၇ခိုင်ရှေးဟောင်း သမိုင်းဝင် ကျောက်တော်မြို့ရှိ မဟာမုနိဘုရားကုန်းတော်ပေါ်မှ ယနေ့ည ၈ နာရီခန့်တွင် လက်နက်ကြီး၊ လက်နက်ငယ် ပစ်ခတ်သံများကို အနီးအနားရှိ ပတ်ဝန်းကျင် ကျေးရွာများကကြားခဲ့၇သည်ဟု ဒေသခံများက ပြောကြားသည်။

၎င်းဘုရားကုန်းတော်ပေါ်တွင် စစ်ကောင်စီတပ်မှ နေရာယူ စခန်းချထားပြီး မည်သည့်အတွက်ကြောင့် ယခုကဲ့သို့ ညအချိန်လက်နက်ကြီး၊ လက်နက်ငယ်များ ပစ်ခတ်သည်ကို ဒေသခံများအနေဖြင့် လောလောဆယ် မသိနိုင်သေးဟု ရွာသားတစ်ဦးက နိရဉ္စရာသတင်းဌာနသို့ပြောသည်။

“ ကျွန်တော်တို့ထင်တာက ဘုရားပေါ်ကနေပစ်နေတယ်လို့ ထင်တယ်။ ဒီဘက်မှာ တစ်ခုမှထူးခြားမှု မရှိဘဲရမ်းသန်းပစ်နေတာပါပဲ။ ဘယ်ကိုပစ်တယ်လို့လည်း မသိဘူး။ ဘာကြောင့်ပစ်သလဲဆိုတာလည်း လောလောဆယ် မသိ၇သေးဘူး”ဟုပြောသည်။

၎င်းဘုရားကုန်းတော်ပေါ်က လက်နက်ကြီးသံ ၃ ချက် ၊ လက်နက်ငယ်သံ အကြိမ်အချက်ပေါင်း ၂၀ခန့်ကြားလိုက်၇သည်ဟုလည်း ကျောက်တော်မြို့ခံတစ်ဦးက ပြောသည်။

“ဘုရားဘက်ကနေကြားလိုက်၇တာပါ။နှစ်ဘက်ပစ်ခတ်သံတော့ မဟုတ်ဘူး။ တစ်ဘက်တည်းက ပစ်နေတဲ့အသံပါ။ဘယ်ဘက်ကိုပစ်မှန်းတော့ မသိဘူး”ဟုပြောသည်။

မဟာမုနိဘုရားပေါ်တွင် စစ်ကောင်စီတပ်ဖွဲ့ဝင်အင်အား၆၀ ခန့်က ဘုရားပေါ်တွင်သဲအိတ်များ၊ ဘန်ကာများတည်ဆောက်ပြီး စခန်းထိုင်ကာ အခိုင်အမာတပ်စွဲနေထိုင်လျက်ရှိကြောင်း ဒေသခံများကပြောသည်။

ပြီးခဲ့သည့် သြဂုတ်လ၁ ရက် မွန်းတည့် ၁၂ နာရီခန့်က မဟာမုနိဘုရားမြောက်ဘက်မုခ်၀အနီး ဒေါ်စိန်ထမင်းဆိုင်ရှေ့တွင်ထမင်းလာစားသည့် ဒေသခံ ၃ ဦးကို ဘုရားတွင် တပ်စွဲထားသည့်စစ်ကောင်စီတပ်ဖွဲ့ဝင်များကဖမ်းဆီးခဲ့ပြီး ယနေ့အထိ မိသားစုနှင့် အဆက်အသွယ်မရသေးဟုသိ၇သည်။

ယခင်တိုက်ပွဲကာလအတွင်းက ရွာလုံးကျွတ်နီးပါးမီးရှို့ခံခဲ့ရသည့် ကျောက်တော်မြို့နယ်ရှိ တောင်ပေါက်နှင့်ဘုရားပေါင်းကျေးရွာများသို့လည်း ယနေ့နံနက်က တပ်ဖွဲ့ဝင်အင်အား ၁၀၀ခန့်ရှိ စစ်ကြောင်းတစ်ခုဝင်ရောက်လာ၍ ရွာသားများ ထွက်ပြေးခဲ့၇သည်ဟု သတင်းရရှိသည်။