AA နှင့်ဆက်စပ်သံသယဖြင့်ဖမ်းဆီးခံလိုက်ရသည့် စစ်တွေ သိန်းတန်ရွာသား ပြန်လွတ်

နိရဥ္စရာ၊ သြဂုတ် ၂၆/၂၀၂၂

ရက္ခိုင့်တပ်တော်(AA)နှင့်ဆက်စပ်သံသယဖြင့် စစ်တပ်၏ဖမ်းဆီးခြင်းကိုခံလိုက်ရသည့် ရခိုင်ပြည်နယ် စစ်တွေမြို့နယ် သိန်းတန်ကျေးရွာမှ နှစ်ဘီးကယ်ရီမောင်းသမားဦးမောင်ဆန်းဝင်းသည် ပြန်လည် လွတ်မြောက်လာပြီဟု မိသားစုဝင်တစ်ဦးက အတည်ပြုပြောသည်။

“ပြန်လွတ်လာပါပြီ။ ထိခိုက်ဒဏ်ရာတွေ ဘာတွေတော့ ပါမလာဘူး။ အားလုံး အေးအေးဆေးဆေးနဲ့ လွတ်လာတာပါ။ ဘာတွေ စစ်ဆေးခံခဲ့ရလဲတော့ ကျမတို့လည်း မသိဘူး”ဟု ပြောသည်။

အသက် ၅ဝ အရွယ် ဦးမောင်ဆန်းဝင်းသည် သြဂုတ်လ ၂၃ ရက် ည ၉ နာရီခန့်တွင် လွတ်မြောက်လာခြင်းဖြစ်သည်ဟုလည်း ကိုယ်တိုင်သွားရောက်ခေါ်ဆောင်ခဲ့သည့် သိန်းတန်ကျေးရွာ အုပ်ချုပ်ရေးမှူး ဦးကျော်မြင့်က နိရဥ္စရာကိုပြောသည်။

“သူ့ကို ဖမ်းသွားတဲ့ဂိတ်ကနေ ပြန်လွှတ်ပေးလိုက်တာပါ။ အေးဆေးပြန်လွတ်လာတာပါ။ ကျနော်သွားပြီး ခေါ်လာခဲ့တာ။ ဘာတွေကိုစစ်လဲတော့ ကျနော်လည်း မေးမကြည့်လိုက်ဘူး”ဟု ပြောသည်။

လွတ်မြောက်လာမှုနှင့်ပတ်သက်ပြီး ဦးမောင်ဆန်းဝင်းကို နိရဥ္စရာက ဆက်သွယ်ခဲ့သော်လည်း သူသည် နေအိမ်တွင်မရှိဘဲ အပြင်သွားနေသည့်အတွက် အဆက်အသွယ်မရခဲ့ပါ။

သူသည် သြဂုတ်လ ၂၂ ရက် ညနေ ၅ နာရီကျော်တွင် စစ်တွေမြို့နယ် တောကန်ကျေးရွာသို့ ဆိုင်ကယ်ဖြင့် အရက်ပို့၍ပြန်လာစဉ် ရွာဝင်ဝရှိ စစ်တပ်စစ်ဆေးရေးဂိတ်၌ AA သံသယဖြင့် ဖမ်းဆီးခံလိုက်ရခြင်းဖြစ်သည်။

သူ့တွင် အမျိုးသမီးအပါအဝင် ဆယ်တန်းကျောင်းသူ သမီး ၁ ဦးနှင့် သားငယ် ၁ ဦးရှိပြီး မိသားစုကို တစ်ဦးတည်းက ရှာဖွေလုပ်ကိုင်ကျွေးမွေးနေရသူဖြစ်သည်ဟု သိရသည်။

လက်ရှိရခိုင်တွင် ရက္ခိုင့်တပ်တော်(AA)နှင့် စစ်တပ်တို့ စစ်ရေးတင်းမာလျက်ရှိပြီး စစ်တပ်က အပြစ်မဲ့အရပ်သားပြည်သူများကို AA နှင့်ဆက်စပ်သည်ဟုဆိုကာ ဖမ်းဆီးမှုများ ဆက်တိုက်ပြုလုပ်နေကြောင်း သိရသည်။