စစ်တပ်ကဖမ်းဆီးထားသည့် ကျောက်ဖြူ စနဲ ဒေသခံ ၁ ဦး နိုင်ငံတော်ဆူပူလှုံ့ဆော်မှုဆိုင်ရာဥပဒေပုဒ်မဖြင့် အမှုဖွင့်ခံရ

ရေးသူ: Web Master
| ရက်စွဲ: ၀၈ သြဂုတ် ၂၀၂၂
| ကြည့်ရှုသူ: 5k

နိရဥ္စရာ၊ သြဂုတ် ၇/၂၀၂၂

ရခိုင်ပြည်နယ်၊ ကျောက်ဖြူမြို့နယ် စနဲမြို့တွင် စစ်တပ်၏ဖမ်းဆီးခြင်းကိုခံထားရသည့် ဒေသခံ ၁ ဦးသည် နိုင်ငံတော်ဆူပူလှုံ့ဆော်မှုဆိုင်ရာဥပဒေပုဒ်မ ၅၀၅(က)ဖြင့် အမှုဖွင့်ခံလိုက်ရကြောင်း မိသားစုဝင်များက ပြောသည်။

အမှုဖွင့်ခံရသူမှာ စနဲမြို့၊ စံပယ်ချောင်ရွာသား ကိုတင်မျိုးထွန်း (၂၄ နှစ်)ဖြစ်ပြီး ကျောက်ဖြူ မြို့နယ်တရားရုံး၌ ပုဒ်မ ၅၀၅(က)ဖြင့် အမှုဖွင့်ခံထားရကြောင်း မိသားစုဝင်တစ်ဦးက ပြောသည်။

"ကျောက်ဖြူမြို့နယ်တရားရုံးမှာ အမှုဖွင့်လိုက်တာပါ။ ဒီလ ၁၂ ရက်နေ့ ရုံးထုတ်မယ်လို့ ပြောပါတယ်" ဟု ပြောသည်။

သူသည် စနဲစခန်းမှူး ရဲအုပ်ကျော်ဇင်ဝင်းကို ဇူလိုင် ၂၄ ရက် နံနက်ပိုင်းက ရက္ခိုင့်တပ်တော်(AA)က ဖမ်းဆီးသွားပြီးနောက် စစ်ကောင်စီတပ်ဖွဲ့ဝင်များ၏ ဖမ်းဆီးခြင်းကိုခံခဲ့ရသူဖြစ်သည်။

ကိုတင်မျိုးထွန်းအပါအဝင် ဒေသခံ ၁၄ ဦးကို စစ်တပ်က စနဲစခန်းမှူးဖမ်းဆီးခံရမှုနှင့်ပတ်သက်ပြီး ဇူလိုင်လ ၂၄ ရက်တွင် ဖမ်းဆီးခဲ့ပြီးနောက် အမျိုးသမီး ၄ ဦးအပါအဝင် ၁၃ ဦးကို ပြန်လွှတ်ပေးကာ ကိုတင်မျိုးထွန်းကို ဆက်လက် ဖမ်းဆီးထားခဲ့ပြီး ယခုကဲ့သို့ အမှုဖွင့်တရားစွဲဆိုလိုက်ခြင်းဖြစ်သည်။

လက်ရှိတွင် ကိုတင်မျိုးထွန်းကို ကျောက်ဖြူထောင်ချုပ်တွင် ထိန်းသိမ်းထားပြီး သြဂုတ်လ ၁၂ ရက်တွင် ကျောက်ဖြူမြို့နယ်တရားရုံး၌ ရုံးထုတ်စစ်ဆေးမည်ဟု သိရသည်။ (NN-7)