မာန်အောင်ကျွန်းပေါ်ရှိကျေးရွာများတွင် ULA/AA ကိုမထောက်ခံရန်ပြောဆိုမှုနှင့်အတူ ဆက်စပ်မှုရှိသူအချို့ကိုဖမ်းဆီးရန် ရှာဖွေမှုများပြုလုပ်နေ

နိရဥ္စရာ၊ ဇူလိုင် ၃၁/၂၀၂၂

ရခိုင်ပြည်နယ်၊ မာန်အောင်မြို့နယ်၊ မာန်အောင်ကျွန်းပေါ်ရှိ ကျေးရွာများတွင် ရက္ခိုင့်အမျိုးသား အဖွဲ့ချုပ်/ ရက္ခိုင့်တပ်တော်(ULA/AA) ကို မထောက်ခံကြရန် စစ်ကောင်စီတပ်က ပြောဆိုစည်းရုံးရေးများရှိသလို တခြားတစ်ဖက်တွင်လည်း ULA/AAနှင့် ဆက်စပ်သူအချို့ကို စစ်တပ်က ယခုရက်ပိုင်းအတွင်း အပြင်းအထန်ရှာဖွေမှုများရှိနေကြောင်း သတင်းရရှိသည်။

ဇူလိုင်လ ၂၉ ရက်နေ့က ပေတပင်ကျေးရွာမှ ULA/AA နှင့်ဆက်စပ်သူတစ်ဦး၏ နေအိမ်ကို စစ်တပ်၊ရဲ၊ လဝကနှင့် ကျေးရွာ အုပ်ချုပ်ရေးမှူးအပါအဝင် အင်အား ၂၀ ခန့် က ဝင်ရောက်ရှာဖွေခဲ့ပြီး အိမ်ထောင်စုစာရင်း၊ မှတ်ပုံစသည့်  အထောက်အထားများကို စစ်ဆေးခဲ့ပြီး မပြသနိုင်ပါက ယောကျ်ားဖြစ်သူအစား ဇနီးဖြစ်သူကို ဖမ်းဆီးသွားမည်ဟု ခြိမ်းခြောက်ခဲ့ကြောင်း ကိုယ်တိုင် ခြိမ်းခြောက်ခံခဲ့ရသည့် အမျိုးသမီးတစ်ဦးက ပြောသည်။

"သူတို့လာစစ်တုန်းက ကျမအမျိုးသားကိုမေးတယ်။ သူမရှိဘူးပြောတော့ အိမ်ထောင်စုစာရင်းနဲ့ မှတ်ပုံတင်ပြခိုင်းတယ်။ အမျိုးသားကို မတွေ့ရဘဲ အထောက်အထားတွေလည်း မပြနိုင်ရင် သူတို့က အမျိုးသမီးဖြစ်တဲ့ ကျမကို စခန်းခေါ်သွားရမယ်လို့ပြောပါတယ်။ အိမ်ပေါ်ထိ တက်မွှေခဲ့တယ်။ ဘာလို့ရှာကြလဲဆိုတော့ ပြောစရာဆိုစရာတွေရှိတယ်။ အေအေနဲ့ပတ်သက်လို့လုပ်နေကိုင်နေလို့ စစ်ဆေးဖို့အတွက်လာတယ်လို့ပြောပါတယ်" ဟု ပြောသည်။

ယင်းအပြင် ဇူလိုင်လ ၂၈ ရက်နေ့ကလည်း သစ်ပုံကျေးရွာနှင့် ဘဲအင်းကျေးရွာမှ ဒေသခံနေအိမ် ၂ အိမ်ကို ဝင်ရောက်ရှာဖွေ စစ်ဆေးခဲ့ပြီး ULA/AA နှင့် အဆက်အသွယ်မပြုလုပ်ရန်နှင့် ကူညီထောက်ပံ့မှု၊ ထောက်ခံမှုများမပြုလုပ်ရန် ပြောဆိုခဲ့ကြောင်း စစ်ဆေးခံခဲ့ရသည့် မိသားစုဝင်များကပြောသည်။

ULA/AA အဖွဲ့ဝင်မဟုတ်သော်လည်း အမျိုးသားရေးအတွက် နိုင်သည့်ဘက်က ကူညီ ဆောင်ရွက်မှုများပြုလုပ်ခြင်းကြောင့် ဖမ်းဆီးမည်ကို ကြောက်၍ ရှောင်တိမ်းနေရကြောင်း၊ ထိုသို့ ရှောင်တိမ်းနေရသဖြင့်  အသက်မွေးဝမ်းကြောင်းနှင့် စီးပွားရေးထိခိုက်မှုများရှိနေသည်ဟု  ရှောင်တိမ်းနေရသူတစ်ဦးက ပြောသည်။

"ကိုယ့်ရဲ့စီးပွားရေးကိုအများကြီး ထိခိုက်သွားတယ်ပေါ့။ ကိုယ့်ရဲ့အသက်မွေးဝမ်းကြောင်း အတွက်တစ်နေ့ လုပ်မှတစ်နေ့ရှာနေရတဲ့လူတစ်ယောက်အနေနဲ့ ကျနော်တို့မှာ ကိုယ့်အလုပ်ကို မလုပ်နိုင်ဘဲ ရှောင်နေရတယ်။ ရှောင်တာက ကျနော်ရှောင်နေလို့ရတယ်။ ကျနော့ဇနီး၊ ကျနော့် သားသမီးတွေကတော့ရှောင်လို့မရဘူးလေ။ ကိုယ့်အိမ်မှာကိုမနေနိုင်ဘူးဆိုတော့ ထိခိုက်မှုတွေတော့ အများကြီးရှိတာပေါ့"ဟု ပြောသည်။

မာန်အောင်မြို့အခြေစိုက် ကမူတောင်တပ်စခန်းမှ စစ်သားများမှာလည်း အရပ်ဝတ်လဲကာ ULA/AA တပ်ဖွဲ့ဝင်များနှင့် ဆက်စပ်သံသယရှိသူများကို ရှာဖွေမှုများ ဆက်တိုက်ဆိုသလို ပြုလုပ်လျက် ရှိနေကြောင်း ကမူတောင်တပ်နှင့် အနီးအပါးမှ ဒေသခံတစ်ဦးက ပြောသည်။

"အခုသူတို့က ဘောလုံးဝတ်စုံတွေဝတ်ပြီး ရပ်ရွာတွေမှာ တခြားနေရာတွေမှာရော ULA/AA နဲ့ပတ်သက်ပြီး ဘယ်သူတွေလုပ်နေလဲဆိုတာ ဝင်ပြီးစုံစမ်းတာမျိုးတွေ၊ သွားလာနေတာမျိုးတွေ ရှိနေတာ တွေ့ရပါတယ်" ဟု ပြောသည်။

ရခိုင်ပြည်နယ်ရှိ မာန်အောင်မြို့နယ်သည် မာန်အောင်ကျွန်းပေါ်တွင် သီးသန့်တည်ရှိသည့် မြို့နယ် တစ်ခုဖြစ်ပြီး  ULA/AA ၏ ထိုးဖောက်ဝင်ရောက်စည်းရုံးမှုများ ရှိနေသဖြင့် စစ်ကောင်စီဘက်ကလည်း ULA/AA ၏  စည်းရုံးမှုကို တန်ပြန်သည့်အနေဖြင့်  ယခုလို ပြုလုပ်လာခြင်း ဖြစ်ကြောင်း သိရသည်။

လက်ရှိ ရခိုင်တွင် AA က စစ်တပ်အရာရှိတချို့ကိုဖမ်းဆီးထားပြီး စစ်တပ်က မာန်အောင်အပါအဝင် တခြားမြို့နယ်များတွင်လည်း ULA/AA နှင့်ဆက်စပ်သူများကိုဆက်တိုက် စစ်ဆေးရှာဖွေမှုများရှိနေပြီး ဖမ်းဆီးခံရသူများလည်း ရှိနေဆဲဖြစ်သည်။ (NN-7)