ရခိုင်ရှိ မသန်စွမ်းသူများအားကူညီနိုင်ရန် ရွှေရခိုင်မသန်စွမ်းသူများအဖွဲ့ မင်းပြားတွင် ရုံးဖွင့်

ရေးသူ: Web Master
| ရက်စွဲ: ၂၇ ဇွန် ၂၀၂၂
| ကြည့်ရှုသူ: 5.3k

နိရဉ္စရာ၊ ဇွန် ၂၆/ ၂၀၂၂

ရခိုင်ပြည်နယ်ရှိ မသန်စွမ်းသူများအားကူညီနိုင်ရန် ရွှေရခိုင်မသန်စွမ်းသူများအဖွဲ့ က မင်းပြားမြို့တွင် ယနေ့ ရုံးဖွင့်လိုက်ပြီဟု သိရသည်။

အဆိုပါရုံးဖွင့်ပွဲကို မင်းပြားမြို့၊ ကျွန်းညိုရပ်ကွက်တွင် ယနေ့ ဇွန်လ ၂၆ ရက် နံနက် ၉ နာရီမှ ၁၁ နာရီအထိ ကျင်းပခဲ့ပြီး စုစုပေါင်းလူဦးရေ ၄၀ ဦးခန့် တက်ရောက်ခဲ့ကြောင်း သိရသည်။

ရွှေရခိုင်မသန်စွမ်းသူများအဖွဲ့က မသန်စွမ်းသူများအတွက် အသုံးဝင်မည့်အထောက်အကူပြုပစ္စည်းများအပြင် ကျန်းမာရေး၊ မသန်စွမ်းသူများအတွက်အခက်အခဲဖြစ်နေသည့် ပညာရေးစသည့်အရာများ ပြုလုပ်ပေးသွားနိုင်ရန် ယခုရုံးဖွင့်ပွဲကို ပြုလုပ်ရခြင်းဖြစ်သည်ဟု အဖွဲ့ ဖောင်ဒါတစ်ဦးဖြစ်သည့် ဒေါ်မဝင်းရွှေက နိရဥ္စရာကို ပြောသည်။

"ဒီအဖွဲ့က မသန်စွမ်းသူတွေလိုအပ်တဲ့ ပညာရေးတွေ၊ ပညာရေးဆိုပေမဲ့ အတန်းပညာမဟုတ်ဘဲ သက်မွေးဝမ်းကျောင်းပြုလုပ်လို့ရတဲ့အသက်မွေးဝမ်းကျောင်းသင်တန်းတွေ၊ စားနပ်ရိက္ခာတွေ၊ မသန်စွမ်းသူများအသုံးပြုရတဲ့ အထောက်အကူပစ္စည်းတွေကို ပေးဆောင်သွားဖို့အစီအစဥ်ရှိပါတယ်"ဟု ပြောသည်။

ရွှေရခိုင်မသန်စွမ်းသူများအဖွဲ့ကို မသန်စွမ်းအမျိုးသမီးများက နောင်တွင် မည်သည့်သည့်အလုပ်ကိုမဆို သူများနှင့်တန်းတူ လုပ်ဆောင်နိုင်ရန် အမျိုးသမီးနှစ်ဦးက ဦးဆောင်ဖွဲ့စည်းထားခြင်းဖြစ်သည်ဟုလည်း အဖွဲ့၏ဖောင်ဒါတစ်ဦးဖြစ်သည့် ဒေါ်ခင်ယဉ်ဇော်က ပြောသည်။

"အမျိုးသမီးတွေပါဝင်မှုက အဖက်ဖက်က နောက်ကျနေတဲ့အတွက် အမျိုးသမီးတွေပါဝင်မှု

ကောင်းလာဖို့အတွက် အမျိုးသမီးနှစ်ယောက်ကဦးဆောင်ပြီးလုပ်တာပါ" ဟု ပြောသည်။

အဆိုပါအဖွဲ့တွင် အဖွဲ့ဝင်ကော်မတီ ၇ ဦးနှင့် အဖွဲ့ဝင် ၃၀ ဦးရှိပြီး ၂၀၂၂ ခုနှစ်၊ မေလ ၂၉ ရက်နေ့က စတင်ဖွဲ့စည်းခဲ့ခြင်းဖြစ်သည်။

ရခိုင်ပြည်နယ်တွင် မသန်စွမ်းသူများဦးရေ စုစုပေါင်း ၁ သိန်းကျော်ခန့်ရှိသည်ဟုလည်း သိရသည်။ (NN-12)