နိရဥ္စရာ၊ ဇူလိုင် ၆/၂၀၂၂

ရခိုင်ပြည်နယ် မောင်တောမြို့နယ်တွင် ပြန်ပေးဆွဲခြင်းခံခဲ့ရသည့် ပညာရေးဝန်ထမ်း ၂ ဦးကို မိမိတို့ဒေသရှိ ကျောင်းများသို့ ပြောင်းရွှေ့ခွင့်ပြုလိုက်ပြီဟု သိ၇သည်။

ပြန်ပေးဆွဲခံရပြီးနောက် နယ်ပြောင်းခွင့်ရသွားသည့်ပညာရေးဝန်ထမ်း ၂ ဦးမှာ မောင်တောမြို့နယ် သင်္ဘောလှကျေးရွာ မူလွန်ကျောင်းအုပ်ဆရာကြီး ဦးဘိုဝင်းနှင့် လက်ထောက်ဆရာမ ဒေါ်ဥမ္မာကျော်တို့ဖြစ်သည်။

သူတို့ကို သင်္ဘောလှကျေးရွာမူလွန်ကျောင်းမှနေ၍ ဆရာကြီး ဦးဘိုဝင်း၏ ဇာတိဖြစ်သော ပုဏ္ဏားကျွန်းမြို့နယ် ရေပေါက်ချောင်းကျေးရွာ မူလတန်းကျောင်းသို့လည်းကောင်း၊ ဆရာမ ဒေါ်ဥမ္မာကျော်၏ဇာတိဖြစ်သော စစ်တွေမြို့နယ် ကြံတောကျေးရွာ မူလတန်းကျောင်းသို့လည်းကောင်း ဇူလိုင်လ ၄ ရက်တွင် ပြောင်းရွှေ့ခွင့်ပေးလိုက်ခြင်းဖြစ်သည်ဟု ရခိုင်ပြည်နယ်ပညာရေးမှူးရုံးမှ ဒုတိယညွှန်ကြားရေးမှူး ဒေါက်တာထွန်းထွန်းသိန်းက အတည်ပြုပြောသည်။

"သက်ဆိုင်ရာ မြို့နယ်၊ ခရိုင်အသီးသီးရဲ့ ထောက်ခံတင်ပြချက်နဲ့အတူ ရခိုင်ပြည်နယ်ပညာရေးအလုပ်အမှုဆောင်အဖွဲ့အစည်းဝေးဆုံးဖြတ်ချက်နဲ့ သူတို့တွေကို သူတို့တွေရဲ့ နေရာအသီးသီးကို ကျန်းမာရေးအရ၊ မိသားစုနေထိုင်ရေးအရ ပြောင်းရွှေ့ပေးလိုက်တာ ဖြစ်တယ်”ဟု ပြောသည်။

ယခုကိစ္စနှင့်ပတ်သက်ပြီး ဆရာဦးဘိုဝင်းနှင့် ဆရာမ ဒေါ်ဥမ္မာကျော်တို့ကို အကြိမ်ကြိမ်ဖုန်းဖြင့်ဆက်သွယ်ခဲ့သော်လည်း ဖုန်းပြန်လည်ဖြေကြားခြင်းမရှိခဲ့ပါ။

ဆရာဦးဘိုဝင်းနှင့် ဆရာမ ဒေါ်ဥမ္မာကျော်တို့သည် ပြီးခဲ့သည့်ဇွန်လ ၁၆ ရက်က မောင်တောမြို့နယ် သင်္ဘောလှကျေးရွာမှ မောင်တောမြို့ရှိ မြို့နယ်ပညာရေးမှူးရုံးသို့ ရုံးကိစ္စကြောင့် ဆိုင်ကယ်ဖြင့်သွားစဉ် လမ်းတွင် လက်နက်ကိုင်အချို့၏ပြန်ပေးဆွဲခြင်းကိုခံခဲ့၇ခြင်းဖြစ်သည်။

ယင်းနောက် ပြန်ပေးဆွဲသမားများက ဘင်္ဂလားဒေ့ရှ်တာကာငွေ သိန်း ၅၀ ပေးဆောင်ရန်တောင်းဆို၍ မောင်တောခရိုင်ထွေအုပ်နှင့် မြို့နယ်ပညာရေးမှူးတို့က ငွေလွှဲပေးခဲ့သည့်အတွက် ဇွန်လ ၂၃ ရက်တွင် ဘင်္ဂလားဒေ့ရှ်နယ်စပ်တစ်နေရာတွင် လွှတ်ပေးခဲ့ခြင်းဖြစ်သည်ဟု သိ၇သည်။

ပြန်ပေးဆွဲသမားများမှာ မည်သည့်အဖွဲ့အစည်းမှဖြစ်သည်ဆိုသည်ကို လက်ရှိအချိန်အထိ မြန်မာအာဏာပိုင်များနှင့် ပြန်ပေးဆွဲခံခဲ့ရသည့် ကာယကံရှင်များက ထုတ်ဖော်ပြောဆိုခြင်းမရှိသေးပါ။ (NN-7)