မောင်တောမြို့နယ်တွင် တာဝန်ထမ်းဆောင်နေသည့် ဆရာ၊ဆရာမများအပါအဝင် အစိုးရဝန်ထမ်းများ ရိက္ခာပြတ်လပ်မှုနှင့် ရင်ဆိုင်နေကြရပြီ

နိရဥ္စရာ၊ သြဂုတ် ၂၃ / ၂ဝ၂၂

ရခိုင်ပြည်နယ် မောင်တောမြို့နှင့် ရသေ့တောင်မြို့နယ်တို့ကိုဆက်သွယ်ထားသည့် မောင်တော-အငူမော် ကားလမ်းကို စစ်တပ်ကပိတ်ထားပြီး ဆန်အပါအဝင်ရိက္ခာများ သယ်ယူခွင့်ကိုလည်း တင်းတင်း ကျပ်ကျပ်တားမြစ်ထားသဖြင့်  အဆိုပါဒေသများတွင် တာဝန် ထမ်းဆောင်နေသည့် ဆရာ၊ ဆရာမများအပါအဝင် အစိုးရဝန်ထမ်းများအနေဖြင့် စားနပ်ရိက္ခာ ပြတ်လပ်မှုနှင့် ရင်ဆိုင် နေကြရသည်ဟု သိရသည်။

မောင်တောမြို့နယ်သည် ရခိုင်ပြည်နယ်အတွင်း အဓိကကားလမ်းကို အသုံးပြုသော မြို့နယ် တစ်ခုဖြစ်ပြီး လက်ရှိကားလမ်းကို ပိတ်ထားသည်မှာ ၁၀ ရက် ရှိနေပြီ ဖြစ်သဖြင့် သယ်ယူပို့ဆောင်ရေးလုပ်ငန်းများ အားလုံး ရပ်တန့်နေသည်ဟု ဒေသခံများက ပြောဆိုသည်။

လက်ရှိ ကြုံတွေ့နေရသည့် အခက်အခဲများနှင့် ပတ်သက်ပြီးမောင်တောမြို့နယ်တွင် တာဝန်ထမ်းဆောင်နေသည့် အမည်မဖော်လိုသည့် ကျောင်းဆရာတစ်ဦးက “ဒီမှာက အစိုးရပေးတဲ့ လစာ ၂ လစာဆိုပေမဲ့ ကုန်စျေးနှုန်းက ၃ ဆအထိမြင့်တက်နေတယ်။ ပိုက်ဆံရှိပေမဲ့ ဝယ်စားလို့မရတော့ဘူး။ အဓိက လမ်းပိတ်ထားတာနဲ့ဆိုင်တယ်။ ကားတွေ မထွက်ရတာနဲ့ ဆိုင်တယ်”ဟု နိရဥ္စရာကို ပြောသည်။

ကားလမ်းကို ပိတ်ဆို့ထားသည်သာမက တရွာနှင့် တရွာအကြားတွင်လည်း  ဆန်အပါအဝင် စားနပ်ရိက္ခာများ သယ်ယူခွင့်ကို တားမြစ်ထားကြောင်း၊  မောင်တောမြောက်ပိုင်းတွင် အဓိက လူသုံးကုန် စားနပ်ရိက္ခာများ ဖြစ်ကြသည့်  ဆန်၊ ဆီ၊ ငရုပ်နှင့် ကြက်သွန်တို့ ပြတ်လပ်နေခြင်းဖြစ်ပြီး ဝယ်ယူ၍ လုံးဝ မရတော့ကြောင်း ၎င်းက ပြောကြားသည်။

ကျေးရွာများရှိ စျေးဆိုင်သည်များအနေဖြင့်လည်း မောင်တောမြို့ကိုတက်၍ ဆန်အပါအဝင် စားသောက်ကုန်များ ဝယ်ယူရ မရသဖြင့် မောင်တောမြို့နယ် မြောက်ပိုင်းရှိ ကျေးရွာများတွင် ဆန်နှင့် စားသောက်ကုန်ပစ္စည်းများ လုံး၀ပြတ်လပ်နေပြီ ဖြစ်သည်ဟု ဆိုသည်။မောင်တောမြို့နယ် မြောက်ပိုင်းတွင်သာမက မောင်တောမြို့နယ် တောင်ပိုင်း အငူမော်- မောင်တော ကားလမ်းတစ်လျှောက်ရှိ ကျေးရွာများတွင် နယ်မှတာဝန်ထမ်းဆောင်နေရသော အစိုးရဝန်ထမ်းများတွင်လည်း စားနပ်ရိက္ခာများ ပြတ်တောက်နေပြီဟု မောင်တောမြို့နယ် ကျောက်ပန္ဒူ ကျေးရွာအလယ်တန်းကျောင်း(ခွဲ)မှ ပညာရေးဝန်ထမ်းတစ်ဦးက နိရဥ္စရာကိုပြောသည်။

“ဆန်တစ်ခုတည်း ပြတ်နေတာမဟုတ်ဘူး။ ငရုပ်သီး၊ ဆီ၊ ကြက်သွန်ကအစ အားလုံး တစ်ခုမှ မရှိတော့ဘူး။ အခုက ရွာမှာလည်း ပစ္စည်းတွေမရှိတော့ဘူးဆိုတော့ ရှိတဲ့သူတွေကနေ မျှစားနေရတယ်။ ကြာလာတော့ မျှစားလို့လည်း မရတော့ဘူး။ ပြီးတော့ ကျနော်တို့မှာ ကျောင်းမှာလိုအပ်တဲ့ ကျောင်းသုံးကိရိယာတွေလည်း ပြတ်နေပြီ”ဟု ပြောသည်။

ကျောက်ပန္ဒူကျေးရွာအလယ်တန်းကျောင်း(ခွဲ)ကျောင်းဆိုလျှင် ပညာရေးဝန်ထမ်း ၁၉ ဦးရှိပြီး အများစုမှာ ရသေ့တောင်၊ မောင်တောနှင့် တောင်ကုတ်စသည့် မြို့နယ်များမှ လာရောက် တာဝန် ထမ်းဆောင်နေရသူများဖြစ်သည်ဟု သိရသည်။

မောင်တောမြို့နယ်မြောက်ပိုင်းရှိ အခြား ဌာနဆိုင်ရာ ဝန်ထမ်းတစ်ဦးကလည်း ၄င်းတို့တွင်လည်း စားနပ်ရိက္ခာပြတ်တောက်ပြီး အခက်အခဲဖြစ်နေသလို မောင်တောမြို့သို့ ပြန်မည်ဆိုလျှင် ပြန်ရန် အခက်အခဲဖြစ်နေကြသည်ဟု ပြောသည်။

မောင်တောမြို့နယ်သည် နယ်စပ်တွင်တည်ရှိသဖြင့် ရခိုင်ပြည်နယ်အတွင်းက ကုန်စျေးနှုန်းကြီးမြင့်သောမြို့နယ် တစ်ခုဖြစ်ပြီး ယခုကဲ့သို့သာ ရေရှည်ကားလမ်းကို ပိတ်ထားပါက ရိက္ခာများပြတ်လပ်ကာ အငတ်ဘေးနှင့်ရင်ဆိုင်နိုင်သဖြင့် တာဝန် ထမ်းဆောင်ရာတွင် စိတ်အနှောင့်အယှက်များ ပိုမိုဖြစ်လာမည်ဟုလည်း ပြောဆိုသည်။

မောင်တော-အငူမော်ကားလမ်းတစ်လျှောက်ကို စစ်တပ်က ပြီးခဲ့သည့် သြဂုတ်လ ၁၄ ရက်မှစတင်ကာ ရက်အကန့်အသတ်မရှိပိတ်ထားခဲ့ခြင်းဖြစ်ပြီး ယနေ့ သြဂုတ်လ ၂၃ ရက်ဆိုလျှင် ၁ဝ တာကြာမြင့်သွားပြီ ဖြစ်သည်။

 ပြီးခဲ့သည့် သြဂုတ်လ ၁၃ ရက်က မောင်တောမြို့နယ်နှင့် ရသေ့တောင်မြို့နယ်တို့တွင် စစ်တပ်နှင့် ရက္ခိုင့်တပ်တော်(AA)တို့ တိုက်ပွဲများအပြန်အလှန်ဖြစ်ပွားခဲ့ပြီးနောက် မောင်တော-အငူမော် ကားလမ်းတစ်လျှောက်ကို စစ်တပ်က  ရက်အကန့်အသတ် မရှိပိတ်ထားခဲ့ခြင်းဖြစ်သည်။

လက်ရှိတွင်လည်း မောင်တောနှင့် ရသေ့တောင်မြို့နယ်တွင် စစ်တပ်နှင့် AA တို့ စစ်ရေး တင်းမာလျက်ရှိပြီး စစ်တပ်က ဒေသတွင်း အသွားအလာများကိုပိတ်ဆို့ထားပြီး စားနပ်ရိက္ခာများကို ဖြတ်တောက်လျက်ရှိသည်ဟု ဒေသခံများက ပြောသည်။

နှစ်ဘက်စစ်ရေးတင်းမာနေမှုများနှင့် ကားလမ်းပိတ်ထားသည့်အတွက် ကားလမ်းတစ်လျှောက်ရှိ ကျေးရွာအများအပြားမှ ဒေသခံထောင်နှင့်ချီကာ နီးစပ်ရာကျေးရွာများသို့ ထွက်ပြေး တိမ်းရှောင်နေကြရသည်ဟုလည်း သိရသည်။

 ဓာတ်ပုံ - မောင်တောမြို့နယ်အတွင်း တာဝန်ထမ်းဆောင်နေသည့် ပညာရေးဝန်ထမ်းအချို့အားတွေ့ရစဉ်။

Photo - မောင်တောခရိုင်ပညာရေးမှူးရုံး facebook