သောကြာ၊ မတ်လ ၂၉ရက်၊ ၂၀၂၄

ဩဂုတ် ၂၅ ရက်တွင် နေရာ ၃ ခု၌ အေအေနှင့် မြန်မာစစ်တပ်တို့ တိုက်ပွဲပြင်းထန်ဖြစ်ပွားခဲ့


  • ရေးသူ: Web Master
  • | ရက်စွဲ: ၂၆ သြဂုတ် ၂၀၂၂
  • | ကြည့်ရှုသူ: 7.4k

နိရဉ္စရာ၊ သြဂုတ်၂၆/၂၀၂၂

 

စစ်ကောင်စီတပ်နှင့် ရက္ခိုင့်တပ်တော် (AA)တို့သည် ယမန်နေ့ သြဂုတ်လ ၂၅ ရက်နေ့ တစ်ရက်တည်းတွင် နေရာ ၃ ခု၌ တိုက်ပွဲပြင်းထန်စွာ ဖြစ်ပွားခဲ့ကြောင်း သတင်းရရှိသည်။

 

တိုက်ပွဲဖြစ်ပွားခဲ့သည့်နေရာများမှာ ချင်းပြည်နယ်၊ ပလက်ဝမြို့နယ် နှမဒါကျေးရွာအနီးတွင်တစ်နေရာ၊ ရခိုင်ပြည်နယ်၊ မောင်တောမြောက်ပိုင်း ဝေလာတောင် နှင့် မိုင်တိုင် (၃၉)အနီးတွင် တစ်နေရာ၊ တောင်ကုတ်နှင့် သံတွဲမြို့နယ်ကြား ချောင်းသုံးခွရွာ ကြိမ်တောကျင်းအနီးတွင် တစ်နေရာ စုစုပေါင်း နေရာ(၃) ခုတွင် ဖြစ်ပွားခဲ့ခြင်းဖြစ်ကြောင်း ဒေသခံများက နိရဉ္စရာကိုပြောသည်။

 

မောင်တောမြို့နယ် မြောက်ပိုင်းတွင်  ဝေလာတောင် နှင့် မိုင်တိုင် (၃၉) အနီးတွင် ယမန်နေ့ နေ့လယ် ၃ နာရီကျော်မှ ၅ နာရီ ခန့်အထိ ၂ ဘက်ထိတွေ့ တိုက်ပွဲပြင်းထန်ခဲ့ကြောင်း ဒေသခံတစ်ဦးက ပြောသည်။

 

"ကျနော်တို့ ရွာနဲ့မနီးမဝေး မိုင်တိုင် (၃၉)ဘက်က သေနတ်သံတွေကြားခဲ့ရပါတယ်။ လက်နက်ကြီး သံကတော့ မနက် ၁၀ နာရီလောက်ကနေ ကြားနေရတာပါ။ နှစ်ဘက် လက်နက်ငယ်သံကတော့ နေ့လယ် ၃ နာရီ ကျော်လောက်ကနေ စကြားရတာပါ။ ၅ နာရီနီးပါးလောက်မှာ တိုက်ပွဲသံ ငြိမ်သွားတယ်။ ပစ်ခတ်တဲ့ သေနတ်သံတွေက ပြင်းထန်မှုရှိပါတယ်။ ဒါပေမယ့် လက်နက်ကြီး သံကတော့ ရပ်သွားတာ မကြာသေးဘူး" ဟု ယနေ့ ည ၈ နာရီခွဲခန့်က နိရဉ္စရာကိုပြောသည်။

 

ပလက်ဝမြို့နယ်၊ နှမဒါကျေးရွာအနီးတွင်  ယနေ့ နံနက် ၁၀ နာရီခွဲခန့်တွင်တစ်ကြိမ်၊ ညနေ ၆ နာရီခွဲခန့်တွင်တစ်ကြိမ် နှမဒါစခန်းကုန်းသိမ်းတိုက်ပွဲများ ဖြစ်ပွားခဲ့သည်ဟု အေအေနှင့် နီးစပ်သူ ဒေသခံတစ်ဦးက ပြောသည်။

 

"ဒီမနက် ၁၀ နာရီ ၄၅ မိနစ်လောက်ကဖြစ်တဲ့ တိုက်ပွဲမှာ နှမဒါကုန်း၂ ကုန်းမှာ ၁ ကုန်းကို အပိုင်ရခဲ့ပါတယ်။ နောက်ထပ်တောင်ကုန်းတစ်ကုန်းကို အခု ထပ်တိုက်နေပါတယ်။ သူတို့ဘက်ကလည်း ၂၈၉/ မုန့်သန်းပြင်/တောင်ရှည်တောင်/လိပ်ခေါင်းတပ်တွေက တိုက်ပွဲဖြစ်တဲ့နေရာဘက်ကို မှန်းပစ်နေပါတယ်"ဟု ယနေ့ ညနေ ၆ နာရီခွဲတွင် ပြောသည်။

 

နံနက်ပိုင်းဖြစ်ပွားသည့်တိုက်ပွဲတွင် စစ်ကောင်စီ၏ နှမဒါစခန်းကုန်းတစ်ခုကို သိမ်းပိုက်နိုင်ခဲ့ပြီး ကျန်စခန်းတစ်ခုကိုသိမ်းနိုင်ရန် ညနေပိုင်းတွင် ဆက်လက်တိုက်ခိုက်နေကြောင်း ၎င်းက ဆိုသည်။

 

ယင်းအပြင် ယနေ့ ညနေ (၄) နာရီခန့်က တောင်ကုတ်နှင့် သံတွဲမြို့နယ်ကြား ချောင်းသုံးခွရွာ ကြိမ်တောကျင်းအနီးတွင် ရက္ခိုင့်တပ်တော်(AA)၏ ယာယီတပ်စခန်းတစ်ခုကို စစ်ကောင်စီက လာရောက် တိုက်ခိုက်ခဲ့ပြီး စစ်ကောင်စီတပ်သားများ အကျအဆုံးများ၍ ပြန်လည် ဆုတ်ခွာသွားကြကြောင်း သိရသည်။

 

အဆိုပါတိုက်ပွဲသည် မိနစ် (၂၀) ခန့်သာ ကြာမြင့်ခဲ့သော်လည်း စစ်ကောင်တပ်သား (၁၀) ကျော်အထိ ကျဆုံးမှုရှိခဲ့ကာ AA တပ်သားတချို့လည်း ထိခိုက်မှုရှိခဲ့သည်ဟု မျက်မြင်ဒေသခံတစ်ဦးက နိရဉ္စရာကို ပြောသည်။

 

ဖြစ်ပွားခဲ့သည့် တိုက်ပွဲသုံးပွဲနှင့်ပတ်သက်ပြီး ရက္ခိုင့်တပ်တော်(AA) ပြောခွင့်ရသူ ဦးခိုင်သုခနှင့် ရခိုင်ပြည်နယ် လုံခြုံရေးနှင့်နယ်စပ်ရေးရာဝန်ကြီး ဗိုလ်မှူးကြီးကျော်သူရတို့ကို နိရဉ္စရာက ဆက်သွယ်မေးမြန်းနေဆဲဖြစ်ပါသည်။

 

ရက္ခိုင့်တပ်တော် (AA) နှင့် စစ်ကောင်စီတို့သည်  သြဂုတ်လအတွင်း ပလက်ဝ၊ မောင်တော၊ ရသေ့တောင်မြို့နယ်တို့တွင် တိုက်ပွဲများဆက်တိုက်ဖြစ်ပွားလျက်ရှိပြီး ရခိုင်ပြည်နယ်၏ မြို့နယ် အများအပြားတွင် စစ်ရေးတင်းမာလျက်ရှိကြောင်း သိရသည်။

 

တကျော့ပြန် ပြန်လည်ပြင်းထန်လာသည့် ရခိုင်စစ်ပွဲများသည် ၂၀၁၉/၂၀၂၀ ခုနှစ်တို့က ဖြစ်ပွားခဲ့သည့် စစ်ပွဲများနှင့်မတူဘဲ စစ်ကောင်စီက လေကြောင်း၊ ရေကြောင်းတို့ဖြင့် အဓိကထားတိုက်ခိုက်လာနိုင်ပြီး နယ်မြေသိမ်းတိုက်ပွဲအဖြစ်ကို ဦးတည်နေကြောင်း ရခိုင်စစ်ရေးလေ့လာသူများက သုံးသပ်ပြောဆိုသည်။ (NN-7)

ဆက်စပ် သတင်းများ