စစ်တွေ(ရေချမ်းပြင်)-အငူမော်ရေယာဉ်ကူးတို့လိုင်းနှင့် အငူမော်-မောင်တောကားလမ်းကို အကန့်အသတ်မရှိပိတ်၊ မြန်မာစစ်တပ်က ၎င်းဒေသတွင် အင်အားများထပ်မံဖြည့်တင်းနေ

Preview

စစ်တွေ(ရေချမ်းပြင်)-အငူမော်ရေယာဉ်ကူးတို့လိုင်းနှင့် အငူမော်-မောင်တောကားလမ်းကို အကန့်အသတ်မရှိပိတ်၊ မြန်မာစစ်တပ်က ၎င်းဒေသတွင် အင်အားများထပ်မံဖြည့်တင်းနေ

သြဂုတ် ၁၄/ ၂၀၂၂ | ကြည့်ရှုသူ :7115

နိရဉ္စရာ၊ ဩဂုတ် ၁၄/၂၀၂၂

ဩဂုတ် ၁၃ ရက်နေ့ဖြစ်ပွားခဲ့သော မေယုတောင်တိုက်ပွဲအတွင်းအထိနာခဲ့သော မြန်မာစစ်တပ်သည် ပြည်သူများ အသုံးပြုနေသည့် ခရီးလမ်းကြောင်းများကို ပိတ်ဆို့ထားလိုက်ပြီး၎င်းဒေသတွင် ရေတပ်ဇက်သင်္ဘောများဖြင့် အင်အားများထပ်မံဖြည့်တင်းနေသည်ဟု သတင်းရရှိသည်။

“ အခု ပိတ်ထားလိုက်တဲ့ ခရီးစဉ်တွေကတော့ စစ်တွေ (ရေချမ်းပြင်)နဲ့အငူမော်အကြား ရေယာဉ် ကူးတို့လိုင်းတွေဖြစ်ပါတယ်။ ဒီနေ့မနက်က စပြီးသွားလာခွင့် ပိတ်ထားပါတယ်။အငူမော်ကနေ မောင်တောထိ သွားတဲ့ ကားလမ်းကို ပိတ်ထားပါတယ်။ အခု အသွားအလာ လုံး၀ကင်းမဲ့သွားပါပြီ”ဟုဆိုသည်။

၎င်းနောက် စစ်ကောင်စီတပ်သည် ရေတပ် ဇက်ရေယာဉ်များဖြင့် စစ်သားများကိုအငူမော်ဆိပ်ကမ်းမှ တဆင့် အင်အားများဖြည့်တင်းနေသည်ဟုဆိုသည်။

“ အင်အားကတော့ မနက်က စစ်သား ၁၀၀ ဝန်းကျင်လောက်တော့ရှိမယ်ထင်ပါတယ်။မနေ့ တိုက်ပွဲ ဖြစ်တဲ့ နေရာက အငူမော်နဲ့ သိပ်မဝေးတော့ အဲဒီဘက်ကို စစ်ကြောင်းထိုးမလားတော့မပြောတတ်ဘူး။ ပြည်သူတွေက အကုန်လုံးကိုယ့်အိမ်ထဲမှာနေကြတော့ အခြေအနေကို သိပ်မသိကြပါဘူး”ဟုပြောသည်။

မေယုမြစ်၀ကို ဖြတ်ပြီး ရေချမ်းပြင်-အငူမော်ဆိပ်ကမ်း အကြား ပြေးဆွဲနေသည့်ကူးတို့ စက်လှေများ အားလုံးကို ယနေ့နံနက်မှစတင်ကာ စစ်တပ်က ထွက်ခွာခွင့်ပိတ်ပင်ထားလိုက်သဖြင့် ရန်ကုန်က လာသည့် ကုန်တင်ကားများမှာ အထူအခက်အခဲဖြစ်နေကြသည်ဟု အငူမော်-မောင်တော ကားသမား တစ်ဦးကလည်း ပြောသည်။

“ဒီနေ့မနက်ကနေ စစ်တပ်ကဘုတ်တွေကို တစ်စီးမှမထွက်၇ဘူးလို့ တားမြစ်ထားတယ်။ အခက်အခဲတွေကတော့လောလောဆယ်ကတော့ စစ်တွေတို့၊ ရန်ကုန်တို့ကနေလာတဲ့ကားတွေက မနေ့ကနေအငူမော်ဆိပ်ကမ်းမှာ အိပ်ပြီးစောင့်နေ၇တယ်”ဟု ပြောသည်။

လက်ရှိတွင် အငူမော်-မောင်တောကားလမ်းရှိအငူမော်ဂိတ်၊ ကိုးတန်ကောက်ဂိတ်နှင့် အင်းဒင်ဂိတ်စသည့် နယ်ခြားစောင့်တပ် စစ်ဆေးရေးဂိတ်များတွင်လည်း ကားများ၊လူများနှင့် ဆိုင်ကယ်များကိုပါယနေ့ နံနက်ကစတင်ပြီး ဖြတ်သန်းသွားလာခွင့်ပိတ်ပင်ထားသည်ဟုသိ၇သည်။

ယခုကဲ့သို့ ရက်အကန့်အသတ်မရှိပိတ်ထားသည့်အတွက်လက်ရှိတွင် အငူမော်ဆိပ်ကမ်း၌ ဘင်္ဂလားဒေ့ရှ်နယ်စပ်ကုန်သွယ်ရေးမှတဆင့်တင်ပို့ရမည့်ကုန်များကိုတင်ဆောင်လာသည့်ကုန်ကားများ သောင်တင်နေရပြီး ကုန်စိမ်းကားများတွင်အခက်အခဲများဖြစ်ပေါ်လျက်ရှိသည်ဟု ကုန်သည်တစ်ဦးက ပြောသည်။

“ဒီနေ့ကနေစပိတ်တာ။ ဘယ်နှစ်ရက်ပိတ်မလဲမသိဘူး။လောလောဆယ်ကတော့ ပိတ်ထားတယ်။ ကားတွေက ဖြတ်လို့ မ၇ဘူး။ကျနော်တို့ကားတွေ အငူမော်မှာ မနေ့ကနေ သောင်တင်နေတယ်။ ကုန်စိမ်းကားတွေဖြစ်နေတော့၊ငါးကားတွေဆိုတော့ Air con ဖွင့်ထား၇တယ်။ ငါးကားတွေဆိုတော့ကြာလာရင် ပျက်သွားမယ်လေ။ အဓိကတော့ လမ်းပန်းဆက်သွယ်ရေး ပြတ်သွားရင်ကုန်ဈေးနှုန်းတက်သွားမယ်လေ။ ကျနော်တို့ မောင်တောမှာက ဒီလမ်းကိုပဲအဓိကထားပြီး သွားနေကြတာလေ”ဟုပြောသည်။

ယမန်နေ့က တိုက်ပွဲကြောင့် အနီးအနားရှိ ကျေးရွာသားများမှာလယ်ယာလုပ်ငန်းခွင်သို့ မသွားရောက်ကြသလို လုပ်ငန်းခွင်သို့လည်း သွားရောက်မှု မရှိကြကြောင်း၊အိမ်ထဲမှ အိမ်ပြင်သို့ မထွက်ကြကြောင်း သိ၇သည်။

ယမန်နေ့တစ်ရက်တည်းတွင် ရသေ့တောင်မြို့နယ်ဒုံးပိုက်ကျေးရွာအထက် မယူတောင် ကျော်လမ်းနှင့် မောင်တောမြို့နယ်မြောက်ပိုင်းဝေလာတောင်အနီးတို့၌ တိုက်ပွဲများ အပြန်အလှန် ဖြစ်ပွားခဲ့သည်။

အဆိုပါတိုက်ပွဲများအတွင်း စစ်ကောင်စီဘက်ကအထိအခိုက် ကျဆုံးမှုများရှိပြီး လက်နက်ခဲယမ်းများ ကိုလည်း သိမ်းဆည်း ရမိထားသည်ဟုရက္ခိုင့်တပ်တော် (AA) ပြောခွင့်၇သူဦးခိုင်သုခက နိရဥ္စရာကိုပြောဆိုထားသည်။ စစ်တပ်ဘက်မှအထိအခိုက်အကျအဆုံးစာရင်းကိုမူ ဦးခိုင်သုခက ထုတ်ဖော်ပြောဆိုခြင်းမရှိခဲ့ပါ။

ယခုကဲ့သို့ စစ်ကောင်စီဘက်က အင်အားများထပ်မံဖြည့်တင်းနေသဖြင့် များမကြာမီ တိုက်ပွဲများ ထပ်မံဖြစ်လာနိုင်ခြေရှိနေသည်ဟု ဒေသအတွင်းစစ်ရေးလေ့လာသုံးသပ်သူများက ပြောသည်။

ဓာတ်ပုံ -အငူမော်ဆိပ်ကမ်းအတွင်း သောင်တင်နေ၇သည့် ကုန်ကားများအား ယနေ့ သြဂုတ်လ ၁၄ ရက် နံနက်ကတွေ့၇စဉ်။

#စစ်ရေး#ကျေးလက်နေပြည်သူ

မင်္ဂလာပါ လူကြီးမင်းတို့ခင်ဗျာ။ ကျနော်တို့မီဒီယာဆက်လက်ရပ်တည်ရှင်သန်ရေးအတွက် လူကြီးမင်းတို့ရဲ့ပူးပေါင်းဆောင်ရွက်မှုနဲ့ ကူညီမှုတွေကို အထူးလိုအပ်နေပါတယ်။

လှူရန်

ဆက်စပ် အကြောင်းအရာများ

တစ်နေ့တာ၏ အရေးကြီးဆုံး ပြည်တွင်းပြည်ပ သတင်းများနှင့် အဖြစ်အပျက်များကို လစဥ် လူကြီးမင်း၏ အီးမေလ်းထဲသို့ ရယူနိုင်ပါသည်

ဆက်စပ် အကြောင်းအရာများ

နောက်ဆုံးရသတင်းများ