ပလက်ဝတွင် စစ်ကောင်စီတပ်နှင့် AA တို့ အကြား ဆက်လက်တိုက်ပွဲဖြစ်ပွား

နိရဉ္စရာ၊ သြဂုတ် ၂၁/၂၀၂၂

ချင်းပြည်နယ်၊ ပလက်ဝမြို့နယ်တွင် စစ်ကောင်စီတပ်နှင့် ရက္ခိုင့်တပ်တော် (AA) တို့ အကြား ယနေ့ထပ်မံ တိုက်ပွဲဖြစ်ပွားခဲ့ကြောင်း သိရသည်

ယနေ့ သြဂုတ် ၂၁ ရက်နေ့ နံနက် ၉ နာရီခန့်တွင် ပလက်ဝမြို့နယ်၊ နှမဒါချောင်းတွင်း သူဌေးကုန်းကျေးရွာအနီး တိုက်ပွဲ ပြင်းထန်စွာ ဖြစ်ပွားခဲ့ကြောင်း၊ သေနတ်သံများကိုလည်း ကြားခဲ့ရကြောင်း ဒေသခံများက ပြောသည်။

ပလက်၀ ဒေသခံတစ်ဦးက "၉ နာရီလောက်မှာ တိုက်ပွဲအပြင်းအထန်ဖြစ်ခဲ့တယ်။ အဲ့ဒီအနီးဝန်းကျင်က AA နဲ့ တိုက်ပွဲဖြစ်နေကျနေရာဆိုတော့ AA နဲ့တိုက်ပွဲ ဆက်ဖြစ်တယ်လို့ အတည်ပြုလို့ရတယ်။ အခုတော့ လက်နက်ငယ်သံတွေ ငြိမ်သွားပြီ" ဟု ယနေ့ နံနက် ၁၀ နာရီက ပြောသည်။

ယနေ့ နံနက် ၉ နာရီမှ ၁၀ နာရီဝန်းကျင်အထိ တစ်နာရီကြာ တိုက်ပွဲဖြစ်ပွားခဲ့ပြီး လက်ရှိတွင် ခလရ(၂၈၉) တပ်ရင်းက လက်နက်ကြီးများ ပစ်ခတ်နေသည်ဟု ဒေသခံများက ပြောသည်။

ယနေ့တိုက်ပွဲဖြစ်ပွားသည့်နေရာတွင် ယမန်နေ့ သြဂုတ် ၂၀ ရက်နေ့ နေ့လယ်ပိုင်းကလည်း တိုက်ပွဲ ဖြစ်ပွားခဲ့သေးကြောင်း နောက်ထပ်ဒေသခံတစ်ဦးက ပြောသည်။ 

"မနေ့ကလည်း တိုက်ပွဲဖြစ်သေးတယ်။ နေ့လယ် ၃ နာရီဝန်းကျင်ဖြစ်မယ် ထင်တယ်။ ဒီနေ့မနက်ကတော့ ပိုပြင်းထန်တယ်လို့ ပြောရမယ်"ဟု ပြောသည်။

ပလက်ဝတွင် သြဂုတ်လ ၂၀ ရက်နေ့နှင့် ယနေ့ ၂၁ ရက်နေ့တို့တွင် ဖြစ်ပွားခဲ့သည့်တိုက်ပွဲတွင် စစ်ကောင်စီဘက်က ၄၀ ဦးခန်း ကျဆုံးပြီး AA ဘက်ကလည်း ထိခိုက်ဒဏ်ရာရရှိသူ အနည်းငယ်ရှိခဲ့ကြောင်း AA နှင့် နီးစပ်သူတစ်ဦးကပြောသည်။

ပလက်ဝတွင်ဖြစ်ပွားခဲ့သည့် တိုက်ပွဲအခြေအနေအသေးစိတ်ကို အတည်ပြုနိုင်ရန် ရက္ခိုင့်တပ်တော်(AA) ပြောခွင့်ရသူ ဦးခိုင်သုခနှင့် ရခိုင်ပြည်နယ် လုံခြုံရေးနှင့် နယ်စပ်ရေးရာဝန်ကြီး ဗိုလ်မှူးကြီးကျော်သူရတို့ကို ဆက်သွယ်မေးမြန်းထားဆဲဖြစ်သည်။

အဆိုပါ အကျဆုံးကိုစစ်ကောင်စီပြောရေးဆိုခွင့်ရှိသူနှင့် အေအေပြောရေးဆိုခွင့်ရှိသူ ဦးခိုင်သုခကို ဆက်သွယ်မေးမြန်း၍ မရသေးသဖြင့် နိရဉ္စရာသတင်းဌာနအနေဖြင့် သီးခြားအတည်ပြုနိုင်ခြင်း မရှိသေးပါ။

ရက္ခိုင့်တပ်တော်(AA) နှင့် စစ်ကောင်စီတပ်တို့သည့် ယခုသြဂုတ်လအတွင်း ရသေ့တောင်၊ မောင်တော နှင့် ချင်းပြည်နယ်၊ ပလက်ဝမြို့နယ်တို့တွင် တကျော့ပြန်တိုက်ပွဲများ ဆက်တိုက်ဖြစ်ပွားလျက်ရှိပြီး ယခင်တိုက်ပွဲများထက် ပိုပြင်းထန်လာနိုင်ကြောင်း ရခိုင်အရေးလေ့လာသုံးသပ်သူများက ပြောဆိုထားသည်။ 

လက်ရှိတွင် တကျော့ပြန်စစ်ပွဲများကြောင့် စစ်ဘေးရှောင် ထောင်နှင့်ချီပြီး ထပ်တိုးလာကြောင်း သတင်းရရှိသည်။

(NN-7)