မိသားစုအကျပ်အတည်းနှင့်အလုပ်ကိုင်အခက်အခဲကြောင့် စစ်ရှောင်တစ်ဦး မိမိကိုယ်ကိုယ် ဓားဖြင့်ထိုးကာ သေကြောင်းကြံစည်

နိရဥ္စရာ၊ ဇူလိုင် ၃ဝ /၂ဝ၂၂

ရခိုင်ပြည်နယ် ကျောက်တော်မြို့တွင် စစ်ဘေးရှောင်အမျိုးသားတစ်ဦးသည် မိသားစုအကျပ်အတည်းနှင့် အလုပ်ကိုင် အခက်အခဲများကြောင့် မိမိကိုယ်ကို ဓားဖြင့်ထိုးကာ သေကြောင်းကြံစည်ခဲ့သည်ဟု သိရသည်။

သေကြောင်းကြံသူမှာ ကျောက်တော်မြို့ နေပူခံစစ်ဘေးရှောင်စခန်းမှ သားသမီး ၃ ဦးဖခင် ဦးမောင်ဖြူလှ (၅၃ နှစ်)ဖြစ်သည်။

သူသည် ယနေ့ ဇူလိုင်လ ၃ဝ ရက် နေ့လယ် ၁ နာရီခန့်တွင် သူနေထိုင်ရာ စစ်ဘေးရှောင် စခန်းတန်းလျားရှိ သူ၏အခန်းတွင် မိသားစုဝင်များမရှိချိန် အရိုးအသွား ၈ လက်မခန့်ရှိ ဓားဖြင့် ဝမ်းဗိုက်ကိုထိုးသွင်းကာ သေကြောင်းကြံခဲ့ခြင်းဖြစ်သည်ဟု စခန်းနေသူများက နိရဥ္စရာကို ပြောသည်။

စခန်းနေသူတစ်ဦးက “သူ့အမျိုးသမီးလည်း မျှစ်သွားချိုးချိန်း၊ သားသမီးတွေလည်း ကျောင်းသွားနေချိန် တစ်ယောက်မှ မရှိတဲ့အချိန်မှာ အခုလို ကိုယ့်ကိုကိုယ်ဓားနဲ့ထိုးပြီး သေကြောင်းကြံတာပါ”ဟု ပြောသည်။

ဦးမောင်ဖြူလှတွင် ၄ လက်မခန့် ထိုးသွင်းဒဏ်ရာ ၁ ချက်ရခဲ့ပြီးနောက် ကျောက်တော်ဆေးရုံသို့ ပို့ဆောင်ထားရသည်ဟု သိရသည်။

သူသည် အလုပ်အကိုင်မရှိဘဲ စိတ်အားငယ်မှုကြောင့် ယခုကဲ့သို့ အဆုံးစီရင်ခြင်းဖြစ်သည်ဟု နေပူခံစစ်ဘေးရှောင်စခန်းတာဝန်ခံ ဦးမောင်အေးစောက ပြောသည်။

“ကိုယ့်ဟာကို ထိုးတာ။ သေတော့ မသေဘူး။ အခုဆေးရုံမှာ ဓာတ်မှန်ရိုက်ဖို့လုပ်နေကြတယ်”ဟု ပြောသည်။

ဓာတ်မှန်အဖြေအပေါ်မူတည်ပြီး အသက်အန္တရာယ် စိုးရိမ်ရမှုရှိ/မရှိကို သိနိုင်မည်ဟုလည်း ကူညီပေးနေသူများက ပြောသည်။

ဦးမောင်ဖြူလှတွင် ဇနီးနှင့်အတူ မူလတန်းနှင့် အလယ်တန်းတက်နေသည့်သားသမီး ၃ ဦးရှိပြီး ဇနီးဖြစ်သူက ရှာဖွေလုပ်ကိုင်ကျွေးမွေးနေရသည်ဟု သိရသည်။

သူတို့မိသားစုသည် ကျောက်တော်မြို့နယ် ပြိုင်းတိုင်းကျေးရွာမှဖြစ်ပြီး ပြီးခဲ့သည့် ၂ဝ၁၉ ခုနှစ်၊ မတ်လအတွင်း ကျေးရွာအနီးတိုက်ပွဲများပြင်းထန်ခဲ့ချိန်တွင် ကျောက်တော်သို့ ထွက်ပြေး တိမ်းရှောင်လာခဲ့ကြသူများဖြစ်သည်ဟု သိရသည်။