မာန်အောင်မြို့နယ် ဘဲအင်းကျေးရွာမှအိမ်တချို့ကို စစ်တပ်ကစီးနင်းရှာဖွေပြီး ကျေးရွာအုပ်ချုပ်ရေးမှူးကိုပါးရိုက်

နိရဉ္စရာ၊ သြဂုတ် ၂၃/၂၀၂၂

ရခိုင်ပြည်နယ်၊ မာန်အောင်မြို့နယ်၊ ဘဲအင်းကျေးရွာမှ အိမ်တချို့ကို စစ်ကောင်စီတပ်က ဝင်ရောက် စီနင်းရှာဖွေပြီး ဘဲအင်းကျေးရွာအုပ်ချုပ်ရေးမှူးကို တပ်ရင်းမှူးက ပါးရိုက်သွားခဲ့သည်ဟု မျက်မြင် ဒေသခံများက နိရဉ္စရာသတင်းဌာနကို ပြောကြားသည်။

“ မနေ့ က သြဂုတ်လ ၂၂ ရက် ည ၇ နာရီခွဲခန့်မှာ  ဘဲအင်းကျေးရွာထဲကို မာန်အောင်မြို့နယ်မှာ အခြေစိုက်တဲ့ ကမူတောင်အခြေစိုက်စစ်တပ်က တပ်ရင်းမှူးရယ်။ နောက် မာန်အောင်မြို့မ ရဲစခန်းမှူးတို့ ဦးဆောင်ပြီး လက်နက်တွေနဲ့ အင်အား ၂၀ ကျော်ခန့်နှင့် ဝင်ရောက်လာပြီး  နေအိမ်များကို စီးနင်း ရှာဖွေပါတယ်။ ရှာဖွေတဲ့သူတွေကို မတွေ့တော့ ကျေးရာအုပ်ချုပ်ရေးမှူးကို ပါးအချက် နှစ်ဆယ်လောက်ရိုက်ပါတယ်။ မင်းမသိရကောင်းလာဆိုပြီး ဆဲဆိုပြီးပါးရိုက်တာပါ။  နေအိမ် တချို့ကိုလည်း စစ်သားတွေက ဖျက်ဆီးခဲ့သွားခဲ့ပါတယ်”  အမည်မဖော်လိုသူ ဘဲအင်းကျေးရွာသား တစ်ဦးက နိရဉ္စရာသတင်းဌာနကို ပြောသည်။

၎င်းစစ်ကောင်စီတပ်သည် ရွာထဲကို ဝင်ရောက်လာပြီးနောက် ဒေါ်စိုးရင်(၆၀နှစ်)၏ အိမ်ကို ပထမဆုံး ဝင်ရောက်ရှာဖွေကာ သူတို့ရှာဖွေသူကို မတွေ့သဖြင့် အိမ်နောက်ဖေး ထမင်းချက်ခန်းမှ သောက်ရေအိုးနှင့် ရေအိုးခွက်များ ဖျက်ဆီးသွားခဲ့သည်ဟု ၎င်းကပြောသည်။

“ဒေါ်စိုးရင်အိမ်က ထမင်းချက်ခန်းက ရေးအိုးစင်တွေ၊ အိုးတွေခွက်တွေကို ဖြိုပစ်ခဲ့တာရှိတယ်။ ကမူတောင်တပ်က ဖြိုသတ်သွားတာ။ ရဲသားတွေပါတယ်။ ရဲသားတွေ ဘာမှမလုပ်ဘူး။ ကမူတောင်တပ်က တပ်ရင်းမှူးအမိန်နဲ့ စစ်သားတွေလုပ်သွားတာ။ သူတို့က WY မူးယစ်ဆေးဝါး ရှာတယ်ဆိုပြီး အကြောင်းပြသွားတယ်။ အိမ်ကမိသားစုဝင်တွေကတော့ သူတို့ရွာကို ဝင်လာကတည်းက ကြောက်ပြီးတော့ ရှောင်နေလို့ အိမ်မှာ ဒေါ်စိုးရင်တစ်ယောက်တည်းကျန်ခဲ့တယ်” ဟုပြောသည်။

ဒေါ်စိုးရင်အိမ်ကို ဝင်ရောက်ရှာဖွေပြီးနောက်က ကျေးရွာထဲက ဦးမောင်ချီးဆိုသူ၏ နေအိမ်ကိုလည်း မှားယွင်းဝိုင်းဝန်းခဲ့ကြောင်း၊ ၎င်းနောက် ယင်းအိမ်မှ ထွက်ခွာသွားခဲ့ကာ ရွာနောက်ပိုင်းမှ ဦးနေလင်းဦးအိမ်ကို ဆက်လက်သွားဝိုင်းခဲ့သည်ဟု သူကဆက်ပြောသည်။“မောင်ချီးဆိုတဲ့ အိမ်ကိုလည်း စစ်သားတွေက ဝိုင်းတယ်။ အဲအိမ်ကို သူတို့ ဝိုင်းရှာတော့ အဲဒီအိမ်က  မောင်ချီးအိမ် မဟုတ်ပါလို့ ဘေးကလူတစ်ယောက် ပြောတော့  အဲဒီအိမ်က ထွက်ခွာသွားပြီး ရွာအနောက်ပိုင်းက နေလင်းဦးအိမ်ကို ဝိုင်းကြပါတယ်။ ဦးနေလင်းဦးက ရှောင်နေတော့ တွေ့မသွားခဲ့ပါဘူး” ဟုပြောသည်။

စစ်ကောင်စီတပ်သားများက ဦးနေလင်းဦး၏အိမ်ကို ဝိုင်းဝန်းရှာဖွေရာ မတွေ့သဖြင့်  အိမ်တွင် ဖွင့်လှစ်ထားသည့် ကုန်စုံဆိုင်တံခါးကို အုတ်ခဲ့ဖြင့်ထုကာ ဖြိုဖျက်သွားခဲ့သည်ဟု ပြောသည်။

“သူတို့ဝင်တာကတော့ အေအေနဲ့ ဆက်စပ်တယ်ဆိုတဲ့ ခေါင်းစဉ်နဲ့ဝင်တာ။ သူတို့ဝင်လာတုန်းက ဦးနေလင်းဦးရော၊ မလှညွန့်နဲ့ ၂ နှစ်အရွယ် သမီးငယ်ပါ အိမ်မှာမရှိဘူး။ သူ့ကို မတွေ့တော့ အုပ်ချုပ်ရေးမှူးကို ပါးရိုက်တာ” ဟုပြောသည်။

ဦးနေလင်းဦးကိုမတွေ့သည့်အတွက် ကမူတောင်တပ်ရင်းမှူးက ဘဲအင်း ကျေးရွာအုပ်ချုပ်ရေးမှူးကို ပစ္စတိုသေနတ်ဖြင့် ချိန်ကာ ပါးနှစ်ဖက်ကို အချက် ၂၀ ခန့်ရိုက်သွားခဲ့သည်ဟု မျက်မြင် ကျေးရွာသားများကပြောသည်။

ယင်းအပြင် ကျေးရွာအုပ်ချုပ်ရေးမှူးကို ကမူတောင်တပ်ရင်းမှူးက သတ်ပစ်မည်ဟု ခြိမ်းခြောက်ခဲ့သည်များကို ကြားခဲ့သည်ဟု ၎င်းကျေးရွာက အမျိုးသားတစ်ဦးကလည်း ပြောသည်။

“ အဲဒီတပ်ရင်းမှူးက အုပ်ချုပ်ရေးမှူးကို ရာအိမ်မှူးကိုခေါ်ခိုင်းတာတွေ၊  ဆယ်အိမ်မှူးကို ခေါ်ခိုင်းတယ်။  ပြောတာတွေရှိတယ်။ ပြီးတော့ သူ့ကို ဘာပြောလဲဆိုတော့ မင်းကို သတ်ပစ်မယ်ဆိုပြီးတော့ ခြိမ်းခြောက်တယ်၊ ကမူတောင် တပ်ရင်းမှူးက။ ပါးရိုက်ပြီးတော့ မင်းကို သတ်ပစ်မယ်လို့ ပြောတာ။ သူကိုခေါ်ပြီး ဒီလူမရှိဘူးလား၊ မင်းမသိရကောင်းလားဆိုပြီး ဆဲဆိုပြီးတော့ အဲလိုပါးကို ဘယ်ပြန်ညာပြန် မူးမူးနဲ့ ရိုက်တာ။  မူးမူးနဲ့ဆိုတာက တပ်ရင်းမှူးက အရက်သောက်ထားပြီး မူးနေပါတယ်” ဟုပြောသည်။

ပြီးခဲ့သည့် ဇူလိုင်လ ၂၈ ရက် မွန်းလွဲ ၂ နာရီခန့်ကလည်း ကမူတောင်တပ်မှ အရပ်ဝတ် ၃ ဦးနှင့် စစ်ဝတ် ၃ ဦး၊ စုစုပေါင်း ၆ ဦးက ဘဲအင်းကျေးရွာသို့ ဝင်ရောက်ခဲ့ကာ ဦးနေလင်းဦး လင်မယားဖုန်းများကို စစ်ဆေးခဲ့သည်များရှိသည်ဟု သိရသည်။

ယင်းအပြင် အဆိုပါတပ်ရင်းသည် မာန်အောင်ကျွန်းမှ သစ်ပုံရွာ၊ ဘဲအင်းရွာ၊ မီးလောင်ထောင့်၊ ဇလပ်ပြင်၊ ချောင်းဝ၊ ပေတပြင် ကျေးရွာများကိုလည်း ဝင်ရောက်ကာ သူစိမ်းများရောက်လို့ရှိလား၊ ULA/AA က လူတွေရောက်လို့ရှိလားဆိုပြီး ဝင်ရောက်မေးမြန်းသည်များရှိခဲ့သည်ဟု သိရသည်။

ဘဲအင်းကျေးရွာသည် မာန်အောင်မြို့၏မြောက်ဖက် ၄ မိုင်ခန့်အကွာတွင် တည်ရှိသည့် ကျေးရွာကြီးတစ်ရွာဖြစ်ကြောင်း သိရသည်။ (NN-3)