လက်နက်ကြီးထိမှန်၍ ဒဏ်ရာအပြင်းအထန်ရရှိထားသည့် ဒေသခံတစ်ဦး ထပ်မံသေဆုံး

နိရဉ္စရာ၊ သြဂုတ် ၂၉/၂၀၂၂

မြောက်ဦးမြို့နယ်၊ ကင်းဆိပ်ကျေးရွာတွင် စစ်ကောင်စီပစ်ခတ်သည့် လက်နက်ကြီးထိမှန်ကာ ဒဏ်ရာ အပြင်းအထန်ရရှိထားသည့် ဒေသခံတစ်ဦး ထပ်မံသေဆုံးသွားကြောင်း သတင်းရရှိသည်။

သေဆုံးသူမှာ မြောက်ဦးမြို့နယ်၊ ချောင်းသစ်ကျေးရွာသား ဦးလှမောင်သိန်း(၄၂ နှစ်) ဖြစ်ပြီး ကင်းဆိပ်ကျေးရွာတွင် အလုပ်လာလုပ်နေသူဖြစ်ကြောင်း သိရသည်။

ယမန်နေ့ သြဂုတ်လ (၂၈) ရက်နေ့ ည(၇) နာရီခွဲအချိန်ခန့်တွင် ဒဏ်ရာပြင်းကာ သေဆုံးသွားကြောင်း ဆေးရုံကိုလိုက်ပါပေးခဲ့သည့် ကင်းဆိပ်ကျေးရွာသားတစ်ဦးက ပြောသည်။

"မနေ့ကည ၇ နာရီခွဲ ၈ နာရီနီးပါးလောက်မှာဆုံးတာပါ။ သူက ချောင်းသစ်သား ဒီမှာပျိုးစိုက် အငှားလာလုပ်ရင်း လက်နက်ကြီးထိသွားရတာပါ။ ဒဏ်ရာတွေကတော့ ဇကာပေါက်လို မှန်းလို့တောင်မကျတော့ဘူး။ ရင်ဘက်တွေမှာရော နားထင်တွေမှာရော အများကြီးထိသွားတာပါ"ဟု ပြောသည်။

ယမန်နေ့ သြဂုတ်လ (၂၈) ရက်နေ့ ညနေ ၄ နာရီ မိနစ်နစ် ၅၀ အချိန်တွင် မြောက်ဦးမြို့နယ်၊ ကင်းဆိပ်ကျေးရွာကို စစ်ကောင်စီတပ် ခမရ (၃၇၇/၅၄၀) တို့က ပစ်ခတ်သည့် လက်နက်ကြီးကျည်ထိမှန်ကာ အသက် (၆၆)နှစ် အရွယ် ဒေါ်အေးနုယဉ် နှင့် (၅) နှစ်အရွယ် မောင်မြတ်သူလင်းတို့ သေဆုံးကာ (၉ ) ဦး ဒဏ်ရာပြင်းပြင်းထန်ထန်ရရှိခဲ့ကြောင်း သိရသည်။

ယမန်နေ့ နေ့လယ်ပိုင်းက မြန်မာစစ်တပ်ဘက်က အေအေ အခြေပြုထားသည့်နေရာကို ဝင်ရောက်လာ၍ မြောက်ဦးမြို့နယ် လက္ကာရွာအနီးမှာ ထိတွေ့မှုအနည်းငယ်ဖြစ်ပွားခဲ့ပြီးနောက် စစ်ကောင်စီတပ်က တိုက်ပွဲဖြစ်ပွားသည့်နေရာနှင့်မသက်ဆိုင်ဘဲ လူနေကျေးရွာများကို လက်နက်ကြီး လှမ်းပစ်ခဲ့ခြင်း ဖြစ်သည်။

ယခုကဲ့သို့  တိုက်ပွဲဖြစ်ပွားသည့်နေရာနှင့်မသက်ဆိုင်ဘဲ လူနေကျေးရွာဘက်ကို တမင်တကာရည်ရွယ်ချက်ရှိရှိ ပစ်ခတ်မှုမှာ အရပ်သားပြည်သူကို ဦးတည်ပစ်ခတ်ခြင်းဖြစ်ပြီး ဆိုးဝါးသည့် စစ်ရာဇဝတ်မှုကို ကျူးလွန်ခြင်းဖြစ်သည့်အတွက် ပစ်ခတ်သတ်ဖြတ်မှုအပေါ်  လိုအပ်သလို တုံ့ပြန်သွားမည်ဟု ရက္ခိုင့်တပ်တော်(AA)ပြောခွင့်ရသူ ဦးခိုင်သုခက နိရဥ္စရာကို ပြောသည်။

"အခုလိုမျိုး အရပ်သားပြည်သူတွေကို ဦးတည်ပြီး ရည်ရွယ်ချက်ရှိရှိ ပစ်ခတ်သတ်ဖြတ်တဲ့အပေါ်မှာ ကျနော်တို့အနေနဲ့က လိုအပ်သလို ပြန်ပြီး တုန့်ပြန်သွားမှာဖြစ်ပါတယ်"ဟု ပြောသည်။

လက်ရှိမှာ မြောက်ဦးဆေးရုံတွင် လက်နက်ကြီးကျည်ထိမှန်မှုကြောင့် ဆေးကုသမှုခံယူနေရသူ (၈) ဦးကျန်ရှိနေသေးကြောင်း သိရသည်။ (NN-7)