


နိရဉ္စရာ၊ ဇွန် ၂၄/၂၀၂၂
ရခိုင်ပြည်နယ်၏မြို့တော်စစ်တွေတွင် ယမန်နေ့မှစတင်ကာ အဖမ်းအဆီးစစ်ဆေးမှုများနှင့် သေနတ်သံများပေါ်ထွက်ခဲ့မှုကြောင့် အခြေခံပညာကျောင်းအချို့ကိုပိတ်ထားကာ ဖွင့်သည့်ကျောင်းများတွင်လည်း ကျောင်းသားအနည်းငယ်သာတက်ရောက်နေကြောင်း ဒေသခံများက ပြောသည်။
စစ်တွေမြို့အခြေခံပညာအထက်တန်းကျောင်းတစ်ကျောင်းအနီးတွင် စျေးရောင်းချနေသူတစ်ဦးက "မတက်ကြတဲ့သူတွေများကြတယ်။ တစ်ယောက်စ၊ နှစ်ယောက်စလောက်ပဲ ရှိတယ်။ မိဘတွေကလည်း ကျောင်းလာထားသူထားကြတယ်၊ နောက်စိတ်မချလို့ ပြန်လာခေါ်ကြတဲ့သူတွေလည်း ရှိတယ်" ဟုပြောသည်။
လက်ရှိတွင် စစ်တွေမြို့ပေါ်ရှိ အခြေခံပညာအထက်တန်းကျောင်းအချို့အပါအဝင် အလယ်တန်းနှင့် မူလတန်းကျောင်းအချို့တွင် ကျောင်းတက်ရောက်သူများနည်းပါးနေသကဲ့သို့ မြို့ပေါ်အထင်ကရလမ်းများတွင်လည်း လမ်းသွားလမ်းလာများမှာ ယခင်ထက်နည်းပါးလျက်ရှိကြောင်း သိရသည်။
ယမန်နေ့ ဇွန်လ ၂၃ ရက်၊ နေ့လယ်ပိုင်းကလည်း စစ်တွေမြို့နယ်၊ သက္ကေပြင်ကျေးရွာမှ မူဆလင်အမျိုးသားတစ်ဦးနှင့် စစ်တွေမြို့အတွင်း ရပ်ကွက်အချို့မှလည်း ဖမ်းဆီးခံရသည့် ဒေသခံများရှိကြောင်း သတင်းများထွက်ပေါ်နေသည်။
ထို့အပြင် ယမန်နေ့ ညအချိန် ၉ နာရီ ၁၀ မိနစ်ကျော်ခန့်ကလည်း စစ်တွေမြို့ မင်းဂံဆင်းလမ်းနှင့် စစ်တွေကားဂိတ်အနီးတွင် သေနတ်ပစ်ခတ်သံများ ၁၁ ချက်ခန့်ကြားခဲ့ရပြီး ဒေသခံများအကြား ထိတ်လန့်မှုရှိခဲ့ကြောင်း သိရသည်။
လက်ရှိတွင် ဖမ်းဆီးခံရသူဦးရေ မည်မျှရှိကြောင်းကိုလည်း နိရဉ္စရာက အတည်ပြုနိုင်ရန် ကြိုးစားနေဆဲဖြစ်သည်။
စစ်တွေမြို့တွင် စစ်ကောင်စီတပ်မှ တပ်ဖွဲ့ဝင်နှစ်ဦးအား ယမန်နေ့ ဇွန်လ ၂၃ ရက် နေ့လယ်ပိုင်းက ရက္ခိုင့်တပ်တော်(AA)က ဖမ်းဆီးသွားသည်ဟု သတင်းများထွက်ပေါ်လျက်ရှိနေပြီး စစ်တွေမြို့အဝင်အထွက်လမ်းတစ်ချို့နှင့် ရပ်ကွက်တချို့တွင် စစ်ကောင်စီဘက်မှ လုံခြုံရေးတိုးမြှင့်ကာ စစ်ဆေးမှုများတင်းကျပ်နေကြောင်း သိရသည်။ (NN-8)

ဆက်စပ် သတင်းများ