နိရဥ္စရာ၊ သြဂုတ် ၃ဝ/ ၂၀၂၂

တိုက်ပွဲများဆက်လက်ဖြစ်ပွားနေသဖြင့် ချင်းပြည်နယ် ပလက်ဝမြို့နယ်နှင့် ရခိုင်ပြည်နယ် ကျောက်တော်မြို့နယ်မှ စစ်ဘေးရှောင် ၂ဝဝ ခန့်သည် ကျောက်တော်မြို့သို့ ထွက်ပြေး ခိုလှုံလာကြကြောင်း သိရသည်။

ပလက်ဝမြို့နယ်မှ ကျေးရွာ ခုနှစ်ရွာနှင့် ကျောက်တော်မြို့နယ်မှ ကျေးရွာ နှစ်ရွာတို့မှ စစ်ဘေးရှောင်ဦးရေ ၁၉၂ ဦးတို့သည် ကျောက်တော်မြို့ ရွာမရပ်ကွက်ရှိ ရွှေကျောင်းဘုန်းတော်ကြီး ကျောင်းသို့ သြဂုတ်လ ၂၈ ရက်မှစတင်ကာ ခိုလှုံရောက်ရှိနေကြခြင်းဖြစ်သည်။

ထွက်ပြေးလာသူများတွင် ပလက်ဝမြို့နယ် ရေချမ်းဝ၊ ကြဥဝ၊ စိမ့်စင်း၊ စိမ့်ညှင်းဝ၊ လောင်းရှည်၊ င/ပွီရွာ၊ ပလုပ်တောင်စသည့်ကျေးရွာများမှ စစ်ဘေးရှောင် ၁၅ဝ ဦးခန့်ပါဝင်ပြီး အခြားသူများမှာ ကျောက်တော်မြို့နယ် ကွမ်းဇွဲနှင့် ပြိုင်းတိုင်းစသည့်ရွာများမှဖြစ်ကြောင်း သိရသည်။

လက်ရှိတွင် သူတို့၌ အရေးပေါ်စားရေးသောက်ရေးနှင့် နေရေးထိုင်ရေးတို့ အခက်အခဲ ဖြစ်နေကြသည်ဟု ရွှေကျောင်းဘုန်းတော်ကြီးကျောင်း စစ်ဘေးရှောင်စခန်းတာဝန်ခံ ဦးထွန်းခင်က နိရဥ္စရာကိုပြောသည်။

“အခုလောလောဆယ်ကတော့ သူတို့ကို ဓမ္မာရုံမှာ ထည့်ထားတဲ့အတွက် အခုလောလောဆယ် အိမ်သာလိုတယ်။ ခြင်ထောင်လိုတယ်။ အိပ်ဖို့နေဖို့အတွက် ဖျာတွေလိုအပ်တယ်။ ပြီးတော့ စားရေးသောက်ရေးလိုတယ်”ဟု ပြောသည်။

ယခုထွက်ပြေးလာကြသူများတွင် ကလေးငယ်များ၊ ကျောင်းတက်နေရသည့် ကျောင်းသူ၊ ကျောင်းသားများ၊ ကိုယ်ဝန်ဆောင်များနှင့် သက်ကြီးရွယ်အိုများလည်း ပါဝင်ပြီး ကျန်းမာရေး စောင့်ရှောက်မှုများလည်း လိုအပ်လျက်ရှိသည်ဟု သိရသည်။

သူတို့သည် သြဂုတ်လ ၂၃ ရက်နှင့် ၂၄ ရက်တို့က ပလက်ဝမြို့နယ်၊ နှမဒါကျေးရွာနှင့် သူဌေးကုန်းအနီး၊ ပလက်ဝမြို့နယ် အဘောင်သားရွာအနီးတို့တွင် စစ်တပ်နှင့် ရက္ခိုင့်တပ်တော်(AA)တို့ တိုက်ပွဲဖြစ်ပြီးနောက် စစ်တပ်ဘက်က လေကြောင်းပစ်ကူမှုများရှိခဲ့သည့်အတွက် အသက်အန္တရာယ်စိုးရိမ်၍ ယခုကဲ့သို့ထွက်ပြေးလာကြခြင်းဖြစ်သည်ဟု သိရသည်။

AA နှင့် စစ်ကောင်စီတို့သည် ချင်းပြည်နယ်၊ ပလက်ဝမြို့နယ်နှင့် ရခိုင်ပြည်နယ်၊ မောင်တော၊ ရသေ့တောင်မြို့နယ်တို့တွင် တိုက်ပွဲများဆက်တိုက်ဖြစ်ပွားလျက်ရှိပြီး သြဂုတ်လအတွင်း စစ်ရေးပိုမိုပြင်းထန်လာကာ ရခိုင်ပြည်နယ် မြို့နယ်အများအပြားတွင် စစ်ရေးတင်းမာလျက်ရှိသည်။