တိုက်ပွဲဖြစ်ပွားနေသည့်မောင်တောမြောက်ပိုင်းကျေးရွာနှစ်ရွာမှ ဒေသခံ ၁၀ဦးကို စစ်ကောင်စီတပ်ကလူသားဒိုင်းကာအဖြစ်ဖမ်းဆီးခေါ်ဆောင်သွား

ရေးသူ: Web Master
| ရက်စွဲ: ၂၇ သြဂုတ် ၂၀၂၂
| ကြည့်ရှုသူ: 10k

နိရဉ္စရာ၊ သြဂုတ် ၂၇/၂၀၂၂

တိုက်ပွဲအပြင်းအထန်ဖြစ်ပွားနေသည့်မောင်တောမြို့နယ်မြောက်ပိုင်း၊ ခမောင်းဆိပ်ကျေးရွာနှင့် မင်းခမောင်းကျေးရွာမှ မြိုတိုင်းရင်းသားများ အပါအဝင်လူ (၁၀) ဦးကို စစ်ကောင်စီတပ်က လူသားဒိုင်းကာအဖြစ် အသုံးပြုရန် ယမန်နေ့ ညအချိန်က ဖမ်းဆီးခါ်ယူသွားကြောင်း သတင်းရရှိသည်။

ဖမ်းဆီးခေါ်ဆောင်ခံရသူမှာ ၁၀ ဦးရှိပြီး ထိုအထဲက ၃ ဦးမှာ အသက်လုထွက်ပြေးလွတ်မြောက်လာကြောင်း ထွက်ပြေးလာသူ တစ်ဦးက နိရဉ္စရာသတင်းဌာနကို ပြောဆိုသည်။

ဖမ်းဆီးခေါ်ဆောင်ခြင်းခံရပြီးနောက် လူသားဒိုင်းကာအဖြစ် စစ်ကြောင်းနှင့် အတူ လိုက်ပါသွားရသည့် ရွာသား ၁၀ ဦးမှာ မင်းခမောင်းကျေးရွာမှ ဦးလှမောင်သာ(၅၇)၊ ဦးသိန်းလှအောင်(၅၀)၊ ဦးနံသာအောင်(၇၁)၊ ဦးမောင်ခင်လှ (၄၀) နှင့် ခမောင်းဆိပ်ကျေးရွာမှ ဦးအောင်သာချေ(၅၇)၊ ဦးကိုဖြိုး(၃၅) နှင့် အသက်(၂၈ )နှစ်အရွယ် နောက်ထပ်ကျေးရွားသားတစ်ဦးတို့ ဖြစ်သည်။

၎င်းတို့ ၇ ဦးအထဲတွင် ၅ ဦးမှာ မြိုတိုင်းရင်းသားများဖြစ်ကြပြီး ဦးကိုဖြိုး(၃၅) နှင့် အသက်(၂၈ )နှစ်အရွယ် နောက်ထပ်ကျေးရွားသားတစ်ဦးတို့မှာ ဗမာတိုင်းရင်းသားများဖြစ်ကြသည်ဟု သိရသည်။

ထွက်ပြေးလွတ်မြောက်လာကြသည့် ရွာသား ၃ ဦးမှာ ဦးအောင်သန်း(၄၈)၊ ဦးဘကျော်(၃၅) နှင့် ဦဟိန်းထွန်းအောင်(၃၁) တို့ (၃) ဦးတို့ ဖြစ်ကြသည်။

"ညက ရွာသားဆယ်ယောက်ခေါ်သွားတာပါ။ ၃ ယောက်ကို ရှေ့ဆုံးက သွားခိုင်းပြီး ကျန် ခုနှစ်ယောက်ကို စစ်သားတွေရဲ့ကြားက ကြားညှပ်ပြီး သွားခိုင်းပါတယ်။ လမ်းတစ်လျှောက်က အပင်တွေ/တောတွေကို သေနတ်တောက်လျှောက် ပစ်ပြီးသွားကြတာပါ။ ရှေ့ဆုံးကနေတဲ့ ၃ ယောက် ကျွန်တော်တို့ကတော့ လမ်းတစ်ဝတ်မှာ ထွက်ပြေးလို့ လွတ်လာပေမယ့် ကျန်တဲ့ ၇ ယောက်ကတော့ အခုထိ သတင်းအစအနမသိရသေးပါဘူး"ဟု ထွက်ပြေးလွတ်မြောက်လာသူတစ်ဦးက ပြောသည်။

ယမန်နေ့ သြဂုတ်လ (၂၆) ရက်နေ့ ည(၈) နာရီကျော်တွင် စစ်သား(၃၅) ဦးခန့်ပါဝင်သည့် စစ်ကြောင်း တစ်ခုသည် တိုက်ပွဲဖြစ်နေသည့် နေရာကိုစစ်ကူသွားရာတွင် ၎င်းဒေသခံ ၁၀ ဦးကို လူသားဒိုင်းကာ အဖြစ် ဖမ်းဆွဲခေါ်ဆောင်သွားခြင်းဖြစ်သည်။
တိုက်ပွဲများဖြစ်ပွားနေသည့် အချိန် ဖမ်းဆီးခေါ်ဆောင်ခံရသည့် ဒေသခံ (၇) ဦးမှာ ယခုအချိန်ထိ ပြန်လည်ရောက်ရှိလာခြင်း မရှိသည့်အတွက် မိသားစုဝင်များနှင့် ကျေးရွာသားများအထူး စိုးရိမ်ပူနေကြသည်ဟု ပြောဆိုသည်။

တောထဲတွင်တိမ်းရှောင်နေရသည့် ခမောင်းဆိပ်ကျေးရွာသားတစ်ဦးကလည်း ကျန်နေသူ ၇ ဦးအတွက် အသက်အန္တရာယ် စိုးရိမ်ရသည်ဟု ပြောသည်။

" ဒီလောက် တိုက်ပွဲဖြစ်နေတဲ့အချိန်မှာ လူဆယ်ယောက်ကိုဖမ်းခေါ်သွားတာမှာ သုံးယောက်ဘဲ ထွက်ပြေးလာပါတယ်။ ခုနှစ်ယောက်ကတော့ အခုချိန်ထိ ပြန်မရောက်သေးပါဘူး။ မိသားစုတွေရော ရွာသားတွေရော စိတ်ပူနေကြပါတယ်။ ကျန်တဲ့ရွာသားတွေကတော့ ရွာကိုမပြန်ရဲလို့ တောထဲမှာဘဲ နေရတယ်။ ထွက်ပြေးလာတဲ့လူတွေအတွက်ကလည်း တိုက်ပွဲကြားမှာဆိုတော့ အသက်အန္တရာယ်စိုးရိမ်ရသလို စားရေးသောက်ရေးကလည်း အခက်အခဲရှိနေပါတယ်"ဟု ပြောသည်။

မောင်တောမြို့နယ်မြောက်ပိုင်းမှ စစ်ရေး အရေးပါသည့် ခမောင်းဆိပ်ဗျူဟာကို ယမန်နေ့ သြဂုတ်၂၆ ရက်နေ့ နေ့လယ် ၂ နာရီခွဲမှစတင်ကာ အေအေက တိုက်ခိုက်နေပြီး ည ၈ နာရီခွဲ အချိန်အထိ တိုက်ပွဲဖြစ်ပွားနေကြောင်း သိရသည်။

၆ နာရီကြာနှစ်ဘက် တိုက်ပွဲဖြစ်ပွားပြီးနောက် ယနေ့နံက် ညဉ့် ၂ နာရီ ၅၀ မိနစ်ခန့်တွင် တိုက်ပွဲပြန်လည် ပြင်းထန် ဖြစ်ပွားခဲ့ကြောင်း ဒေသခံများက ပြောကြားသည်။

လက်ရှိမှာ တိုက်ပွဲကြောင့် ခမောင်းဆိပ်ကျေးရွာနှင့် မင်းခမောင်းကျေးရွာမှ ဒေသခံရာချီ ထွက်ပြေးတိမ်းရှောင်နေရကြောင်း သိရသည်။

လက်ရှိမှာ မြန်မာ-ဘင်္ဂလားဒေ့ရှ်နယ်စပ်၊ မောင်တောမြောက်ပိုင်း၊ မြန်မာ-အိန္ဒိယနယ်စပ် ၊ ချင်းပြည်နယ်၊ ပလက်ဝမြို့နယ်တို့တွင် တိုက်ပွဲများ နေ့စဉ်ရက်ဆက်ဖြစ်ပွားနေပြီး ရသေ့တောင်မြို့နယ်တွင်လည်း စစ်ရေးတင်မားနေကာ ယခင်တိုက်ပွဲဖြစ်ပွားမှုလုံးဝမရှိဖူးသည့် ရခိုင်တောင်ပိုင်း တောင်ကုတ်နှင့် သံတွဲမြို့နယ်ဘက်သို့အထိ တိုက်ပွဲကျယ်ပြန့်လာသည်ကို တွေ့ရသည်။(NN-7)

(ဓာတ်ပုံ- တိုက်ပွဲကြောင့် တောထဲတွင် ထွက်ပြေးတိမ်းရှောင်နေကြသည့် ခမောင်းဆိပ် ကျေးရွာသားများကိုတွေ့ရစဉ်)