နိရဥ္စရာ၊ သြဂုတ်၂၉/၂၀၂၂

၇ခိုင်ပြည်နယ်၊ မြောက်ဦးမြို့နယ်ကင်းဆိပ်ကျေးရွာမှ စစ်ကောင်စီတပ်ကပစ်ခတ်သည့် လက်နက်ကြီးထိမှန်ကာသေဆုံးသွားသူ (၃) ဦးအနက် ၂ ဦးကို ယနေ့နေ့လယ်တွင် သင်္ဂြိုလ်ခဲ့ပြီး ၅နှစ်အရွယ် ကလေးငယ်ကို မနက်ဖြန် သင်္ဂြိုလ်မည်ဟု သိ၇သည်။

ယနေ့ သင်္ဂြိုလ်မည့်သူ နှစ်ဦးမှာ မြောက်ဦးမြို့နယ် ချောင်းသစ်ကျေးရွာသား ဦးလှမောင်သိန်း(၄၂နှစ်)၊ ကင်းဆိပ်ကျေးရွာမှ အသက် (၆၆)နှစ် အရွယ် ဒေါ်အေးနုယဉ်တို့ ဖြစ်ကြသည်။  (၅)နှစ်အရွယ် မောင်မြတ်သူလင်းကို မနက်ဖြန်မှသင်္ဂြိုလ်မည်ဟု သိ၇သည်။

၄င်းတို့အနက် ၂ဦးကို ယနေ့ သြဂုတ် (၂၉ )ရက်နေ့ နေ့လယ် (၂ )နာရီတွင် မြောက်ဦးမြို့ မင်းသားကျွန်းသုဿန်၌သင်္ဂြိုလ်ခဲ့ခြင်းဖြစ်သည်ဟု ကင်းဆိပ်ကျေးရွာအုပ်ချုပ်ရေးမှူးကနိရဥ္စရာကို ပြောသည်။

"အခုလိုတွေဖြစ်သွားတဲ့အပေါ် ပြောစရာတော့မရှိတော့ပါဘူး။ နောက်ထပ်လို့ဖြစ်လာမှာကိုပဲ စိုးရိမ်နေပါတယ်။အခုမြို့ပေါ်ကဘုန်းကြီးကျောင်းတစ်ကျောင်းမှာ တစ်ရွာလုံးရောက်နေပါတယ်။နောက်ထပ်ဒီလိုဖြစ်သွားမှာကို စိုးရိမ်လို့လေ"ဟု ပြောသည်။

သေဆုံးသွားသည့်(၅) နှစ်အရွယ်မောင်မြတ်သူလင်း၏မိခင်သည်လည်း လက်နက်ကြီးကျည်ထိမှန်ခဲ့၍ မြောက်ဦးဆေးရုံတွင်ဆေးကုသမှုခံယူနေရပြီး သူမ၏ကျန်းမာရေးအခြေအနေအ၇ မနက်ဖြန်မှသားဖြစ်သူ၏ရုပ်အလောင်းနှင့်တွေ့ခွင့်ပေးမည်ဖြစ်သည့်အတွက် ကလေးငယ်အား သင်္ဂြိုလ်မည့်ရက်ကိုနောက်ဆုတ်လိုက်ရကြောင်း ကူညီဆောင်ရွက်ပေးနေသူများက ပြောသည်။

ယမန်နေ့ သြဂုတ်လ(၂၈) ရက်နေ့ ညနေ ၅ နာရီခန့်တွင် မြောက်ဦးမြို့နယ်၊ ကင်းဆိပ်ကျေးရွာကိုစစ်ကောင်စီတပ် ခမ၇ (၃ရ၇/၅၄၀) တို့က ပစ်ခတ်သည့် လက်နက်ကြီးကျည်ထိမှန်ကာ(၃) ဦးသေဆုံးပြီး (၉ ) ဦး ဒဏ်ရာပြင်းပြင်းထန်ထန်ရရှိခဲ့ကြောင်းသိ၇သည်။

ယခုကဲ့သို့ တိုက်ပွဲဖြစ်ပွားသည့်နေရာနှင့်မသက်ဆိုင်ဘဲ လူနေကျေးရွာဘက်ကိုတမင်တကာရည်ရွယ်ချက်ရှိရှိ ပစ်ခတ်မှုမှာ အရပ်သားပြည်သူကိုဦးတည်ပစ်ခတ်ခြင်းဖြစ်ပြီး ဆိုးဝါးသည့် စစ်ရာဇဝတ်မှုကို ကျူးလွန်ခြင်းဖြစ်သည့်အတွက် ပစ်ခတ်သတ်ဖြတ်မှု အပေါ်  လိုအပ်သလို လက်တုံ့ပြန်သွားမည်ဟုရက္ခိုင့်တပ်တော်(AA)ပြောခွင့်ရသူဦးခိုင်သုခက နိရဥ္စရာကို ပြောဆိုထားသည်။ (NN-7)