NUG,PDF တို့ကို ထောက်ပံ့ကူညီသည့်သံသယဖြင့် သံတွဲမှအမျိုးသမီးတစ်ဦးကို ဖမ်းဆီးပြီးအကြမ်းဖက်မှုပုဒ်မဖြင့်အမှုဖွင့်

နိရဉ္စရာ၊ ဇူလိုင်၂၉/၂၀၂၂

NUG နှင့် PDF တို့ကို  ငွေကြေး ထောက်ပံ့ကူညီသည်ဟု သံသယဖြင့် သံတွဲမြို့က အမျိုးသမီးတစ်ဦးကို အကြမ်းဖက်မှု တိုက်ဖျက်ရေးဥပဒေပုဒ်မဖြင့် ဖမ်းဆီးအမှုဖွင့်ထားကြောင်း သတင်းရရှိသည်။

၎င်းအမျိုးသမီးမှာ သံတွဲမြို့၊ အမှတ် ၅ ရပ်ကွက်နေ အသက် (၃၂) နှစ်အရွယ် မရွှန်းစန္ဒာ(ခေါ်) မဒေးဒေးဖြစ်ပြီး ၎င်းသည် လက်သည်းအလှပုံဖော်သည့်လုပ်ငန်းနှင့် အွန်လိုင်းမှတဆင့် အစားအသောက်ရောင်းချနေသူတစ်ဦးဖြစ်ကြောင်းလည်း သိရသည်။

၎င်းကိုပြီးခဲ့သည့် ဇူလိုင်လ ၂၇ ရက်နေ့က  ၎င်း၏မုန့်ဆိုင်မှ ရဲတပ်ဖွဲ့ဝင်များက လာရောက် ဖမ်းဆီး သွားခြင်းဖြစ်ပြီး အကြမ်းဖက်မှုတိုက်ဖျက်ရေးဥပဒေပုဒ်မ ၅၀(ည)ဖြင့် သံတွဲမြို့မရဲစခန်းတွင် အမှုဖွင့်ခံထားရကြောင်း ၎င်းနှင့်နီးစပ်သူတစ်ဦးကပြောသည်။

"သူ့အိမ်ကနေအဖမ်းခံရတာ။ သူကအွန်လိုင်းက အစားအသောက်လေးတွေ ရောင်းတယ်။ PDFတွေကို ထောက်ပံ့တယ်၊ ဘာညာဆိုပြီးတော့ ဖမ်းတယ်လို့ကြားတယ်။ သူ့ကိုအခုတော့ ရမန်ယူထားတယ်။ ဘယ်နေ့ထိယူမလဲတော့ မသိသေးဘူး" ဟုပြောသည်။

အဆိုပါ မရွှန်းစန္ဒာ၏ ဖေ့စ်ဘုတ်အကောင့်တွင် NUG,PDF တို့၏ ရန်ပုံငွေကံစမ်းမဲအစီအစဉ်ပို့စ် တစ်ခုအား မျှဝေထားသဖြင့် ဖမ်းဆီးခံရခြင်းဖြစ်ကြောင်း ၎င်းနှင့်နီးစပ်သူတစ်ဦးကပြောသည်။

အဆိုပါ လူမှုကွန်ရက်မှ ပိုစ့်တစ်ခုကြောင့် ယခုကဲ့သို့အမှုဖွင့် ဖမ်းဆီးခြင်းမှာလည်း မဖြစ်သင့်ကြောင့် သံတွဲမြို့ခံတစ်ဦးကပြောသည်။

လက်ရှိတွင် ၎င်းအား သံတွဲမြို့မရဲစခန်းတွင် ထိန်းသိမ်းထားကြောင်း သိရသည်။

ရခိုင်တွင် NUG,PDF တို့နှင့် ဆက်စပ်၊ ထောက်ပံ့သည်ဟုဆိုကာ ဒေသခံ ၁၀ ဦးထက်မနည်း ဖမ်းဆီးတရားစွဲဆိုခံနေရပြီး သံတွဲမှ အမျိုးသားနှင့် အမျိုးသမီးအချို့ကိုလည်း ထောင်ဒဏ်အသီးသီးချမှတ်ထားသည်။

၎င်းတို့အထဲက ရခိုင်ပြည်နယ်၊ သံတွဲမြို့မှ ဦးစိန်ချစ်နှင့် ငပလီမြို့မှ ကိုရဲနိုင်ဦးတို့ကို မေ ၂၀ ရက်နေ့က အလုပ်နှင့် ထောင်ဒဏ် ၃ နှစ် စီချမှတ်ခံထားရသည်။

တောင်ကုတ်မြို့မှ CDM ဆရာမ အသက် ၄ဝ အရွယ် ဒေါ်ချယ်ရီသက်ရှည်၊ သံတွဲမြို့မှ အသက် ၂၅ နှစ်အရွယ် မတင်စန္ဒာဝင်း၊ အသက် ၃၅ နှစ်အရွယ် ဒေါ်ငြိမ်းအိဖြိုးကျော်၊ အသက် ၅၀ အရွယ် ဒေါ်စန်းချိုသိုက်နှင့် မြောက်ဦး မြို့နယ်၊ ပန်းမော်ကျေးရွာမှ လူငယ်စာရေးဆရာမင်းဒီပါတို့ကိုလည်း PDF အား ငွေထောက်ပံ့သည်ဟုဆိုကာ အကြမ်းဖက်မှု တိုက်ဖျက်ရေး ဥပဒေပုဒ်မ ၅၀(ည)ဖြင့် အလုပ်ကြမ်းနှင့် ထောင်ဒဏ် ၁၀ နှစ်စီ အသီးသီး ချမှတ်ခံထားရပြီး သံတွဲမြို့နယ်၊ သလူချောင်းကျေးရွာမှ ကိုတင်မောင်ထွန်းကိုလည်း ပြီးခဲ့သည့် မေလ ၂၅ ရက်နေ့တွင် အကြမ်းဖက်မှုတိုက်ဖျက်ရေးဥပဒေပုဒ်မ ၄၉(က)ဖြင့် ထောင် ၁၀ နှစ်ချမှတ်ခံထားရသည်ဟု သိရသည်။

(NN-8)