မြောက်ဦးမြို့သည် “သူရဲဘောကြောင်သူများ၏ဓားစာခံအဖြစ်သို့” ကျရောက်နေသည်ဟု AA စစ်ဦးစီးချုပ်ပြော

နိရဥ္စရာ၊ စက်တင်ဘာ ၄ / ၂ဝ၂၂

ရခိုင်ပြည်နယ် မြောက်ဦးမြို့တွင်းကို ယနေ့ နံက် ညဥ့်အချိန်က စစ်ကောင်စီတပ်ကအကြောင်းမဲ့ ဝင်ရောက်ပစ်ခတ်မှုနှင့်ပတ်သက်ပြီး ရက္ခိုင့်တပ်တော်(AA)၏ စစ်ဦးစီးချုပ် ဗိုလ်ချုပ်ထွန်းမြတ်နိုင်က "မြောက်ဦးမြို့သည် သူရဲဘောကြောင်သူတို့၏ ဓားစာခံအဖြစ်သို့ ကျရောက်နေကြောင်း" ပြောဆိုသည်။

ယနေ့ စက်တင်ဘာလ ၄ ရက် နံနက် ၁ဝ နာရီခွဲခန့်တွင် သူ၏ လူမှုကွန်ရက် တွစ်တာစာမျက်နှာတွင် ယင်းကဲ့သို့ ရေးသားဖော်ပြလိုက်ခြင်းဖြစ်သည်။

“ စစ်ကောင်စီ သူတို့၏ ကစားစရာစာအုပ်နှင့် လုပ်ငန်းဆောင်ရွက်သည့် အစီအစဉ်များ သူရဲဘောကြောင်စွာ ပေါက်ကွဲ ပွင့်အံထွက်လာနေပြီ။ မြောက်ဦးသည် လက်နက်မဲ့ အရပ်သားများကိုသာ တိုက်ခိုက်ရဲသော သူရဲဘောကြောင်သူများ၏ ဓားစာခံအဖြစ်သို့ကျရောက်နေပြီး ယခုပစ်ခတ်မှုကို တပ်မ ၅၅ တပ်မမှူး၏ တိုက်ရိုက်အမိန့်ဖြင့် ဆောင်ရွက်သည်”ဟု ရေးသားဖော်ပြထားသည်။

ပြီးခဲ့သည့် ညဥ့် ၁ နာရီခန့်က မြောက်ဦးမြို့တွင် စစ်ကောင်စီတပ်သားအများအပြားသည် ကားသုံးစီးဖြင့် မြောက်ဦးမြို့ထဲကို ဝင်ရောက်လာပြီး ရခိုင်တမျိုးသားလုံးမြတ်နိုး တန်ဖိုးထားသည့် ရှေးဟောင်းအမွေအနှစ် နန်းရာကုန်းတံတိုင်းအပါအဝင် မြို့လယ်လူနေရပ်ကွက်များကို အကြောင်းမဲ့ ပစ်ခတ်ခဲ့ကြောင်း မြို့ခံများက ပြောသည်။

မိနစ် ၂ဝ ကြာ လက်နက်ကြီး၊ လက်နက်ငယ်များဖြင့်ပစ်ခတ်ပြီးနောက် ၄င်းတို့သည် ညတွင်းချင်း တပ်ရင်း ၃၇၇ တပ်ထဲသို့ ပြန်ဝင်သွားကြသည်ဟု သိရသည်။

ယနေ့နံနက် ၈ နာရီကျော်ကလည်း ဟာသပို့စ်များတင်၍ မြောက်ဦးမြို့မှ နာမည်ကြီးလူသိများသည့် Facebook ဆယ်လီတစ်ဦးဖြစ်သည့် လူငယ် ကိုရင်ဆို့(ခေါ်)ကိုကျော်ဇံဝေကို စစ်ကောင်စီတပ်သား ၂ဝ ခန့်က နေအိမ်သို့လာရောက်ဖမ်းဆီးခေါ်ဆောင်သွားခဲ့သည်ဟု မျက်မြင်များက နိရဥ္စရာကို ပြောဆိုသည်။

မည်သည့်အတွက် ယခုကဲ့သို့ဖမ်းဆီးခေါ်ဆောင်သွားသည်ကို မသိရသေးပေ။
ယခုကဲ့သို့ ပစ်ခတ်ဖမ်းဆီးမှုဖြစ်စဉ်များကြောင့် လက်ရှိတွင် မြောက်ဦးမြို့မစျေးကို ပိတ်ထားပြီး ကျောင်းသားမိဘများ အနေဖြင့်လည်း စိတ်မချ၍ သားသမီးများကို ကျူရှင်မတက်ခိုင်းဘဲ အိမ်ထဲတွင် နေထိုင်ခိုင်းထားကြောင်း မြို့ခံများက ပြောသည်။

လက်ရှိမြောက်ဦးမြို့အနှံ့မှာ စစ်သားများသွားလာလှုပ်ရှားမှုများနေပြီး တောင်ကုန်းများနှင့် သမိုင်းဝင်ဘုရားပုထိုးရှိသည့် နေရာအနီးအနားများတွင်လည်း တပ်စခန်းငယ်များ အင်အားတိုးချထားကြောင်း အမည်မဖော်လိုသူတစ်ဦးက ပြောသည်။
သြဂုတ် ၂၈ ရက်နေ့တွင်လည်း မြောက်ဦးမြို့တပ်ရင်းများမှ လူနေကျေးရွာများကို တမင်တကာ ရည်ရွယ်ပစ်ခတ်မှုကြောင့် (၅) နှစ်အရွယ်ကလေးငယ်အပါအဝင် (၃)ဦး သေဆုံးပြီး (၉)ဦး ထိခိုက်ဒဏ်ရာရရှိခဲ့ကာ ဘုန်းတော်ကြီးကျောင်းနှင့် လူနေအဆောက်အအုံတချို့ပျက်စီးခဲ့ရသည်။