နိရဥ္စရာ၊ ဇူလိုင် ၂၀ /၂၀၂၂

ရခိုင်ပြည်နယ် စစ်တွေမြို့နယ် ပါဒလိတ်ကျေးရွာအနီးရှိ ၂၃၂ တပ်ထဲမှ ပေါက်ကွဲသံ ၂ ချက်နှင့် လက်နက်ကြီးပစ်သံ ၁ ချက်ထွက်ပေါ်ခဲ့ကြောင်း ဒေသခံများက ပြောသည်။

ပါဒလိတ်ကျေးရွာအနီး အရှေ့ဘက်ရှိ ၂၃၂ တပ်အတွင်းမှ ယနေ့ ဇူလိုင်လ ၂၀ ရက် နံနက် ၉ နာရီ ၄၅ မိနစ်ခန့်တွင် ကြားခဲ့ရကြောင်း ရွာသားတစ်ဦးက ပြောသည်။

“ပထမ ၂ ချက်ကတော့ မိုင်းကွဲသံလိုလိုကြားရပါတယ်။ နောက်ဆုံးအချက်ကတော့ လက်နက်ကြီးအသံကြားပါတယ်။ ဘယ်ဘက်ကိုပစ်တယ်လို့တော့ ကျနော်တို့ မသိ၇ဘူး”ဟု ပြောသည်။

၂ မိနစ်၊ ၃ မိနစ်ခန့်စီတွင် တစ်ကြိမ်စီကြားခဲ့၇ခြင်းဖြစ်သည်ဟုလည်း နောက်ထပ် ဒေသခံတစ်ဦးက ပြောသည်။

“လက်နက်ကြီးလား၊ မိုင်းကွဲတာလားတော့ သဲသဲကွဲကွဲမသိ၇ဘူး။ ပထမနှစ်ချက်အသံကတော့ နည်းနည်းလောက် မိုင်းကွဲသံလိုမျိုး။ တတိယအခေါက်ကတော့ မိုင်းကွဲတဲ့ပုံစံမျိုးမဟုတ်ဘူး။ နည်းနည်း အသံတွေဘာတွေပါတယ်။ ပစ်တဲ့ပုံစံမျိုးဖြစ်နေပါတယ်”ဟု ပြောသည်။

ယင်းသို့ ပေါက်ကွဲသံနှင့် ပစ်ခတ်သံများကြားခဲ့ရ၍ ဒေသခံများအကြား စိုးရိမ်ထိတ်လန့်ခဲ့၇သည်ဟုဆိုကြသည်။

၂၃၂ တပ်သည် ပါဒလိတ်ကျေးရွာနှင့် အမြင့်ကျွန်းကျေးရွာအကြား ရန်ကုန်-စစ်တွေ ကားလမ်းမဘေးတွင် တည်ရှိသည်။

လက်ရှိတွင် ပါဒလိတ်ကျေးရွာအနီး စစ်ရေးလှုပ်ရှားမှုများလည်းမရှိဘဲ တည်ငြိမ်နေသည်ဟုလည်း ဒေသခံများက ပြောသည်။

ပြီးခဲ့သည့်ရက်ပိုင်းမှစတင်ကာ မောင်တောမြို့နယ်မြောက်ပိုင်းတွင် ရက္ခိုင့်တပ်တော်(AA)နှင့် စစ်ကောင်စီတပ်တို့ တိုက်ပွဲဖြစ်ပွားခဲ့သလို ရသေ့တောင်နှင့် ပုဏ္ဏားကျွန်းမြို့နယ်တို့တွင်လည်း စစ်ရေးတင်းမာမှုများရှိနေချိန် ယခုကဲ့သို့ ပါဒလိတ်အနီးရှိ စစ်တပ်ထဲမှ ပေါက်ကွဲသံနှင့်ပစ်ခတ်သံများ ကြားလာ၇ခြင်းဖြစ်သည်။

ပါဒလိတ်ကျေးရွာအနီးရှိ ၂၃၂ တပ်အပါအဝင် ၃၄၄ တပ်နှင့် ပညာရေး(၁၀) လေ့ကျင့်ရေးတပ်တို့မှလည်း ပြီးခဲ့သည့်ဇူလိုင်လ ၄ ရက် ည ၁၀ နာရီခန့်တွင် သေနတ်သံများ ထွက်ပေါ်ခဲ့သည့်အတွက် ဒေသခံများအကြား စိုးရိမ်ကြောက်လန့်ခဲ့ရသည်ဟု ရွာသားများက ပြောသည်။

(Narinjara သတင်းနှင့် ရုပ်သံများကို အောက်ပါလင့်များတွင် ဝင်ရောက်ဖတ်ရှုနိုင်ပါသည်။)

အင်္ဂလိပ်သတင်း - www.narinjara.com

မြန်မာသတင်း - https://burmese.narinjara.com/

သတင်းဖေ့စ်ဘုတ်ပေ့ချ် - https://www.facebook.com/narinjara.info/

ရုပ်သံသတင်း - https://www.facebook.com/Narinjara-TV-News-100125495251215/

ရေဒီယိုသတင်း - https://www.facebook.com/Narinjara-Radio-107181441819656