မြောက်ဦးတွင် ပေါက်ကွဲသံကြားရ၍ ပြည်သူများထိတ်လန့်

နိရဉ္စရာ၊ စက်တင်ဘာ ၆/၂၀၂၂

ရခိုင်ပြည်နယ်၊ ရှေးဟောင်းမြို့တော် မြောက်ဦးထဲတွင် ယနေ့ နံနက်က ပေါက်ကွဲသံကြီး တစ်ချက်ကြားရ၍ ပြည်သူများ အထိတ်တလန့် ဖြစ်ခဲ့ရကြောင်း မြောက်ဦးဒေသခံများက ပြောသည်။

ယနေ့ စက်တင်ဘာလ ၆ ရက် နံနက် ၉ နာရီကျော်အချိန်တွင် ၎င်းပေါက်ကွဲသံကို ကြားခဲ့ရသည်ဟုဒေသခံတစ်ဦးကပြောသည်။

"ပုံမှန်ဆိုရင်တော့ မကြာခဏလည်း လက်နက်ကြီးသံတွေကြားရတော့ အဲ့ဒီလောက်မဟုတ်ဘူး။ အခုက မြောက်ဦးမှာ စစ်တပ်ရေးလှုပ်ရှားမှုတွေက ရှိနေပြီး အကုန်သတိထားနေကြရချိန်ဆိုတော့ ပစ်ခတ် သံကြားရင်ကို ဘယ်နေရာမှာ၊ ဘာဖြစ်တာလဲပေါ့။ ခုလို ပေါက်ကွဲသံကို ကြားရတော့ အရင်ထက်ပိုပြီး စိုးရိမ်၊ ထိတ်လန့်မှုက ဖြစ်မိတာအမှန်ပဲ" ဟု ပြောသည်။

လက်ရှိတွင် ပေါက်ကွဲမှု ဖြစ်ပွားရသည့် အကြောင်းအရင်းကို မသိရသေးသော်လည်း  ပေါက်ကွဲသံမှာ  နန်းရာကုန်းအရှေ့ဖက် ဆေးရုံဟောင်းအနီးက ကြားရသည်ဟု တစ်ခြားဒေသခံ တစ်ဦးက ပြောဆိုသည်။

 “ မိုင်းဖောက်တာလား၊ လက်နက်ကြီးပစ်တာလား။ မသိဘူး။ စစ်တပ်ကတော့ တမင် မြောက်ဦးမြို့ကိုဆူပူအောင်လုပ်တောပါ။ အလကားဘာမှမဟုတ်ဘဲ လက်နက်ကြီးတွေ၊ မိုင်းသံတွေ ပေးလိုက်၊ စစ်သားတွေက မြို့ထဲမှာ လက်နက်တွေကိုင်ပြီးသွားပြလိုက်နဲ့ တမင် ဆူပူအောင်လုပ်နေတာပါ" ဟု ၎င်းက ပြောဆိုသည်။

စက်တင်ဘာ (၄) ရက်နေ့  နံနက်အာရုဏ် ၁ နာရီအချိန်တွင် စစ်ကား (၃) စီးနှင့် အကြောင်းမဲ့ မြို့ထဲသို့ ဝင်ရောက်ပစ်ခတ်ပြီး ရှေးဟောင်းအမွေအနှစ် နန်းရာကုန်းတံတိုင်းများကို ပစ်ခတ်ခြင်း၊ မြို့လယ် လူနေရပ်ကွက်ထဲကို တမင်တကာယမ်းသန်းပစ်ခတ်ခြင်းများပြုလုပ်ခဲ့ပြီး မြောက်ဦးမြို့ ဒေသခံတစ်ဦးကို စစ်ကောင်စီက နံနက် (၈) နာရီခန့်တွင် နေအိမ်မှ ဖမ်းဆီးသွားခဲ့ကာ လက်ရှိအချိန်ထိ လွတ်မြောက်လာခြင်းမရှိသေးဟု သိရသည်။

စက်တင်ဘာ (၅) ရက်နေ့ကလည်း မြောက်ဦးမြို့မဈေးထဲတွင် စစ်သားများက မိုင်းရှင်းလင်းမည် ဟုဆိုကာ ဈေးဆိုင်တချို့ကိုပိတ်ခိုင်းပြီး ကုန်ပစ္စည်းများကို နေရာရွှေ့ပြောင်းခိုင်းမှုများရှိခဲ့သည်။ 

လက်ရှိမှာလည်း စစ်ကောင်စီတပ်သားများ ဈေးထဲတွင် ကင်းချထားဆဲဖြစ်ကြောင်း နောက်ထပ် မြောက်ဦး စျေးဆိုင်ပိုင်ရှင် တစ်ဦးက ပြောသည်။ 

"သူတို့ဈေးအပြင်မှာလည်းရှိပါတယ်။ ကင်းတွေချထားတယ်။ မနေ့ကတော့ ခဏပြန်တယ်။ ပြီးတော့ ပြန်လာကြပါတယ်။ ဈေးသူဈေးသားတွေရော၊ မြို့ခံတွေရော အခုချိန်မှာတော့ အကုန်စိုးရိမ်နေကြပါတယ်" ဟု ပြောသည်။ 

မြောက်ဦးမြို့အခြေအနေနှင့် ပတ်သက်ပြီး ရက္ခိုင်အမျိုးသားအဖွဲ့ချုပ် (ULA) ကလည်း စစ်ကောင်စီသည် စက်တင်ဘာလ (၄) ရက်နေ့ ညမှစ၍ မြောက်ဦးဈေးအား မီးရှို့ရန်ကြံစည်သည့် လုပ်ရပ်များကို လုပ်ဆောင်ရန် ကြိုးစားခဲ့သည် ဟူသော သံသယဖြစ်ဖွယ်လုပ်ရပ်များကို တွေ့ရှိခဲ့ရပြီး မြောက်ဦးဈေးကိုမီးရှို့မည့် မရိုးသားသော အကြံအစည်မျိုးဖြစ်ကြောင်းနှင့် မြောက်ဦး ဈေးအား မီးရှို့မည့်အကြံအစည်များ အထမမြောက်ရအောင် စောင့်ကြည့် မှတ်တမ်းတင်ထားကြရန် ယမန်နေ့က ထုတ်ပြန်ထားသည်။ 

ရက္ခိုင့်တပ်တော်သည် ကမ္ဘာ့အမွေအနှစ်စာရင်းဝင်ရန် ကြိုးစားနေသည့် မြောက်ဦးမြို့ နှင့် မြို့ပတ်ဝန်းကျင်ရှိ ရှေးဟောင်းသမိုင်းဝင်အမွေအနှစ်နေရာများကို အထူးအလေးဂရုပြု ရှောင်ကြဉ်သော်လည်း စစ်ကောင်စီ၏ မြန်မာစစ်တပ်သည် တိုက်ပွဲအတုများဖန်တီးကာ မြို့အတွင်း လူနေအိမ်များသမိုင်းဝင် စေတီပုထိုးများကမ္ဘာ့ယဉ်ကျေးမှုအမွေအနှစ်ရှိရာ နေရာများသို့ လက်နက်ကြီးလက်နက်ငယ်များဖြင့် ပစ်ခတ် တိုက်ခိုက်ခဲ့သောဖြစ်ရပ်များ အကြိမ်ကြိမ်ရှိခဲ့ကြောင်း ထုတ်ပြန်ချက်မှာ ရေးသားထားသည်။ (NN-7)

(ဓာတ်ပုံ-  မြောက်ဦးမြို့ထဲကို ယမန်နေ့ ညနေ့က တွေ့ရစဉ်/ မူရင်းရိုက်သူကို Credit ပေးပါသည်။)