တိုက်ပွဲပြင်းထန်နေသည့် မောင်တောမြောက်ပိုင်းကို စစ်ကောင်စီက ရဟတ်ယာဉ်နှစ်စီးဖြင့် လာရောက်တိုက်ခိုက်

နိရဉ္စရာ၊ သြဂုတ် ၂၇/၂၀၂၂

မောင်တောမြို့နယ်မြောက်ပိုင်း ခမောင်းဆိပ်ဗျူဟာကို ထိုးစစ်ဆင်တိုက်ခိုက်နေသည့် ရက္ခိုင့်တပ်တော် (AA)တပ်ဖွဲ့ဝင်များကို စစ်ကောင်စီက ရဟတ်ယာဉ် နှစ်စီးဖြင့် ယနေ့ညနေက လာရောက် ပစ်ခတ်ခဲ့သည်ဟု သိရသည်။

"အခုနားက ခမောင်းဆိပ်မှာ ရဟတ်ယာဉ်နဲ့ ဝဲပြီးတော့ ပစ်နေတယ်။  ရဟတ်ယာဉ်နှစ်စီးပါ။ အခုတော့ ပြန်သွားကြပါပြီ။ တိုက်ပွဲဖြစ်တဲ့နေရာကိုပစ်တာပါ။ ခမောင်းဆိပ်ကပြည်သူတွေကတော့ အနီးအနားက မင်းခမောင်းကျေးရွာမှာ လာပြီးတော့ ခိုလှုံနေကြတယ်" ဟု မျက်မြင် အနီးအနားရှိ ကျေးရွာသား တစ်ဦးက ပြောသည်။

လာရောက်တိုက်ခိုက်သည့် အချိန်မှာ ညနေ ၄ နာရီကျော်ခန့်ဖြစ်ပြီး ပစ်ခတ်သည့် အချိန်တွင် တိုက်ပွဲလည်း ဖြစ်ပွားနေခြင်းမရှိကြောင်း၊ ခမောင်းဆိပ်ကျေးရွာအနီးတဝိုက်ကို အဓိကထား ပစ်ခတ်သွားခဲ့သည်ဟု ပြောသည်။

“ တိုက်ခိုက်ရေးရဟတ်ယာဉ် ၂ စီးနဲ့ လာပစ်တာပါ။ ၄ နာရီ ၆ မိနစ်ကနေ ၄ နာရီ ၂၆ မိနစ်အထိ မိနစ် ၂၀ ကြာပါတယ်။ ရဟတ်ယာဉ် လာချိန်မှာ တိုက်ပွဲ ဖြစ်တာမျိုးမရှိဘဲ တိုက်ပွဲဖြစ်တဲ့အနီးအနား ဝန်းကျင်ကိုပစ်ခဲ့တာပါ။ လေယာဉ်လာပစ်ချိန်မှာ ဖုန်းလိုင်းတွေလည်း ပြတ်သွားတယ်” ဟု ၎င်းက ပြောသည်။

ခမောင်းဆိပ်ဗျူဟာတွင် နယ်ခြားစောင့်များတပ်စွဲထားသည့် စခန်းနှင့် စစ်သားများတပ်စွဲထားသည့် စခန်း ၂ ခုရှိပြီး နယ်ခြားစောင့်တပ် တပ်စွဲထားသည့် စခန်းကုန်းကို အေအေတို့က တိုက်ခိုက်သိမ်းပိုက်ထားပြီး ကျန်ရှိနေသည့် စစ်သားများတပ်စွဲထားသည့် စခန်းကို အေအေက ဝိုင်းဝန်းပိတ်ဆို့ထားသဖြင့် ရဟတ်ယာဉ်ဖြင့် လာပစ်ခြင်းဖြစ်ကြောင်း အေအေနှင့် နီးစပ်သူ ဒေသခံ တစ်ဦးက ပြောသည်။

လက်ရှိတွင် အဆိုပါစစ်လေယာဉ်နှစ်စီးနှင့် လာရောက်ပစ်ခတ်မှုကြောင့် အထိအခိုက် ရှိမရှိကို မသိရသေးကြောင်း ၎င်းက ပြောသည်။ ရဟတ်ယာဉ်ဖြင့်လာရောက်တိုက်ခိုက်သွားပြီးနောက် ၅ မိနစ် အကြာမှ ဖုန်းလိုင်းများကို ပြန်လည် ဆက်သွယ်၍ ရခဲ့သည်ဟု ဒေသခံများက ပြောဆိုသည်။

နောက်ထပ်ရွာသားတစ်ဦးကလည်း ""ခမောင်းဆိပ်ဘက်မှာ စစ်တပ်က အထိအခိုက်များလို့ စစ်တွေဘက်က လေယာဉ် ၂ စီးနဲ့ လာပစ်ကူတာကို တွေ့ရပါတယ်။ မိနစ်နှစ်ဆယ်လောက် ပျံဝဲပစ်ခတ်ပြီး ပြန်သွားပါတယ်" ဟုပြောသည်။

လက်ရှိတွင် အဆိုပါခမောင်းဆိပ်ကျေးရွာရှိ ရာနှင့်ချီရှိသော ဒေသခံများမှာ နီးစပ်ရာကျေးရွာများသို့ ထွက်ပြေးတိမ်းရှောင်နေကြကြောင်းသိရသည်။